கையேடு

பகடைகள்

kaiyedu@gmail.com (கையேடு) — Sat, 14 Nov 2009 20:46:00 +0000

நொடிகள் தோறும் உருட்டப்படுகின்றன
வேண்டியவை கனவாக,
வீழ்ந்தவை நிகழ்வாக திணிக்கப்படுகின்றன,
வீழாதவொன்றைப் பற்றிய
கனவுகளுடன் உருண்டுகொண்டேயிருக்கின்றன
நொடிகள் தோரும் பகடைகள்.

மும்முனைப் போர்: மாவோயிஸ்ட், ஆதிவாசிகள், அரசு

kaiyedu@gmail.com (கையேடு) — Mon, 02 Nov 2009 14:52:00 +0000

மின்னஞ்சலில் வந்தது.. - பகிர்வுக்காக இங்கே..

****************************************************************************

The War Within : The Maoists, The Tribals and The State - 7- நவம்பர் 09

CONCERN (a student body in the Indian Institute of Science, Bangalore), is hosting a convention in IISc, Bangalore on 7th November titled "The War Within: The Maoists, The Tribals and The State". We would like to invite you to the same. We plan to screen documentaries, presentations, petitions, hold panel talks and host a photo exhibition. One of the documentaries is an exclusive 13 min long footage of our visit to VCA, Dantewada and the demolition of the ashram (as much as was possible before our cameras were seized). Please spread the word. Poster is attached.

Introduction : As the government plans to unleash its biggest ever operation against the Maoists in India's heartland, this convention aims to debate the why's and whether's behind the move and raise fundamental questions about treating socio-economic and political issues by military means.

Schedule :-

Note: There would be a photoexhibiton of photographs by Javed Iqbal at the venue.

3:00 PM Documentary Screening and a Presentation on Salwa Judum.

4:15 - 4:30 PM Tea/Coffe Break

4:30 PM Panel Talk and Discussion

Ground realities in Chhattisgarh.*
Himanshu Kumar

Double Tragedy of Tribals in India
Ramachandra Guha

Maoist movement in India : The story so far
Sudeep Chakravarti

(* Tentative Title)

About the speakers:-

Himanshu Kumar is a Gandhian Activist from Dantewada, Chhattisgarh. He set up Vanwasi Chetna Ashram (VCA) in 1992, a Gandhian organisation at Kanwalnar near Dantewada, commited to work for the survival, development and dignity of the tribal people of the Bastar region. VCA works on several modes of empowerment, with emphasis on human and legal rights and justice, community health services, elementary education, access to and implementation of NREGA and other government schemes and natural resource management activities. The VCA documented several instances of human rights violations in the fight against Maoists and Salwa Judum and was also involved in highlighting the complicity of the state administration in several cases of extra-judicial killings – including the Singaram massacre on January 8, 2009.

Ramachandra Guha is a well known Historian , Sociologist and Columnist. His research interests includes environmental, social, history of independent India and cricket history. He is the author of well known books such as The Unquiet Woods: Ecological Change and Peasant Resistance in the Himalaya (University of California, Berkeley press; Oxford University Press (OUP), This Fissured Land: An Ecological History of India (OUP) (with Madhav Gadgil, 1992), Ecology and Equity (with Madhav Gadgil, 1995) (Penguin), Savaging the Civilized— Verrier Elwin, his tribals and India (University of Chicago Press; OUP)(1999), Nature, Culture, Imperialism: Essays on the Environmental History of South Asia (with David Arnold). His books on India after Gandhi and A Corner of Foreign Field have been extremely popular. He holds a Ph.D in sociology from Indian Institute of Management, Calcutta and a masters in Economics from Delhi School of Economics.

Sudeep Chakravati is an Author, Journalist, Professional futurist and Syndicated columnist. He is the author of the extremely popular book on present day Maoist movement called “Red Sun: Travels in the Naxalite country” (Penguin India)(2008). He previously worked with Asian Wall Street Journal, Sunday Magazine and India Today. He held variety of positions with India Today Group as Business Editor, Senior Editor and Executive Editor. He also served as a consultant editor for Hindustan Times and is a visiting faculty at Manipal Institute of Communications , where he is the member of Board of Studies. He holds a Bachelors in History from St. Stephen’s College, Delhi.

9th November
Talk by Mr. Himanshu Kumar at IIM Bangalore and Department of Political Science, Bangalore University.

*************************************************************************************
இதில் பெங்களூருவில் இருக்கும் பதிவர்கள், நண்பர்கள் எனப் பொதுமக்களும் பங்குகொள்ளலாம்.

தற்செயலாகவோ அல்லது இதில் பங்குகொள்ளவோ, சென்னை மற்றும் பிற நகரத் தமிழ்ப் பதிவர்கள், பத்திரிக்கையாள நண்பர்களுள் சிலர், பெங்களூரு செல்வார்களெனில் கீழ்கண்ட தகவல்கள் உபயோகமாகயிருக்கலாம்.

How to reach IISc?

http://www.iisc.ernet.in/content_geninfohowtoreach.html

மேலுள்ள சுட்டியில், இரயில், பேருந்து, வானூர்தி, சொந்த வாகனம் என அனைத்துக்கும் வழிகாட்டுதல் இருக்கிறது.

Route Map:

http://www.iisc.ernet.in/images/campus_route.jpg

கீழுள்ள சுட்டியில் இந்திய அறிவியல் கழக வளாகத்தின் வரைபடம் உள்ளது.
http://www.iisc.ernet.in/content_geninfocampusmap.html

*************************************************************************************

சுவர் சித்திரங்கள்

kaiyedu@gmail.com (கையேடு) — Sat, 24 Oct 2009 11:54:00 +0000

எனது வீட்டின் சுவற்றில் வெவ்வேறு சித்திரங்களை மாட்டினேன். முன்பொரு நாளில் பாதகங்களை நிறுத்தச் சொன்னேன், பின்னொரு நாளில் சகோதரனுக்கு அஞ்சலியென்றேன், பின்னர் குன்றின் மேலேறி உலகுக்கான அறைகூவல் விடுக்குமொரு சித்திரம் மாட்டினேன். பின்னர், அமைதியாக கீழிறங்கி உறவுகளுக்கான கண்ணீர் அஞ்சலி அட்டை வைத்தேன், முள்கம்பி பற்றியதொரு புதிய சித்திரத்தை எங்கே மாட்டுவது என்று யோசிக்கிறேன்.

எப்போதும், இப்போதும் முட்கம்பிகளுக்குப் பின்னாலிருந்து ஒரு குழந்தை வெறித்துக் கொண்டேயிருக்கிறது, "அடுத்தது என்ன வைப்பான் என்று???"....

நவீன கால நுண்ணோக்கிகள் - மணற்கேணி2009 - பகுதி 2

kaiyedu@gmail.com (கையேடு) — Thu, 01 Oct 2009 10:22:00 +0000

முதல் பகுதியில், நுண்ணோக்கிகள் பற்றிய அறிமுகம் மற்றும், அவற்றின் செயல்திறனை நிர்ணயிக்கும் காரணிகள் குறித்து பார்த்தோம். இப்பகுதியில் தற்போது சமகால அறிவியலில் பயன்படுத்தப்படும் நவீன வகை நுண்ணோக்கிகள் பற்றி தொடர்கிறது கட்டுரை.

நவீன கால நுண்ணோக்கிகள் - பகுதி 1

ஈ. நவீன நுண்ணோக்கிகள்

20ஆம் நூற்றாண்டின் துவக்க காலங்கள் நவீன இயற்பியலில் மிகவும் குறிப்பிடத்தகுந்த ஆண்டுகாலம் எனலாம். பொருண்மை, ஆற்றல், அணு எனப் பல விடைதெரியா புதிர்களுக்கு விடைகள் கிடைத்த காலம் 20ஆம் நூற்றாண்டின் துவக்க காலம் எனலாம். இன்றைக்கு இயற்பியலில் கோலோச்சிக்கொண்டிருக்கும் பிந்து சித்தாந்தத்தின் (Quantum Theory) துவக்க காலங்கள் அவை. மேலும், அறிவியலின் தேடல், நுணுகிய பொருட்களுக்குள் புகுந்து அவற்றின் உலகைக் கண்டு இரசிக்கத் துவங்கியிருந்த காலம். அணுவே உலகின் மிகச்சிறிய துகள் என்று மனிதன் எண்ணியிருந்தது உடையத் துவங்கிய காலம். அணுவிற்குள்ளும் அதனினும் சிறிய துகள்கள் உண்டு எனப் புரியத் துவங்கியது.

ஈ.1. - எலக்ட்ரான் நுண்ணோக்கிகள்

1905 ஆம் ஆண்டு J.J.தாம்ஸன் (J.J.Thomson) அவர்களால் எலக்ட்ரான்கள் கண்டுபிடிக்கப்பட்டன. ஒரு வெற்றிடக் கண்ணாடிக்குழாயினுள் இரு மின்முனைகளுக்கிடையே உயர் மின்னழுத்ததை உண்டாக்கிய போது, எதிர்மின்முனையிலிருந்து(Cathode) கிளம்பிய ஒளிக்கற்றை நேர்மின்முனை(Anode) நோக்கிப் பாய்ந்தது. பின்னர் அதன் பண்புகள் பற்றிய மேலதிக ஆய்வுகளுக்குப் பின் அவ்வொளிக்கற்றைக்கு அணுக்களுள் இருக்கும் ஒரு துகளே காரணம் என்றும், அத்துகளுக்கு “எலக்ட்ரான்” என்றும் பெயரிடப்பட்டது. அணு மற்றும் அணுவின் அமைப்பு குறித்து ஆய்வுகள் நடைபெற்ற அதே காலங்களில், ஒளி பற்றிய அறிவியல் ஆய்வுகளும் தீவிரமாக நடந்து கொண்டிருந்தன.

ஒளி என்பது ஒரு அலையா அல்லது துகளா என்று பல்வேறு விஞ்ஞானிகள் ஆய்வுகள் மேற்கொண்டனர். ஆனால், ஒளி என்பது அலைப்பண்பு கொண்டது என்பதற்குப் போதிய ஆதாரங்கள் இருந்த போதிலும், அதன் துகள் பண்பும் அய்யமின்று நிரூபனம் ஆனது. ஒளியின் துகள் பண்பை விளக்கும் ஒரு முக்கிய ஆய்வான ஒளிமின்விளைவைப்(Photoelectric effect) பற்றிய விளக்கங்களுக்கு ஐன்ஸ்டீனுக்கு(Einstein) நோபல் பரிசு வழங்கப்பட்டது. இப்படியாக ஒளி என்பது அலைப்பண்பையும், துகள் பண்பையும் ஒருங்கே கொண்டது என்பது அய்யமின்றி நிரூபனம் ஆனது.

இதனையடுத்து, டிபிராக்லி (De Broglie) என்பவர், துகள்களும் ஒளியைப் போல இரட்டைப் பண்பு கொண்டவையே என்ற கூற்றின் அடிப்படையில், இயற்கையின் இருமைத் தன்மையை முன்மொழிந்தார். எலக்ட்ரான், நியூட்ரான் போன்ற துகள்கள், அடிப்படையில் துகள்களாகயிருந்தாலும், உயர் ஆற்றல் கொண்டு முடுக்கப்படும்போது அலைப்பண்பை கொண்டவை, என்றும் குறிப்பிட்டார். மேலும், அவை அலைப்பண்பைக் கொண்டிருக்கும் போது கீழ்வரும் அலைநீளத்தைக் கொண்டிருக்கும் என்றும் முன்மொழிந்தார்.

… (2)

சமன்பாட்டு விளக்கம்: l - எலக்ட்ரானின் அலைநீளம், h - பிளான்க் (Planck’s) மாறிலி , m - எலக்ட்ரான்களின் நிறை (பின்னர் அதிதுள்ளியக் கணக்கீட்டிற்காக இந்நிறை சார்புநிறையாக(Relativistic Mass) மாற்றப்பட்டது), e - எலக்ட்ரானின் மின் சுமை , V- மின்னழுத்தம். இவ்வலைநீளம் டிபிராக்லி அலைநீளம் என்றும் வழங்கப்படும்.

பின்னர், 1928ஆம் ஆண்டு டேவிசன் (Davisson) மற்றும் ஜெர்மர் (Germer) என்ற விஞ்ஞானிகளின் ஆய்வின் முடிவுகள் மூலம், டீபிராக்லி முன்மொழிந்த இயற்கையின் இரட்டைத் தன்மை அய்யமின்று நிரூபனம் ஆனது. அதிவேக எலக்ட்ரான்களை மெல்லிய நிக்கல் தகட்டில் மோதுவதன் மூலம் எலக்ட்ரான்களின் விளிம்பு விளைவை உண்டாக்கிக் காட்டினர். அலைப் பண்பு கொண்ட துகள்கள் அல்லது அலைகளின் முக்கியப் பண்புகளில் ஒன்று இவ்விளிம்பு விளைவு. இதன் மூலம், எலக்ட்ரான்கள் ஒரு அலையைப் போல் இயங்கும் தன்மைகொண்டவை என்பது நிரூபனம் ஆனது. மேலும், எலக்ட்ரான்கள் மின்சுமை கொண்டவையாதலால், உயர் மின்னழுத்தின் மூலம்அவற்றின் திசைவேகத்தை மாற்றியமைக்க முடியும். மேலே குறிப்பிட்டுள்ள சமன்பாடு (2)ன் அடிப்படையில் எலக்ட்ரான்களின் திசைவேகத்தை மாற்றியமைப்பதின் மூலம் அவற்றின் அலைநீளத்தை மாற்றியமைக்க முடியும். மேலே பகுதி-(இ)யில் குறிப்பிட்டது போல நுண்ணோக்கிகளின் பரித்தறிதிறன் மற்றும் உருப்பெருக்கத்தில் முக்கியப் பங்கு வகிப்பது நுண்ணோக்கியில் பயன்படுத்தப்படும் ஒளிமூலத்தின் அலைநீளம், என்பதை நினைவு படுத்திக்கொள்வது நலம்.

எலக்ட்ரான் மூலங்களுக்களிக்கப்படும் மின்னழுத்தத்தை அதிகரிப்பதன் மூலம், எலக்ட்ரான்களின் அலைநீளத்தை ஒளியின் அலைநீளத்தைவிட ஏறத்தாழ 3-5 அடுக்குகள் குறைக்கமுடியும். இதன் மூலம், எலக்ட்ரான்களை அடிப்படையாகக் கொண்டு இயங்கும் நுண்ணோக்கிகள், ஒளிநுண்ணோக்கிகளால் காணமுடியாத நுண்ணிய அளவிளான பொருட்களையும், படிகங்களுக்குள் இருக்கும் அணுக்களினது கட்டமைப்பையும் காண வழிவகை செய்யும் என்று நம்பினர் விஞ்ஞானிகள். இதனடிப்படையிலேயே எலக்ட்ரான் நுண்ணோக்கிகள் வடிவமைக்கப்பட்டு பயன்பாட்டிற்கு வந்தன. 1938-ஆம் ஆண்டு எலக்ட்ரான்களைக் கொண்டு இயங்கும் முதல் எலக்ட்ரான் நுண்ணோக்கி எர்ன்ஸ்ட் ருஸ்கா (Ernst Ruska) என்பவரால் கண்டுபிடிக்கப்பட்டது. பின்னர் 1986 ஆம் ஆண்டு அவருக்கு அக்கண்டுபிடிப்பிற்கான நோபல் பரிசு வழங்கப்பட்டது.

ஈ.1.1 மின்காந்த ஆடிகள் (electromagnetic lens)

ஆனால், எலக்ட்ரான்களின் அலைநீளத்தைக் குறைப்பதினால் மட்டுமே அவற்றை நுண்ணோக்கிகளில் பயன்படுத்திவிட முடியாது. ஒளிக்கற்றைகளைக் ஆடிகளின் உதவியோடு குவித்து விரிப்பது போல, எலக்ட்ரான் கற்றைகளையும் குவிக்கவும் விரிக்கவும் வேண்டும். இதனையும் எலக்ட்ரான்களின் மின்சுமையின் உதவியுனூடே செய்துவிடமுடியும். ஆம், அடர்வுகுறை ஊடகங்களிலிருந்து அடர்வு மிகு பொருட்களுக்குள் நுழையும் போது ஒளியின் விலகும் பண்பைக் கொண்டு நாம் ஆடிகளை வடிவமைத்தது போல, மின் மற்றும் காந்த விசைகளினால் எலக்ட்ரான்கள் தங்கள் பாதையை மாற்றிக் கொள்ளும் பண்பை எலக்ட்ரான் கற்றைகளைக் குவிக்கப் பயன்படுத்த முடியும். ஒளி நுண்ணோக்கிகளில் குவார்ட்ஸ் மற்றும் கண்ணாடி ஆடிகள் பயன்படுத்தப்படுவது போல எலக்ட்ரான் நுண்ணோக்கிகளில் மின்காந்த ஆடிகள் பயன்படுத்தப்படுகின்றன. மின் மற்றும் காந்தப் புலங்களுக்குட்படும் போது எலக்ட்ரான்கள் மின்காந்த விசைக்குட்படுகின்றன. இதனை லாரன்ஸ் விசை (Lorentz force) என்றும் வழங்குவர். உதாரணமாக ஒரே அளவிளான காந்தப்பாய அடர்வு (magnetic flux density) மற்றும் சிறப்பான வடிவமைப்பு கொண்ட மின்காந்தங்களை எதிரெதிரே வைத்து அவற்றுக்கிடையில் எலக்ட்ரான்களைப் பாய்ச்சும் போது, எலக்ட்ரான் கதிர்கள் குவிக்கப்படுகின்றன. கீழுள்ள படம்.3ல் எலக்ட்ரான்களைக் குவிக்கும் வரைபடம் ஒன்றைக் காணலாம். இப்படியாக மின் மற்றும் காந்தபுலங்களைப் பயன்படுத்தி எலக்ட்ரான்களை ஒளியைப் போல் குவிக்கவும் விரிக்கவும் முடியும்.

படம்.3: ஒரு மின்காந்த ஆடி செயல்படும் மாதிரி.

ஈ.2. எலக்ட்ரான் நுண்ணோக்கிகளின் வகைகள்:

இப்பகுதியில் எலக்ட்ரான் நுண்ணோக்கிகளிலுள்ள இரண்டு பெரும் பிரிவுகள் பற்றி படங்களுடன் காணலாம். எலக்ட்ரான் நுண்ணோக்கிகளை அவை செயல்படும் விதத்தைப் பொருத்து இரண்டு பெறும் பிரிவுகளாகப் பிரிக்கலாம்: (1) வரியோட்ட எலக்ட்ரான் நுண்ணோக்கிகள் (2) ஊடுறுவு எலக்ட்ரான் நுண்ணோக்கிகள்

ஈ.2.1. வரியோட்ட எலக்ட்ரான் நுண்ணோக்கிகள் (Scanning Electron Microscopes)

படம்.4: வரியோட்ட எலக்ட்ரான் நுண்ணோக்கி(மையப்படம்) மற்றும் சில உதாரணப் படங்கள்.

படவிளக்கம்4: அ). ஓர் எரும்பின் தலைப்பகுதி, சில ஆயிரம் மடங்கு பெரிதுபடுத்தப்பட்டது,( http://en.wikipedia.org/wiki/File:Ant_SEM.jpg)

ஆ) மனித உடலிலுள்ள சிவப்பு இரத்தச் செல்கள், ( http://www.mybioworld.blogspot.com/)

இ). ஆய்வகங்களில் வேதிவினைமூலம் தயாரிக்கப்பட்ட, நமது எலும்புகளிலுள்ள அடிப்படை மூலக்கூறுகளுள் ஒன்றான ஹைட்ராக்சிஅபட்டைட் (Hydroxy apatite) எனப்படும் பொருளின் உருப்பெருக்கம்.

ஈ). ஓர் அயனித்திடப்பொருள் ஒன்றின் படிகப்பரலமைப்பு.

மையத்தில்: வரியோட்ட நுண்ணோக்கிஒன்றின் புகைப்படம். எலக்ட்ரான்கள் உருவாக்கி முடுக்குவதற்கு வெற்றிடக் குழாய் அவசியம் ஆதலால் செங்குத்தான வெற்றிடக் குழாய் அமைப்பினுள்ளேயே அனைத்து மின்காந்த ஆடியமைப்புகளும் இருக்கும்.

வரியோட்ட எலக்ட்ரான் நுண்ணோக்கிகள் எலக்ட்ரான் கற்றைகளை ஒரு பொருளின் புறப்பரப்பில் வரியோட்டம் செய்து பிம்பப்படுத்தும் முறையை அடிப்படையாகக் கொண்டு செயல்படுகிறது. நாம் ஒரு புத்தகத்தை எப்படி வரியோட்டம் செய்கிறோமோ அதே போல இடமிருந்து வலமாக ஒரு பொருளின் குறிப்பிட்ட ஒரு பகுதியில் வரியோட்டம் செய்து கண்ணுறு ஒளிக்கோ அல்லது மனிதக் கண்களுக்கோ புலனாகாத நுணுக்கங்களைக் கண்டுணர முடியும். வரியோட்ட நுண்ணோக்கிகளில் எலக்ட்ரான் கற்றைகளை உருவாக்கி முடுக்குவதற்குப் பொதுவாக 30 கிலோவோல்ட் மின்னழுத்தம் வரை பயன்படுத்தப்படுகிறது. சிறப்பான எலக்ட்ரான் மூலங்கள் மற்றும் முறையான தேர்ந்த பயன்பாட்டினூடாக வரியோட்ட நுண்ணோக்கிகளின் பிரித்தறிதிறன் 1 - 20 நேநோ மீட்டர் வரை மாறுபடலாம்.

வரியோட்ட எலக்ட்ரான் நுண்ணோக்கிகளில் தோன்றும் பிம்பங்களுக்கான உதாரணமாக மேலேயுள்ள படம்-4ல் உள்ள படம்(ஈ), ஒரு பலபடிகத்தின் பரலமைப்பைக் குறிக்கிறது. நாம் இன்றைக்குப் பயன்படுத்தும் பல பொருட்கள் பரலமைப்பு கொண்டவை. உதாரணமாக ஒரு மாதுளம் பழத்தினுள் அதன் மணிகள் நெருக்கமாக இருப்பதைப் போல நாம் அன்றாடம் பயன்படுத்தும் உலோகங்கள் பலவும் நுணுக்கமான பரலமைப்பு கொண்டவை. மேலும், அவ்வுலோகங்களின் கடினத்தன்மை மற்றும் உறுதி போன்ற பண்புகளுக்கு இப்பரலமைப்பும் முக்கியமானதொரு காரணியாகவிருக்கிறது. ஆதலால், வரியோட்ட நுண்ணோக்கிகள், அறிவியலின் பல துறைகளிலும் முக்கியப் பங்கு வகிக்கின்றன. வரியோட்ட நுண்ணோக்கிகளின் மூலம் பொருட்களின் புறவமைப்பு பற்றி மட்டுமே அறிந்துகொள்ளமுடியுமாதலால், பொருட்களிலுள்ள அணுக்களின் அமைப்பு மற்றும் அவற்றின் படிக அமைப்பு ஆகியனவற்றை அறிந்து கொள்ள எலக்ட்ரான் நுண்ணோக்கிகளில் சில மாறுதல்கள் தேவைப்பட்டது. அப்படி மேம்படுத்தப்பட்ட எலக்ட்ரான் நுண்ணோக்கிகளே ஊடுறுவு எலக்ட்ரான் நுண்ணோக்கிகள்.

ஈ.2.2. ஊடுறுவு எலக்ட்ரான் நுண்ணோக்கிகள் (Transmission Electron Microscope)

ஊடுறுவு எலக்ட்ரான் நுண்ணோக்கிகள், ஒரு பொருளினுள்ளே ஊடுறுவி வரும் எலக்ட்ரான் கற்றைகளைக் கொண்டு பிம்பங்களை உருவாக்கம் செய்கிறது. உதாரணமாக மிக மெல்லிய துணியிலுள்ள நூலிழை அமைப்பை நாம் ஒளியை ஊடுறுவச் செய்து காண்கிறோமே, ஏறத்தாழ அதற்கிணையானதொரு நிகழ்வுதான். இப்படிப் பொருட்களினூடே ஊடுறுவி வரும் எலக்ட்ரான்கள் நின்றொளிரும் (Fluorescent screen) தன்மை கொண்ட ஒரு திரையின் மேல் பாவிக்கப்படுகின்றன. அத்திறையில் பொருட்களின் பிம்பம் விழும். இப்போது நீங்களே ஊகித்திருக்க முடியும், ஊடுறுவுதலை அடிப்படையாகக் கொண்டால், பொருட்களின் தடிமன் மிக முக்கியமானதொரு காரணியாகிவிடுமே என்று? ஆம் நீங்கள் ஊகித்தது சரிதான், ஊடுறுவு எலக்ட்ரான் நுண்ணோக்கிகளில் நாம் காணவேண்டிய பொருளின் தடிமன் ஏறத்தாழ 10x10^-9 மீட்டர் அதாவது 10 நேநோ மீட்டருக்கும் குறைவாகயிருக்க வேண்டும். இல்லாவிடில், ஊடுறுவும் எலக்ட்ரான்கள் பலவகைச் சிதறல்களுக்குட்பட்டு ஊடுறுவ முடியாமல் போகும், இதனால் நமக்கு எவ்விதபிம்பமும் கிடைக்காது வெறும் கருநிழல் மட்டுமே மிஞ்சும். இவ்வகை நுண்ணோக்கிகளில் எலக்ட்ரான்களின் உருவாக்கம் மற்றும் முடுக்கத்திற்கு ஏறத்தாழ 300கிலோவோல்ட் மின்னழுத்தம் வரை பயன்படுத்தப்படுகிறது. இதன்மூலம், எலக்ட்ரான்களின் அலைநீளத்தை 0.001-1நேநோ மீட்டர் அளவுகளுக்கு குறைக்க முடியும், மேலும் அதன் பிரித்தறிதிறன் 0.05 - 0.001 நேநோ மீட்டர் அளவுகளுக்குக் குறைக்க முடியும்.

கீழுள்ள படம் 5ல். ஒரு ஊடுறுவு நுண்ணோக்கியின் புகைப்படமும் அதன் மூலம் எடுக்கப்பட்ட புகைப்படங்கள் சிலவும் உள்ளன.

படம்-5: மையப்படம் - ஊடுறுவு நுண்ணோக்கியின் புகைப்படம், இடது: வேதியியற் முறையில் தயாரிக்கப்பட்ட உலோகத்த தங்கத்தின் நேநோ துகள்கள். அப்புகைப்படத்தின் கீழுள்ள அளவுக்கோடு 50 நேநோ மீட்டர் அளவைக்குறிக்கிறது. வலது: மிகவும் அதுயுயர் பிரித்தறிதிறன் கொண்ட ஒரு ஊடுறுவு எலக்ட்ரான் நுண்ணோக்கி மூலம், ஒரு பொருளின் உள்ளே இருக்கும் அணுவமைப்பைக் காட்டுகிறது. வெள்ளைப் புள்ளிகள் நாம் காணும் பொருளிலுள்ள ஒரு அணுவரிசையின்(atomic column) நிழலாகப் புரிந்து கொள்ளலாம், ஆனால், இப்படி அதியுயற் ஊடுறுவு திறன் பிம்பங்களைக் (High resolution images) காணும் போது மிகவும் கவனமாகக் கையாளவேண்டும் பலமுறை மாயத்தோற்ற பிம்பங்கள் நம்மை ஏமாற்றிவிடும் சாத்தியம் உண்டு.

ஈ.3. எலக்ட்ரான் நுண்ணோக்கிகளின் பயன்களும் குறைபாடுகளும்:

இப்படியாக எலக்ட்ரான் நுண்ணோக்கிகள், 1.எலக்ட்ரான்களின் அலைநீளத்தை மாற்றியமைத்துப் பயன்படுத்திக்கொள்ளும் வசதி, 2. பொருட்களின் படிக அமைப்பு மற்றும் பரலமைப்பு, 3. பொருட்கள் கட்டமைக்கப்பட்டிருக்கும் அணுக்களைக் கண்டறிதல், 4. நேநோ அளவிலான பொருட்களைக் கண்டுணர்தல், மற்றும் 5. எல்க்ட்ரான் பிம்பங்களினால் பொருட்களில் ஏற்படும் விளைவுகளைக் காண எனப் பலதரப்பட்ட பயன்பாடுகளைக் கொண்டவையாக விளங்குகின்றன. இப்படியான பல பயன்களைக் கொண்டிருந்தாலும், அவற்றிலும் குறைபாடுகளில்லாமல் இல்லை, குறிப்பாக 1.எலக்ட்ரான்களை உருவாக்க உயர்மின்னழுத்தங்களைப் பாவித்தல், 2.ஒளி நுண்ணோக்கிகளில் செய்வதுபோல உயிரோடிருக்கும் செல்கள், போன்றவற்றைக் காணமுடியாமல் இருத்தல், மேலும், 3.ஊடுறுவு எலக்ட்ரான் நுண்ணோக்கிகளில் நாம் காணவிரும்பும் பொருளின் தடிமனை குறைப்பதற்காக அவற்றை சிதைக்க வேண்டிய தேவையிருக்கிறது மற்றும் 4.அதிஉயர் பிரித்தறிதிறன் கொண்ட ஊடுறுவு எலக்ட்ரான் நுண்ணோக்கிகள் பொருளாதார ரீதியாக தன்னிறைவடைந்த நிறுவனங்கள் மட்டுமே கொள்வனவு செய்யும் வகையிலேயே இருக்கின்றன, என்று அவற்றின் குறைபாடுகளாகப் பட்டியலிடலாம்.

ஈ.4. அணுவிசை நுண்ணோக்கிகள் (Atomic Force Microscopes):

இதுவரை ஓர் அலையைக் கொண்டோ அல்லது துகள்களின் அலைப்பண்பைப் பயன்படுத்தியோ பொருட்களை உருப்பெருக்கம் செய்து காணும் நுண்ணோக்கிகள் குறித்து விரிவாகக் கண்டோம். மேலும் அவற்றின் சாதக பாதகங்கள் குறித்தும் ஓரளவு அறிந்து கொண்டுள்ளோம். இனி மற்றொரு புதிய வகை நுண்ணோக்கி ஒன்றைப் பற்றி விரிவாகக் காணலாம்.

ஒளி மற்றும் துகள் மூலங்கள் இல்லாமல், மிகவும் நுண்ணிய பொருட்களைக் காணக் கண்டுபிடிக்கப்பட்ட புதியவகை நுண்ணோக்கிகளுள் ஒன்று “அணுவிசை நுண்ணோக்கி (Atomic Force Microscope (AFM))”. தற்போது அறிவியல் துறையில் மிகவும் பேசப்படும் நேநோ(nano) தொழில்நுட்பத்தில் மிகவும் இன்றியமையாத பங்காற்றிக் கொண்டிருக்கும் நுண்ணோக்கிகளுள் ஒன்று அணுவிசை நுண்ணோக்கி.

இவ்வணுவிசை நுண்ணோக்கியின் முதல் வடிவமாக 1981 ஆம் ஆண்டு Gerd Binning மற்றும் Heinrich Rohrer ஆகியோர் எலக்ட்ரான்களின் சிதறலற்ற ஊடுறுவுப் பண்பை மையமாகக் கொண்டு உருவாக்கினர். மேலும் 1986 ஆம் ஆண்டு அதற்கான நோபல் பரிசையும் வென்றனர். இப்படியாக உருவாகிய அணுவிசை நுண்ணோக்கி பின்னர் பொருட்களின் பல்வேறு விபரங்களை அறியும் வகையாக பிறசேர்க்கை வசதிகளுடன் வடிவமைக்கப்ட்டது.

ஈ.4.1 அணுவிசை நுண்ணோக்கி செயல்படும் முறை:

இந்நுண்ணோக்கி செயல்படும் விதம் பற்றி இரு எளிய உதாரணத்துடன் காணலாம்.

உதாரணம்1: உங்கள் கண்களைக் கட்டிவிட்டு மணல், செங்கல், சலவைக்கல் ஆகிய மூன்றும் உங்கள் முன் வைக்கப்பட்டுவிட்டது என்று கொள்வோம். இப்போது அவற்றை நீங்கள் அடையாளம் கண்டுணர வேண்டும் என்பது போட்டி. கண்டிப்பாக நீங்கள் அவற்றை உங்கள் விரல்களால் தொடுவதன் மூலம் மணல் எது, செங்கல் எது, சல்வைக்கல் எது என அடையாளம் கண்டுணர முடியும். இப்போது ஒளியின் உதவியில்லாமலே நீங்கள் அவற்றைக் கண்டுகொண்டுவிட்டீர்கள்.

உதாரணம்2: கண்களால் பார்க்கும் திறனற்ற ஒருவர் ஒரு கோலின் உதவியுடன் முகட்டுப் பகுதிகளையும், அகட்டுப் பகுதிகளையும் கண்டுகொள்வதை இதற்கு இன்னொரு எடுத்துக்காட்டாகக் கொள்ளலாம்.

மேற்கூறிய உதாரணங்களில் தொடுவுணர்வையும் பொருட்களின் சுரசுரப்புத் தன்மையையும் பயன்படுத்திப் பொருட்களைக் காட்சிப்படுத்திக் கொண்டது போல, பொருட்களின் புறப்பரப்பைப் பற்றியறிய அணுக்களின் இடையே செயல்படும் மின்நிலைம விசையை அடிப்படையாகக் கொண்டு காட்சிப்படுத்திக் கொள்ளப் போகிறோம். இப்படி அணுக்களுக்கிடையே உள்ள மின்நிலைம விசைகளினைப் பயன்படுத்திக் காட்சிப்படுத்துதலை அடிப்படையாகக் கொண்டு இயங்குகிறது அணுவிசை நுண்ணோக்கி (Atomic Force Microscope).

இவ்வகை நுண்ணோக்கிகளில் ஒரு வளைவுச்சட்டம் ஒன்றின் முனையில் மிகவும் கூரான ஒரு முள்முனை உண்டு. இக்கூறான முள்முனையைக் கொண்டு பொருட்களின் புறப்பரப்பில் வரியோட்டம் செய்யும் போது அப்பொருளின் புறப்பரப்பில் இருக்கும் அணுக்களுக்கும் வளைவுச்சட்டத்தின் முனையில் இருக்கும் முற்முனைக்கும் இடையே நடைபெறும் மின்நிலைம விசைப் பரிமாற்றங்களின் அடிப்படையில் வளைவுச்சட்டம் மேலெழும்பும் அல்லது கீழிறங்கும். இப்போது இவ்வளைவுச்சட்டம் விலக்கமடையும் அளவினடிப்படையில் பொருளின் புறப்பரப்பு பற்றி அறிந்து கொள்ளமுடியும். இம்மின்நிலைம விசைகள் செயல்படும் வெளி சில நேநோ மீட்டர் (10^-9 மீட்டர்) அளவுகளே இருக்கும், அதனால் ஒரு பொருளின் புறப்பரப்பில் நேநோமீட்டர் அளவிலுள்ள முகடுகளையும் அகடுகளையும் கண்டுணர முடியும். ஒரு அணுவிசை நுண்ணோக்கியின் கூர்முனை ஒரு பொருளின் முகடையும் அகடையும் உணரும் போது எப்படி நாம் அறிந்து கொள்ள முடியும் என்பதனை ஒரு வரைபடத்துடன் கூடிய விளக்கமாகப் படம் 6.ல் காணலாம்.

படம் 6: அணுவிசை நுண்ணோக்கியினது கூர்முனையின் செயல்பாட்டு விளக்கப்படம்

படவிளக்கம் 6: பச்சைஅணுக்கள்- கூர்முனையின் அணுக்கள், சிவப்பு அணுக்கள்- காணப்போகும் பொருளின் புறப்பரப்பிலுள்ள அணுக்கள். (அ).- வரியோட்டம் துவங்குவதற்கு முன்னுள்ள நிலை. லேசரினைக் குறிக்கும் சிகப்பு அம்புக்குறி ஒளியுணர் டையோடின் மையத்தில் இருக்கும். (ஆ).- வரியோட்டம் துவங்கியபின் பொருளின் முகடான பகுதியில் இருக்கும் அணுக்களுடன் முள்முனை ஊடாடும் போது வளைவுச்சட்டம் மேல்நோக்கி எழும்பும், அதே நேரம் லேசர் கதிர் தனது மையப்புள்ளியிலிருந்து விலகும். (இ).- பொருளின் அகடான பகுதியில் முள்முனை படும்போது வளைவுச்சட்டம் கீழ்நோக்கி வளையும், அதே நேரம் லேசர் கதிர் தனது மையப்புள்ளியிலிருந்து விலகி மேல்நோக்கி நகரும்.

மேற்கூறியது ஒரு அணுவிசை நுண்ணோக்கி செயல்படும் அடிப்படை மட்டுமே ஆனால், இப்படி ஒரு முள்முனையினை பொருட்களின் புறப்பரப்பில் வரியோட்டம் செய்வது மூலம் காட்சிப்படுத்துதல் எளிதான செயல் அல்ல. மிகவும் நுட்பமான ஓர் எலக்ட்ரானியல் சுற்று (electronic circuit) தேவைப்படுகிறது. ஒரு அணுவிசை நுண்ணோக்கியில் உள்ள வெவ்வேறு பகுதிகள் பற்றியதொரு விளக்கப்படத்தை கீழேயுள்ள படம்7-ல் காணலாம்.

படம்-7:அணுவிசை நுண்ணோக்கியின் வெவ்வேறு பகுதிகள் குறித்த விளக்கப்படம்

பொருட்களின் மேல் வரியோட்டம் செய்வதன் மூலம் ஒளியுணர் டையோடில் மின்சமிஞ்சையை உருவாக்கிக் கொள்கிறோம் என்று எளிதாகக் கூறினாலும், இவ்வகை நுண்ணோக்கிகளின் செயல்பாடு மிகவும் நுட்பமானவை. இந்நுண்ணோக்கிகளில் முள்முனையை பொருட்களின் புறப்பரப்பிற்கருகே நேநோ மீட்டர் அளவிற்கு அருகில் கொண்டுவரவேண்டும், பின்னர் 1. முள்முனை பொருட்களின் புறப்பரப்பைத் தொட்டபின் வரியோட்டம் செய்தல், 2. மாறாக முள்முனையை பொருட்களின் புறப்பரப்பிற்கும் முள்முனைக்கும் இடையே இருக்கும் தூரத்தை நிலையாக வைத்துக் கொண்டு முள்முனைக்கும், பொருட்களின் புறப்பரப்பிலிருக்கும் அணுக்களுக்கும் இடையே இருக்கும் மின்நிலைம விசையை மட்டுமே கொண்டு மின்சமிஞ்சையை உருவாக்குதல், எனப் பலவகைகளில் நுட்பமாகக் கையாளமுடியும். இவை பொருட்களின் புறப்பரப்பில் இருக்கும் விபரங்களை முப்பரிமாண பிம்பங்களாகவும் தரவல்லவை.

மேற்கூறிய படி ஒரு அணுவிசை நுண்ணோக்கி செயல்பட மிகவும் முக்கியமான நான்கு பகுதிகள் தேவைப்படுகின்றன, அவை 1. வரியோட்டம் செய்யும் அமைப்பு, 2.முள்முனை, லேசர் மற்றும் நான்முக ஒளியுணர் டையோடு, 3.உருவாகும் மின்சமிஞ்சையைக் கொண்டு முள்முனையை இயக்கும் ஒரு பின்னுட்ட சுற்று மற்றும் நான்காவது முள்முனையின் விளக்கத்தினால் உருவான மின்சமிஞ்சையை பிம்பமாக மாற்றுதல். இப்படி மிக முக்கியமான நான்கு பாகங்களையே மேலுள்ள விளக்கப் படத்தில் காணலாம். இங்கே மிகவும் முக்கியமானதொரு கவனப்புள்ளி: இவ்வகை நுண்ணோக்கிகளில் மின்சமிஞ்சைகள் பிம்பமாக மாற்றப்படுகின்றன. அதனால், இவ்வகை நுண்ணோக்கிகளில் கிடைக்கும் பிம்பங்கள் பொய்ப்பிம்பங்கள் {மாயப்பிம்பங்கள் அல்ல, False-images, NOT virtual-images} என அழைக்கப்படுகின்றன. அதாவது எலக்ட்ரான் நுண்ணோக்கிகள், மற்றும் கண்ணுறு ஒளி நுண்ணோக்கிகளில் நேரடியாக பிம்பத் தோற்றம் இருப்பதுபோலல்லாமல், இவற்றில் மின்சமிஞ்சைகளே பிம்பமாக மாற்றப்படுவதால் அப்படி வழங்கப்படுகின்றன. ஆனால், அப்படி உருவாக்கப்பட்ட பிம்பங்கள் நம்பகமானவையே அல்லது அவை நமது பொருளின் புறப்பரப்பையே குறிக்கிறது. “பொய்ப்பிம்பம் என்பது பிம்பம் உருவாக்கப்படும் முறையினால் வழங்கப்படும் பெயரேயன்றி பிம்பம் சொல்லும் செய்திகள் பொய்யல்ல.”

கீழுள்ள படம்-8ல், அணுவிசை நுண்ணோக்கி மூலம் படமாக்கப்பட்ட் ஒரு பிம்பம் கொடுக்கப்பட்டுள்ளது.

படம்-8: அணுவிசை நுண்ணோக்கியின் உதவியுனூடு வரியோட்டம் செய்யப்பட்ட, சிலிகான் சில்லின் மேல், மெல்லிழையாகப் படியவைக்கப்பட்ட பிளாட்டினம் உலோகத்தின் புறப்பரப்பு. அதிலுள்ள நிறங்கள் போலியானவை அதாவது மென்பொருள் உருவாக்குவது. ஆனால் இடது புறம் நிறத்தினடிப்படையிலுள்ள ஒரு அளவைப்பட்டை வழங்கப்பட்டிருக்கிறதே அது மிகவும் முக்கியமானது. அதாவது கருமை நிறத்திலிருந்து துவங்கி பின்னர் வெள்ளை நோக்கிப் பயணிக்கிறது அந்நிற அளவைப்பட்டை. அந்நிற அளவைப்பட்டையின் மையப்புள்ளியை ஆதாரப்புள்ளியாகக் கொண்டால், மேலே வெள்ளைநிறம் என்பது ஒரு முகடைக் குறிப்பதாகவும், கீழே கருமை நிறம் என்பது ஒரு அகடைக் குறிப்பதாகவும் பொருள் கொள்ள வேண்டும். அந்நிற அளவைப்பட்டைக்கு அருகே அளவைக் கோடுகள் வழங்கப்பட்டுள்ளது. அதாவது இருஅளவைக்கோடுகளுக்கிடையே உள்ள தூரம் 40நேநோ மீட்டர் என்றிருக்கிறது. இப்போது நாம் நிற அளவைப்பட்டையையும் பிம்பத்தையும் ஒப்பிட்டு பிம்பத்தில் தெரியும் நிறத்திற்கும் இந்நிறப்பட்டையில் அதேநிறம் இருக்கும் புள்ளியைக் காணவேண்டும். பின்னர் ஆதாரப் புள்ளியில் இருந்து அந்நிறப்பட்டையில் எவ்வளவு தூரம் தள்ளியிருக்கிறோம் என்பதையும் கணித்து அருகேயுள்ள 40நேநோமீட்டர்/அளவுக்கோடு என்ற எண்மதிப்போடு ஒப்பிட்டு நமது பொருளின் புறப்பரப்பில் இருக்கும் அகட்டின் அளவையும் முகட்டின் அளவையும் கண்டுகொள்ளலாம். உதாரணமாக இங்கே அளித்துள்ள படம்8 ல், பிம்பத்தில் உள்ள வெள்ளைப் பரப்புகள் ஏறத்தாழ 50 நேநோ மீட்டர் முகட்டையும், பிம்பத்திலுள்ள கரிய நிறம் ஏறத்தாழ 50 நேநோ மீட்டர் கொண்ட அகடையும் குறிக்கிறது. ஆனால், அப்படத்தில் உள்ள பிளாட்டினம் புறவமைப்பு அதிக சுரசுரப்புத் தன்மை இல்லாதது, அதனால், பிம்பத்தில் கரிய நிறமோ அல்லது வெந்நிறமோ இல்லாமல் இருக்கிறது. மேலும் வழங்கப்பட்ட பிம்பத்தில் இருக்கும் பொருளின் புறப்பரப்பு ஏறத்தாழ1-2 நேநோ மீட்டர் அளவு மட்டுமே சுரசுரப்புத் தன்மை கொண்டது. அதில் தெரியும் மணிபோன்றவை பிளாட்டினம் உலோகத்தின் புறப்பரப்பிலுள்ள பரலமைப்பைக் குறிக்கிறது. இப்படியாகப் பொருட்களின் புறப்பரப்பில் இருக்கும், நுண்ணிய விபரங்களை அணுவிசை நுண்ணோக்கியின் உதவியினூடாகக் காணமுடியும்.

ஈ.4. அணுவிசை நுண்ணோக்கிகளின் பயன்கள்:

தற்போது வளர்ந்து வரும் நேநோ தொழில்நுட்பத்துறையில் அணுவிசை நுண்ணோக்கிகள் தங்களுக்கென்ற தனியிடத்தைப் பிடித்துக்கொண்டன. இதற்கான மிக முக்கியக் காரணிகளாகப் பல இருந்தாலும், இவை கையாள எளிதானவை, வரியோட்ட எலக்ட்ரான் நுண்ணோக்கிகளோடு ஒப்பிடும்போது பொருட்செலவு குறைவானவை, மேலும், புறப்பரப்பின் முப்பரிமாணத்தைக் காண வழிவகை செய்யும், பொருட்களின் பரலமைப்பிலிருந்து ஒரு குறிப்பிட்ட பரலின் மின்கடத்துதிறன், மற்றும் அவற்றின் காந்த மற்றும் மின் பண்புகள் ஆகியவற்றை அறியமுடியும். மிகவும் நுண்ணிய அளவிலான கார்பன் நேநோ குழாய்களின் மின்கடத்து திறன் போன்ற ஆய்வுகளைச் செய்யமுடியும் எனப் பல பயன்பாடுகளைக் கொண்டவை. இதிலுள்ள குறைப்பாடுகளுள் சிலவாக: இது சுற்றுப்புற ஒலி மற்றும் அதிர்வுகளின்பால் அதிக உணர்திறன் கொண்டது, மேலும், வளைவுச்சட்டத்தின் முனையிலுள்ள முள்முனை விரைவில் மழுங்கிப்போய்விடும், மற்றும் மின்சமிஞ்சைகள் பிம்பமாக மாற்றப்படுவதால், பிம்பங்கள் உருவானவுடன் பலமுறை பல வழிமுறைகளில் சரிபார்த்தல் வேண்டும்.

உ. கட்டுரைச்சுறுக்கமும் முடிவுரையும்:

கட்புலனாகாத நுண்ணிய உலகு குறித்த தேடுதல் துவங்கிய காலத்திலிருந்து இன்றுவரை அறிவியலில் நுண்ணோக்கிகள் பெரும்பங்காற்றியிருக்கின்றன. நுண்ணோக்கித் தொழில்நுட்பமும் அறிவியலும் தமக்குள்ளெ ஒரு சகப்பிணைப்பை கொண்டு ஒன்றோடொன்று இணைந்து வளர்ந்தன என்றால் மிகையாகாது. நுண்ணோக்கிகள் பல அறிவியல் கண்டுபிடிப்புகளை சாத்தியமாக்கின, அதேசமயம், பல அறிவியல் கண்டுபிடுப்புகள் நுண்ணோக்கித் தொழில்நுட்பத்தை வளர்தெடுத்தன.

கண்ணாடி அரவையில் துவங்கிய நுண்ணோக்கிகளின் பயணம், கண்ணுறு ஒளியைத் தாண்டி, அலைப்பண்பு கொண்ட துகள்கள், மற்றும் ஒளிமூலம் இல்லாத புதியவகை நுண்ணோக்கிகள் என இன்றும் பரிணமித்துக் கொண்டே இருக்கின்றன. இன்னும் X-கதிர்களைக் கொண்டு இயங்கும் நுண்ணோக்கிகள், அணுவிசை நுண்ணோக்கிகள் மட்டுமல்லாமல், மின்னிரட்டைகள் மற்றும் காந்தப் பொருட்களின் புறத்திலுள்ள காந்தஇருமுனையின் விசைகளைக் கொண்டு இயங்கும் நுண்ணோக்கிகள் எனப் பல்வேறு நவீன வகை நுண்ணோக்கிகள் பயன்பாட்டில் உள்ளன. கட்டுரையின் அளவு கருதியும், நவீன நுண்ணோக்கிகள் பற்றிய ஒரு தேடுதலுக்கான துவக்கப்புள்ளியாகவும் இருக்குமாறு இக்கட்டுரையில் எலக்ட்ரான் நுண்ணோக்கிகள் மற்றும் அணுவிசை நுண்ணோக்கிகள் ஆகிய இரண்டு பற்றி மட்டும் எழுதப்பட்டிருக்கிறது.

நுண்ணோக்கிகள் நமக்காக தேக்கி வைத்திருக்கும் ஆச்சர்ய அதிர்வுகள் கடல் போல விரிந்து கொண்டே செல்கிறது. அறிந்த பொருட்களைப்பற்றி புதிய செய்திகள் அறியாத பொருட்கள் பற்றிய அறிமுகம் என அனுதினமும் அவை புதியவற்றை நமக்கு அறிமுகப்படுத்திக் கொண்டேயிருக்கின்றன.

தொலைநோக்கிகளின் ஆடிகளினுடே அனுதினமும் பிரபஞ்சம் விரிவது போல, நம்மை உள்ளிழுத்து ஒரு புள்ளியில் குவித்து அங்கிருந்து மற்றுமொரு பிரபஞ்சத்தை விரித்துக் கொண்டேயிருக்கின்றன நுண்ணோக்கிகள்.

நன்றியறிவிப்பு:

இக்கட்டுரையில் பயன்படுத்துவதற்காக தங்களிடம் இருந்த எலக்ட்ரான் நுண்ணோக்கிப் பிம்பங்களைப் பகிர்ந்துகொண்ட நண்பர்கள், திரு.விஸ்வநாத், திருமதி.அதிதி மற்றும் திருமதி.சித்ரா ஆகியோருக்கும், தமிழாக்கத்தில் உதவிய நண்பர்கள் திரு.பி.சூரியகுமார், திரு.இராஜா, மற்றும் கட்டுரையை வாசித்துக் கருத்துக்களைப் பகிர்ந்து கொண்ட திருமதி.நந்தினிக்கும் நன்றிகள் பல.

ஆதாரக் கட்டுரைகள் மற்றும் தரவுகள்:

Physical principles of Electron microscopy – Ray.F.Egerton - http://www.scribd.com/doc/8288963/Physical-Principles-of-Electron-Microscopy-an-Introduction-to-TEM-SEM-and-AEM .
http://nobelprize.org/educational_games/physics/microscopes/
Atomic Force Microscope - User Manual, Veeco, http://www.veeco.com/atomic-force-microscope-systems/index.aspx
http://tamilvu.org/coresite/html/cwhomepg.htm - தமிழ் கலைச்சொற்கள் உதவிக்கு.

முக்கிய அறிவிப்புகள்:

இக்கட்டுரையின் வரைபடங்கள் மற்றும் உள்ளடக்கம் மணற்கேணி2009 / தமிழ்வெளி குழுவினர்களின் அலுவல்தளம் தவிர பிறர் முறையான முன்அனுமதியின்றி (kaiyedu@gmail.com) மீள்பதிவுசெய்தல் அல்லது பயன்படுத்துதல் கூடாது.
மாணவர் கல்விக்காகவும், விக்கிபீடியா போன்ற இலவச தகவல்தளங்களிலும் முன்னறிவிப்பு செய்துவிட்டுப் பயன்படுத்திக்கொள்ளலாம்.
கட்டுரையின் உள்ளடக்கத்திற்கும் வரைபடங்களுக்கும், முறையான அனுமதியற்ற பொருளீட்டும் நோக்குடனான பயன்பாடு மறுக்கப்படுகிறது.

நவீன கால நுண்ணோக்கிகள் - மணற்கேணி2009 - பகுதி 1

kaiyedu@gmail.com (கையேடு) — Thu, 01 Oct 2009 10:17:00 +0000

நவீனகால நுண்ணோக்கிகள்

(Modern day Microscopes)

பிரிவு: அறி#3 - தமிழ் கலைச்சொற்களைப் பயன்படுத்தி ஒரு அறிவியல் கட்டுரை.

முன்னுரை:

மனிதயினம், தனது சிந்தனைத்திறன் மூலம் காண்பவை அனைத்தின் மீதும் கேள்விகளைத் தொடுத்து தனது தேடல்களை விரிவாக்கிக்கொண்டிருந்தது, தற்போதும் விரிவாக்கிக் கொண்டிருக்கிருக்கிறது. அப்படி மனிதன் வியந்து போகும் மற்றும் வியந்து கொண்டிருக்கும் அறிவியல் துறைகளுள் ஒன்று “வானவியல்”. தன்னால் ஒரு குறிப்பிட்ட எல்லைக்குமேல் அடைய முடியாத மற்றும் கற்பனை செய்யமுடியாத அளவில், பெரிதாயிருந்ததுவும், மனிதன் வானவியலை வியந்து நோக்கியதற்கு முக்கியக் காரணங்களில் ஒன்று. ஆனால், மேலே வானில் விரிகின்ற அதிசயங்களுக்கு இணையாகவும் அல்லது அதற்கு மேலும் ஆச்சர்யமூட்டும் ஒரு உலகு மனிதனின் கண்களுக்குப் புலனாகாத நுண்ணுயிரிகள், அணுக்கள் மற்றும் அணுக்கருத் துகள்களின் உலகம். இப்படி எளிதாக மனிதக் கண்களுக்குப் புலனாகாத உலகம் குறித்த தேடலில் விளைந்த ஒரு அரிய கண்டுபிடிப்பே நுண்ணோக்கிகள் (microscopes).

நுண்ணோக்கிகள் அறிவியல் துறையில் மிகவும் புறக்கணிக்க முடியாத உபகரணம் மட்டுமல்லாது, பல அரிய கண்டுபிடுப்புகளுக்கு உறுதுணையாக இருந்தவை. இன்றைய அறிவியல் துறை மற்றும் ஆராய்ச்சிகளில் நுண்ணோக்கிகளின் பங்கு மிகவும் அளப்பரியது. தமிழில் நுண்ணோக்கிகள் பற்றிய ஒரு பரந்தகண்ணோட்டமும், சமகாலத்தைய அறிவியல் ஆய்வுகளில் கண்டுபிடிக்கப்பட்டுப் பயன்படுத்தப்படும் நவீன வகை நுண்ணோக்கிகள் பற்றியும் அவற்றின் செயல்முறை பற்றியும் அறிமுகப்படுத்தும் முகமாக இக்கட்டுரை எழுதப்பட்டிருக்கிறது.

அ. மனிதக்கண்களும் நுண்ணோக்கிகளும்:

உயிர்களினது தோற்றத்திலே கண்கள் எப்படித் தோன்றின அல்லது ஏன் தோன்றின என்பது ஒரு புதிரான கருத்தாகவே நிலவிவருகிறது. ஆனால், பரிணாமத்தின் அடிப்படையில் ஒரு புரிதலிருக்கிறது, அறிவியல் அதனை மேலும் ஆய்ந்து அறிந்து கொள்ளும் முயற்சிகளில் இருக்கிறது என்றும் சொல்லலாம். கண்களின் தோற்றம் பற்றிய புதிர் ஒருபுறமிருந்தாலும் கண்களின் ஒளியுணர்திறனுக்கு இணையாக இதுவரை எந்தவொரு ஒளியுணர் கருவியும் செயற்கையாகக் கண்டுபிடிக்கப்படவில்லை என்றும் குறிப்பிடப்படுகிறது. ஆனாலும், கண்களின் பார்வைத்திறன் என்பது மின்காந்த நிறமாலையில் உள்ள கண்ணுறு ஒளியின் அடிப்படையிலேயே செயல்படுகிறது. இதனடிப்படையிலேயே மின்காந்த நிறமாலையில் உள்ள 300-700 நேநோ மீட்டர் (1 nano meter =10^-9மீட்டர்) அலைநீளம் கொண்ட அலைகளை கண்ணுறு ஒளியென்றழைக்கிறோம். ஆனாலும், மனிதக் கண்களால் பார்க்கமுடிந்த பொருட்களின் அளவு மற்றும் அதன் பிரித்தறிதிறன் (Resolution) என்பது ஒரு எல்லைக்குட்பட்டது. அதனாலேயே நமக்கு கண்களுக்குப் புலனாகாத நுண்ணிய விபரங்களைக் கண்டறிய ஒரு கருவி தேவைப்பட்டது. அதனடிப்படையிலேயே நுண்ணோக்கிகள் பற்றிய ஆய்வுகள் மேற்கொள்ளப்பட்டன, இன்றும் மேற்கொள்ளப்படுகின்றன.

ஆ. ஒளி நுண்ணோக்கிகள் வரலாறு - விரைவுப் பார்வை

14ஆம் நூற்றாண்டில், சிலிகேட் வகை கண்ணாடிகளை அரைத்தல், மற்றும் அதன் மூலம் கண்பார்வைக்குறைப்பாட்டைப் போக்குவதற்கான ஆடிகளைத் தயாரித்தல் என்று துவங்கியது நுண்ணோக்கிகளின் பிறப்பு. பின்னர் 1590 ஆம் ஆண்டு கண்ணாடி அரைப்பவர்களான ஹன்ஸ்(Hans) மற்றும் சகாரியஸ் ஜன்சன் (Zacharias Janssen) ஆகிய இரு டச்சுக்காரர்கள் ஒரு குழாயில் இரண்டு ஆடிகளை வைத்து முதல் நுண்ணோக்கியைத் தயாரித்தனர். பின்னர் 1667-ஆம் ஆண்டு ராபர்ட் ஹூக் (Robert Hooke) என்பவர் நுண்ணோக்கிகளை வைத்து தக்கையின் நுண்ணமைப்பை ஆய்வு செய்து அது தண்ணீரில் மிதப்பது ஏன் என்பதை விளக்கியிருக்கிறார். இப்படியாகப் படிப்படியாக ஒவ்வொரு நூற்றாண்டுகளிலும் வளர்ச்சி பெற்று இன்றைக்கு கையாள மிகவும் எளிதாகவும், பல மென்பொருட்களின் வழியே பிம்பங்களை ஆய்ந்து அறிந்து கொள்ளும் வசதி என வளர்ந்து நிற்கின்றன கண்ணுறு ஒளி நுண்ணோக்கிகள். குறிப்பாக மருத்துவத் துறையில் கண்ணுறு-ஒளி நுண்ணோக்கிகளின் பங்களிப்பு அளப்பறியது.

இப்படி மனிதக் கண்களுக்குப் புலப்படாதவற்றைக் கண்டுணர வைக்கும் நுண்ணோக்கிகளுக்கும் ஒரு எல்லை உண்டு. அப்படிப்பட்ட எல்லை எது? மற்றும் அவ்வெல்லை எதனடிப்படையில் நிர்ணயம் செய்யப் படுகிறது என்று பார்க்கலாம்.

இ. நுண்ணோக்கிகளின் பொதுவான அடிப்படைக் காரணிகள்

மேற்கூறியவாறு ஒரு நுண்ணோக்கி சிறப்பாகச் செயல்புரிய அல்லது நமது தேவையைப் பூர்த்தி செய்ய வேண்டுமெனில் அதனை நிர்ணயிக்கும் முக்கியமான காரணிகள் என்று சில உண்டு. அப்படி ஒரு நுண்ணோக்கியின் செயல்பாட்டுத் திறனை நிர்ணயிக்கும் பல காரணிகளுள் மிக முக்கியமான காரணிகள் பின்வருமாறு.

பிரித்தறிதிறன் (Resolution):

ஒரு நுண்ணோக்கியின் பிரித்தறிதிறன் எல்லை என்பது, எவ்வளவு அருகே இருக்கும் இருவேறு புள்ளிகளைப் பிரித்துக் காண்பிக்கும் திறன் கொண்டது என்பதைக் குறிக்கும் எண்ணாகும். உதாரணமாக மனிதக் கண்களின் பிரித்தறிதிறன் எல்லை என்பது 100 மைக்ரான்(10^-4 மீட்டர்). 100 மைக்ரான்களுக்கு அதிகமான இடைவெளி கொண்ட இரண்டு புள்ளிகளை மட்டுமே இருவேறு புள்ளிகளாகக் காணமுடியும். மிகவும் நுட்பமாக அறிந்து கொள்ளவேண்டிய மற்றொன்று இது புள்ளியின் அளவு கிடையாது, இருவேறு புள்ளிகளுக்கிடையே இருக்கும் தூரம் மட்டுமே. ஆக ஒரு நுண்ணோக்கியின் மூலம் நாம் காணும் பொருளின் அளவு பிரித்தறிதிறனின் எல்லையைவிடக் குறைவாகயிருக்கலாம். ஆனால், ஒரு பொருளைப் பற்றிய பல்வேறு விபரங்களை அறிய நாம் காணும் பொருளின் அளவைவிட அப்பொருளிலுள்ள நுட்பமான செய்திகளை அறிந்துகொள்வதே முக்கியமானதாகும். அதனால், எப்படிப்பட்ட விபரங்களுக்காக நாம் நுண்ணோக்கியைப் பயன்படுத்துகிறோம் என்பதைப் பொருத்து அதற்கேற்றார்போல் பிரித்தறிதிறன் கொண்ட ஒரு நுண்ணோக்கியினைப் பயன்படுத்த வேண்டும்.

ஒரு நுண்ணோக்கியின் பிறித்தறிதிறனை நிர்ணயம் செய்யும் சமன்பாடு(1) பின்வருமாறு நிருவப்பட்டுள்ளது.

d_min – இருவேறு புள்ளிகளுக்கிடையே உள்ள மீச்சிறு தொலைவு, லாம்டா எனும் குறியீடு- நுண்ணோக்கியில் பயன்படுத்தப்படும் ஒளியின் அலைநீளம். ஆல்ஃபா - என்பது நுண்ணோக்கியில் பொருளின் அருகேயுள்ள ஆடியிலிருந்து வரும் ஒளிக்கற்றைகள் பொருளின் புறப்பரப்பின் மீது குவியும் போது ஏற்படுத்தும் அரைக்கோணம். அதாவது ஒளிக்கற்றைகள் கூம்புவடிவில் ஒரு பொருளின் மீது குவிக்கப்படும் கோணத்தின் பாதியளவு. பொருளருகு ஆடிக்கும், பொருளுக்கும் இடையே இருக்கும் தூரமும் இக்கோணத்தை நிர்ணயம் செய்யும். இதனை பற்றிய ஒரு விளக்கத்தைப் படம்-1ல் காணலாம்.

படம்-1:ஒரு நுண்ணோக்கியின் பொருளருகு ஆடியிலிருந்து பொருளின் மேல் குவிக்கப்படும் ஒளிக்கற்றை உருவாக்கும் அரைக்கோணம் பற்றிய விளக்கப்படம். இக்கோணத்திலிருந்து எண்ணோட்ட துவாரம்(nUMERICAL APERTURE) எனப்படும் மற்றொரு காரணி கணக்கிடப்படுகிறது. (பார்க்க: படத்தினுலுள்ள சமன்பாடு)

ஆக, ஒரு நுண்ணோக்கியில் பிறித்தறிதிறன் சிறப்பாகயிருக்க வேண்டுமெனில், a - இன் மதிப்பு அதிகமாக இருக்கவேண்டும். இதன் மூலம் பிரித்தறிதிறனின் மதிப்பான d_min மிகவும் குறைந்த மதிப்புடன் இருக்கும், அதாவது நுண்ணோக்கியின் பிறித்தறிதிறன் சிறப்பாக இருக்கும். இப்படியான கோணமதிப்பை நுண்ணோக்கி வடிவமைத்தலில் மாற்றியமைக்க முடிந்தாலும், அது ஒரு எல்லைக்குட்பட்டது. ஆனால், நுண்ணோக்கியின் பிரித்தறிதிறனை நம் வசதிக்கேற்றார்போல் மாற்ற அதில் பயன்படுத்தப்படும் ஒளியின் அலைநீளத்தைக் குறைக்க வேண்டும். அப்படி ஒளியின் அலைநீளம் குறையும்போதும் அதன் பிறித்தறிதிறன் எல்லைக் குறைகிறது. (நினைவில்கொள்க: பிரித்தறிதிறன் எல்லை குறைகிறது என்றால் மிகவும் நுட்பமான தகவல்களை நுண்ணோக்கியில் பிரித்தறியமுடியும்.) இப்படி அலைநீளத்திற்கும், நுண்ணோக்கி வகைகளுக்கும், அவற்றின் பிரித்தறிதிறன் குறித்தும் ஒப்புமைசெய்யும் ஒரு அட்டவனை கீழே படம்-2 ல் இருக்கிறது.

படம்-2: பல்வேறு ஒளி மூலங்கள், மற்றும் அவை பயன்படுத்தப்படும் நுண்னோக்கிகளின் பிரித்தறிதிறன் அட்டவனை.

இப்படியாக ஒரு நுண்ணோக்கியின் பிரித்தறிதிறன் நுண்ணோக்கியில் நாம் காணக்கூடிய விபரங்களை நிர்ணயம் செய்யும் மிக முக்கியமானதொரு காரணியாகவிருக்கிறது. ஒரு நுண்ணோக்கியின் செயல்பாட்டில் கவனத்தில் கொள்ளவேண்டிய காரணிகள் பல இருந்தாலும், மிகவும் முக்கியமான காரணிகளான, பிரித்தறிதிறன் மற்றும் எண்ணோட்ட துவாரம் ஆகிய இரண்டை மட்டும் விளக்கியிருக்கிறேன்.

ஒரு நுண்ணோக்கியின் செயல்திறனை வடிவமைப்பின் மூலம் எவ்வளவு முன்னேற்றினாலும், அதன் பிரித்தறிதிறனை நிர்ணயிக்கும் முக்கியமானக் காரணியாக அதில் பயன்படுத்தப்படும் ஒளியின் அலைநீளம் இருக்கிறது. கண்ணுறு ஒளியைப் பயன்படுத்தும் போது, மின்காந்த நிறமாலையில் கண்ணுறு ஒளியின் மிகச்சிறிய அலைநீள எல்லையான புற-ஊதாக் கதிர்களின் அலைநீளத்திற்கருகே உள்ள அலைநீளத்தைப் பயன்படுத்த முடியும். ஆக கண்ணுறு ஒளியைப் பயன்படுத்தும் நுண்ணோக்கிகளின் பிரித்தறிதிறனை அவற்றின் அலைநீள எல்லைகள் நிர்ணயம் செய்தன. இதனால், அலைநீளத்தை நம் விருப்பத்திற்கேற்ப மாற்றியமைக்க முடியாமலும், திடப்பொருட்களின் அணுவமைப்பு போன்ற நூகிய விபரங்களை அறிய முடியாமலும் இருந்தது. இதனடிப்படையிலேயே புதிய செயல்திறன் கொண்ட நுண்ணோக்கிகளுக்கான அவசியம் ஏற்பட்டது. இப்படியான புதியவகை நுண்ணோக்கிக்கான தேடுதலில் புதிய வகை எலக்ட்ரான் நுண்ணோக்கிகள் மற்றும் வேறுவகை நுண்ணோக்கிகளும் கண்டுபிடிக்கப்பட்டன.

தொடர்ந்து வாசிக்க -நவீன கால நுண்ணோக்கிகள் - மணற்கேணி2009 - பகுதி 2

***************************************************************************************

முக்கிய அறிவிப்புகள்:

இக்கட்டுரையின் வரைபடங்கள் மற்றும் உள்ளடக்கம் மணற்கேணி2009 / தமிழ்வெளி குழுவினர்களின் அலுவல்தளம் தவிர பிறர் முறையான முன்அனுமதியின்றி (kaiyedu@gmail.com) மீள்பதிவுசெய்தல் அல்லது பயன்படுத்துதல் கூடாது.
மாணவர் கல்விக்காகவும், விக்கிபீடியா போன்ற இலவச தகவல்தளங்களிலும் முன்னறிவிப்பு செய்துவிட்டுப் பயன்படுத்திக்கொள்ளலாம்.
கட்டுரையின் உள்ளடக்கத்திற்கும் வரைபடங்களுக்கும், முறையான அனுமதியற்ற பொருளீட்டும் நோக்குடனான பயன்பாடு மறுக்கப்படுகிறது.

சிங்காரச் சென்னை

kaiyedu@gmail.com (கையேடு) — Wed, 02 Sep 2009 07:13:00 +0000

வலைப்பதிவில் பலர் சென்னை பற்றிய தனது கருத்துக்களைப் பரிமாறிக் கொண்டிருக்கிறார்கள். அதனால் இவ்விடுகை சென்னை பற்றிய எனது பார்வை என்று கருத வேண்டியதில்லை, மின்னஞ்சலில் வந்தது. சென்னை பற்றி சில புள்ளிவிபரங்கள் என்ன சொல்கின்றன என்ற ஒரு பகிர்வே..

//... For 2008, Mercer ranked 215 cities worldwide. Chennai was 152nd - at the bottom among Indian cities. Bangalore was ahead at 142nd place, followed by Delhi at 145 and Mumbai at 148. Apparently, Chennai, which aspires to be a ‘Global-city’ through the real-estate route, is way down the ladder on the global ‘livability’ standards by which urban settlements are judged... //

//... Housing deficit among poorer and economically disadvantaged sections is huge and their environmental condition is worsening by the day. Public housing and rehabilitation agencies - Housing Board and Slum Clearance Board - are operating in an impersonal and sometimes inhuman manner, often stuck on ‘tokenism’. The private sector is uninterested in housing for the poor and low-income groups and rental housing for this segment is almost non-existent. With the urban land beyond the reach of the low-income, the non-affluent and non-privileged groups, the housing crisis is simmering... //

முழுவிபரம் இங்கே:

http://www.expressbuzz.com/edition/story.aspx?Title=Chennai++low+on+livable+city+index&artid=amW5opISZ/M=&SectionID=lifojHIWDUU=&MainSectionID=lifojHIWDUU=&SectionName=rSY|6QYp3kQ=&SEO=chennai,%20livability

மின்னஞ்சலில் அனுப்பிய நண்பர் குமாருக்கு நன்றிகள்.

எனது உடல் எனது ஆயுதம்

kaiyedu@gmail.com (கையேடு) — Wed, 12 Aug 2009 16:35:00 +0000

இது எனக்கு நான் அளித்துக்கொள்ளும் தண்டனையல்ல.. இது எனது கடமை..

"That very happy day will come one day"... ஷர்மிளா.
உங்களது போராட்டம் வெற்றிபெறும்/பெறவேண்டும்.

*************************************************************************************

************************************************************************************
மனிதர்கள் கரணம்
குரங்குகளின் கைகளில் துப்பாக்கிகள்
-மணிப்பூர்...

நேருக்களும், கலாம்களும் கண்ட கனவு இந்தியா இதுஎனில்.. மன்னிக்கவும்.. மக்களின் கனவு வேறாகயிருக்கிறது.

மணிப்பூர் தொடர்பான வேறுசில பதிவுகள்:

வட கிழக்கு மாநில இராணுவ அத்துமீறல்கள் அல்லது ஒடுக்கப்பட்ட மக்கள் - சுடர்

இப்படித்தான் நடக்கின்றன என்கவுன்டர்கள்! (நன்றி: டெஹல்கா)

19 ஜூலை 2009 ஜுபீடரில் நடந்தது என்ன???

kaiyedu@gmail.com (கையேடு) — Mon, 03 Aug 2009 08:27:00 +0000

19ஜூலை 2009, ஆஸ்திரேலியாவிலுள்ள தொடக்க நிலை வானியல் ஆய்வாளரான "Anthony Wesley" என்பவர் தனது விட்டின் கொள்ளைப்புறத்திலுள்ள தனது தொலைநோக்கி மூலம், ஜுபீடர் கோளை படம்பிடித்துக் கொண்டிருந்தார். அவர் ஜூபீடரின் செந்நிற உதயத்தில் தனது கவனத்தைக் கொண்டிருந்த போது, ஜூபீடரின் தென் துருவத்தில் ஒரு கரிய புகைமண்டலத்தைக் கண்டிருக்கிறார். இது ஜுபீடரில் தோன்றும் வழக்கமான புழுதிப்புயல் என்று எண்ணி அதனை முதலில் புறக்கனித்திருக்கிறார்.

பின்னர் பூமியை நோக்கி ஜுபீடர் முழுவதுமாகத் திரும்பியதும் அங்கே தோன்றிய கருமேகம், அது வழக்கமான நிகழ்வல்ல என்பதை உறுதிப்படுத்தியிருக்கிறது.

Above: South is up in this July 19th discovery image taken by Anthony Wesley using a 14.5-inch telescope in Murrumbateman, Australia.

"It was an impact mark. Something hit the giant planet!"

அவர் 1994 ஆம் ஆண்டு ஷூமேக்கர் லெவி-9 என்ற எரிவிண்மீன் (comet) தாக்கிய போது ஏற்பட்ட விளைவுகளையும் அவதானித்திருந்தார். அவ்வனுபவத்தில், அவர் இப்போது காண்பதுவும் ஏதோவொரு பாரிய மோதலின் பின்விளைவு என்பதைத் தெளிவாகக் கண்டுகொண்டிருக்கிறார்.

பின்னர் தான் கண்டதையும் சில புகைப்படங்களுடன் தமது வானியல் நண்பர்களுடன் பகிர்ந்துள்ளார்.

இது குறித்து நாசா விஞ்ஞானிகள் குறிப்பிடுகையில் இது ஒரு எரிவிண்மீனாகவோ அல்லத் எரிகல்லாகவோ இருக்கலாம் என்று குறிப்பிடுகின்றன. எப்படியும் சில நூறு மீட்டர்கள் குறுக்களவுள்ள ஏதோவொன்று ஜுபீடரைத் தாக்கியிருக்கிறது என்றும், இதே அளவிளானது பூமியைத் தாக்கியிருந்தால், ஒரு குறிப்பிட்ட நிலப்பகுதி முழுவதுமாக அழிந்து போயிருக்கும் என்றும், ஒருவேளை கடல்பகுதிகளில் மோதியிருந்தால், மீண்டுமொரு மிகப் பெரிய சுனாமி தோன்றி அழித்திருக்கவும் வாய்ப்புண்டு என்றும் குறிப்பிடுகிறார்கள்.

அதே நேரம் 20 ஜூலை 2009 அன்று, நாசாவின் வேறுசில விஞ்ஞானிகளும் ஜுபீடரைக் கண்காணிப்பதற்குப் பணிக்கப்பட்டிருந்தனர். அவர்களும் இம்மோதல் நிகழ்ந்ததற்கான பின்விளைவுகளை அவதானித்து உறுதிப்படுத்தியிருக்கின்றனர்.

Right: An IRTF image of the Jupiter impact debris cloud on July 20, 2009. The cloud appears bright at this wavelength (2.12 microns) because particles in the cloud are reflecting infrared radiation from the sun, explains observer Glenn Orton.

ஜுபீடரின் மேல் மோதியது எதுவாகயிருந்தாலும், அது இப்போது தூள்களாகச் சிதறியிருக்கிறது என்றும், அதன் சிதறல் எச்சங்களையும், அது ஜுபீடரின் பரப்பில் ஏற்படுத்திய பாதிப்பையுமே நாம் இப்போது கண்டுகொண்டிருக்கிறோம் என்று குறிப்பிடுகின்றனர்.

நாசாவின் புகழ்பெற்ற ஹப்பில் தொலைநோக்கி இந்த ஆண்டு மேமாதம் முதல், பராமரிப்பு பணிகளுக்காக முழுவீச்சில் இயங்காமல் இருந்ததாகவும், அதனால், ஜுபீடரின் மேல் மோதியது எது என்று நமக்கு எவ்விதமான முன்னறிவும் கிடைக்காமல் போய்விட்டது என்றும், ஆனால், வெஸ்லி தான் கண்ட புகைப்படங்களை அனைவருக்கும் அனுப்பிவைத்ததும், 23ஜூலை முதல் ஹப்பில் தொலைநோக்கி அக்கரிய மேகத்தைப் பற்றி ஆய்வு செய்ய முழுவீச்சில் செயல்பட்டுவருகிறது என்றும் குறிப்பிடுகின்றனர்.

ஆனால், ஜுபீடரில் மோதியது எது என்பது பற்றியும், அது எங்கிருந்து வந்தது என்பதுபற்றியும் பூமியில் உள்ள விஞ்ஞானிகளிடம் எவ்விதமான தகவல்களும் இல்லாமல் போனது, பூமிக்கு மிக முக்கியமான செய்தியைச் சொல்கிறது என்றும் குறிப்பிடுகிறார்கள்.

இப்போது ஜுபிடரில் தோன்றியிருக்கும் "வெஸ்லி துகள் மேக"த்தினை தொடர்ந்து அவதானித்து வருகின்றனர். அதன் கருப்பொருள், மோதிய பொருளின் கருப்பொருள் எனப் பலவற்றை ஆய்ந்து வருகின்றனர் வானியல் விஞ்ஞானிகள். இதற்கு முன்னர் SL-9 எனப்படும் எரிவிண்மீனின் மோதலில் கிடைத்த அனுபவத்தின் மூலம் இக்கரிய மேகம் இன்னும் ஓராண்டுக்கு மேல் ஜுபீடரின் பரப்பில் காணமுடியும் என்று குறிப்பிடுகின்றனர்.

ஆனால், பதினைந்து ஆண்டுகளுக்குப் பின் ஜுபீடரில் நிகழ்ந்திருக்கும் இம்முக்கிய நிகழ்வு பற்றி எவ்வித முன்னறிவும், எது மோதியது என்பதுவும், அறிய முடியாமல் போனது துரதிஷ்ட வசமானது என்பதும் குறிப்பிட்டுள்ளனர்.

Above: A Hubble Space Telescope image of the Jupiter impact scar taken on July 23, 2009, taken using Hubble's new camera, the Wide Field Camera 3 (WFC3).

இதைப்பற்றி திரு. அந்தோனி வெஸ்லி குறிப்பிடுகையில், நான் இப்போது தினமும் ஆர்வத்துடன் அக்கரிய மேகத்தைப் படம்பிடித்து வருகிறேன் என்று குறிப்பிடுகிறார் மேலும்,

"I wonder," "what will happen next?" என்றும் குறிப்பிடுகிறார்.

தகவல் மூலம்:
What Hit Jupiter? http://science.nasa.gov/headlines/y2009/03aug_whathitjupiter.htm?list1301990

***************************************************************************************
வானியலின் தூர அளவுகளுடன் ஒப்பிட்டால், மயிரிழையில் பூமி தப்பியிருக்கிறது என்று சொல்லலாம். ஒருவேளை சமீபத்தில் நிகழ்ந்த சூரிய கிரகணத்தில் தனது முழு கவனத்தையும் விஞ்ஞானிகள் மையப்படுத்தி விட்டார்களோ என்னவோ?? எப்படியும் ஒரு மிக முக்கியமானதொரு வானியல் நிகழ்வைத் தவறவிட்டிருக்கிறார்கள்/தவறவிட்டிருக்கிறோம் என்றும் சொல்லலாம்.

ஜுபீடர் நமது சூரிய குடும்பத்தின் வரிசையில் ஐந்தாவது கோளாகும். மேலும், சூரிய குடும்பத்தின் மிகப்பெரிய கோளும் ஜுபீடரே. ஜுபீடர் பற்றிய மேலதிகத் தகவல்களை இங்கே காணலாம். http://www.nineplanets.org/jupiter.html

இதற்கு முன்னர் 1994 ஆண் ஆண்டு ஜுபீடரில் நடைபெற்ற மோதலின் போது எடுத்த புகைப்படங்கள் சில:

புகைப்படம்:http://www.midnightkite.com/sl9.html

29/11 மும்பை தீவிரவாதத் தாக்குதல் -ஆவணப்படம்

kaiyedu@gmail.com (கையேடு) — Fri, 24 Jul 2009 10:08:00 +0000

மும்பை தீவிரவாதத் தாக்குதல் குறித்து ஒரு ஆவணப்படம் ஒன்றைக் கீழ்கண்ட சுட்டியிலிருந்து இங்கே பதிந்திருந்தேன். ஆனால், அவ்வாவணப்படம் இப்போது கீழ்கண்ட சுட்டியில் இல்லை என்ற தகவல் வருகிறது. மன்னிக்கவும்.

- Channel 4 - Dispatches (June 2009) - Terror in Mumbai from Mskadu on Vimeo.

சத்யாவின் பட்டறை

kaiyedu@gmail.com (கையேடு) — Tue, 21 Jul 2009 15:42:00 +0000

நீங்கள் வாரயிறுதி நாட்களில் அண்ணா பல்கலைக்கழகம் அல்லது சென்னைப் பல்கழைக்கழகத்தின் (கிண்டி) வளாகங்களைக் கடந்திருக்கிறீர்களா, அப்படியென்றால் உணவு இடைவேளையின்போது வளாக உணவகங்களில் இவரை நிச்சயம் சந்தித்திருக்கலாம். இருபதுக்கும் மேற்பட்ட மாணவ மாணவியருக்கிடையில் தன்னை மறந்து கைகளால் அபிநயம் பிடித்துக் காற்றில் படம் வரைந்து கொண்டிருக்கிறாரா ஒருவர் அப்படியானால் அவர் 'சத்யா'வாகயிருக்கலாம்.

ஆந்திர மாநிலம் குண்டூரில் ஆரம்ப சுகாதார நிலையம் ஒன்றின் கம்பவுண்டரின் மகனாகப் பிறந்து தெலுங்கு வழியிலேயே பனிரெண்டாம் வகுப்புவரைக் கல்விகற்று, மைசூரின் கல்விக்கான மண்டலக் கல்லூரியில் முதுகலை இயற்பியல் படித்தவர் "சத்யா (எ) சத்யநாராயணன்". பின்னர் "GATE" எனப்படும் தேசிய அளவிலான நுழைவுத் தேர்வில் தேர்ச்சிபெற்று கல்பாக்கம் இந்திரா காந்தி அணுவாராய்ச்சி மையத்தில்(IGCAR) தனது முனைவர் பட்டத்திற்கான ஆராய்ச்சியை மேற்கொண்டவர். பின்னர் அதே IGCAR'ல் விஞ்ஞானியாகவும் இணைந்தவர். "CHAOS"ல் தனது முனைவர் பட்டத்துக்கான கட்டுரைத் தொகுப்பை வெளியிட்டார். பின்னர் புரோட்டின்களின் அமைப்பு மற்றும் உயிரியல் மூலக்கூறுகளின் இயக்கம் என அவரது ஆராய்ச்சிகளும் விரிவடைந்தன, இன்றைக்கும் விரிவடைந்து கொண்டிருக்கிறது.

இதிலென்ன சிறப்பிருக்கிறது, இந்தியாவில் பலரும் இப்படித்தானே, கிராமத்தில் படித்து பின்னர், வாழ்க்கையில் முன்னேறியவர்கள்தானே என்று உங்களுக்குத் தோன்றக்கூடும். ஆனால், சத்யாவைப் பற்றி இன்னும் இருக்கிறது சொல்வதற்கு.

சென்னை மற்றும் வடதமிழ்நாட்டின் பல கிராமப் புற மாணவர்களுக்கு, இயற்பியல் ஆய்வு மேற்படிப்புக்கான தேசிய நுழைவுத் தேர்வுகளுக்கும், தேசிய உயர்கல்வி மற்றும் ஆய்வு நிறுவனங்களின் நுழைவுத்தேர்வு மற்றும் நேர்முகத் தேர்வுகளுக்காக (CSIR, NET, GATE, IISc, TIFR, IIT, ...) இன்றைக்கும் இலவசமாக பயிற்சியளிப்பவர்தான் சத்யா. சென்னைப் பல்கலைக்கழகத்தின் கிண்டி வளாகத்திலுள்ள, அணுக்கரு இயற்பியல் துறையின் ஒரு வகுப்பறையில்தான் துவங்கியது சத்யாவின் பட்டறை. இவ்வகுப்புகள் துவங்கிய நாட்களில் ஞாயிற்றுக்கிழமை காலைவேளைகளில் மட்டும் நடந்து வந்தன. இலவச வகுப்பு என்பதால் அந்த ஆண்டுக்கான முதல் வகுப்பில் வகுப்பறை நிரம்பி வழியும், எப்படியும் சென்னை மற்றும் புறநகர் பகுதியைச் சேர்ந்த மாணவர்கள் என 60க்கும் மேற்பட்ட மாணவர்கள் இருப்பார்கள். ஆனால், அப்படியே தேய்ந்து ஆண்டு இறுதியில் சராசரியாக 20 மாணவர்கள் எஞ்சியிருப்பார்கள்.

தொலைவிலிருந்து வரும் மாணவர்களுக்காக, ஞாயிற்றுக்கிழமை மாலை வரை வகுப்புகளை நீட்டித்தார்.
அதில் ஒருவர் வேலூருக்கருகிலுள்ள போலூர் எனும் கிராமத்திலிருந்து அதிகாலை நான்கு மணிக்குக் கிளம்பி 9.30 மணிக்கு வகுப்புக்கு வந்து சேர்ந்து பின்னர் மாலை வகுப்பு முடிந்து பின்னர் நள்ளிரவு நேரத்திற்கு வீட்டிற்கு செல்பவரும் உண்டு. அவரது பயண உழைப்பை அறிந்து கொள்வதற்காக அவருடனேயே ஒருமுறை பயணம் செய்தும் பார்த்தார் சத்யா. அடுத்தடுத்த ஆண்டுகளில், வகுப்பின் இறுதிவரை தொடரும் மாணவர்கள் பெரும்பாலும் புறநகர் மற்றும் கிராமப் புற மாணவர்களாகவேயிருப்பதால், வாரத்தில் இரண்டு நாட்கள் என சனி மற்றும் ஞாயிறு என்று நீட்டித்தார், ஒரு சில மாணவர்களை ஒரு இரவுக்குத் தமது வீட்டிலேயே தங்கிக்கொள்ளவும் உதவிகள் செய்தார்.

இதே போல், நாகர்கோயில் அருகில் ஒரு கிராமத்திலிருந்து வந்த மாணவி முதுகலைப் படிப்பிற்கே போராடித்தான் சேர்ந்திருந்தார். சத்யாவின் வகுப்பிற்குப் பின்னர், இந்திரா காந்தி அணுஆராய்ச்சி மையத்தில் ஒரு விஞ்ஞானியாகச் சேருவதற்கு தேர்ச்சி பெற்றுப் பணியாற்றிவருவதோடல்லாமல், பின்னர் அவரது வாழ்க்கைத் துணையாகவும் இப்போது வகுப்பறைத் துணையாகவும் பங்கெடுத்துக் கொண்டிருக்கிறார்.

வருடத்தில் இரண்டு முறை நடக்கும் CSIR நுழைவுத் தேர்வுகளின் போது சில மாணவர்கள் அவரோடு அவரது வீட்டிலேயே திருவான்மியூரில் தங்கிவிடுவதும் உண்டு. தேர்வு முடியும் வரை அவர்களோடு சேர்ந்து நள்ளிரவு வரை கண்விழிப்பார் சத்யா. பொதுவாக கல்பாக்கத்தில் தனக்காக வழங்கப்பட்ட தனி வீடொன்று இருந்தாலும், தேர்வு சமயங்களில் மாணவர்களுக்காக தினமும் மாலை சென்னையிலிருக்கும் அவரது வீட்டிற்கு வந்துவிடுவார். தனது தாய், தங்கை என மூன்று பேர் மட்டுமே வாழக்கூடிய ஒரு சாதாராண ஓட்டுவீடுதான் சத்யாவினுடையது, ஆனாலும், மாணவர்களுக்காக ஒரு வாரம் அந்தக் குடும்பமே கண்விழிக்கும், உணவு சமைக்கும்.

முதலில், ஞாயிற்றுக்கிழமை காலைகளில் தொடங்கி, பின்னர், ஞாயிறு மற்றும் சனி பகல் வேலை முழுவதுமாக எனப் பரிணமித்து பத்தாண்டுகளைக் கடந்துவிட்டது சத்யாவின் பட்டறை. மேலும், முதலில், தனது வகுப்பறையைப் பயன்படுத்திக் கொள்ள அனுமதி வழங்கிய சென்னைப் பல்கலைக்கழகம், பின்னர், இவ்வகுப்பின் வெற்றியையும், மாணவர்களினது ஆர்வத்தையும் கண்டு, பல இருக்கை வசதிகளும், பலகை வசதிகளையும் உள்ளடக்கிய கருத்தரங்குகளுக்கான தனது சிறப்பு அறையைப் பயன்படுத்திக்கொள்ள அனுமதியளித்தது. இன்றைக்கும் இவ்வகுப்புகள் இலவசமாகவே சிறப்பாகச் செயல்பட்டு வருகிறது.

இயற்பியலுக்கான ஒவ்வொரு CSIR தேர்விலும், தமிழகத்தின் மொத்த தேர்ச்சி எண்ணிக்கை ஒற்றை இலக்கத்திலேயே இருந்தாலும், அதில் இருவர் கண்டிப்பாக சத்யாவினது வகுப்பு மாணவராயிருப்பர். CSIR தேர்வுகளில் எல்லா தேர்வுகளிலும் அவரது வகுப்பிலிருந்து குறைந்தது ஐந்திலிருந்து பத்து மாணவரைத் தேர்ச்சி பெறவைப்பதையே அவர் அவரது வகுப்பினது வெற்றிக்கான அளவுகோலாக வைத்திருந்தாலும், அவரது பட்டறையின் துவக்க காலங்களில் அவரிடம் பயின்றவர்களுள் சிலர் இன்றைக்கு,IIT, மற்றும் சிங்கப்பூர் தேசிய பல்கலைக்கழகம் போன்றவற்றில் துணைப் பேராசிரியாரகவும், பலர், இந்திய அரசின் ஆய்வுக்கூடங்களில் விஞ்ஞானிகளாகவும், பல தேசிய ஆய்வுக்கூடங்களில் ஆய்வு மாணவர்களாகவும் பணி புரிகின்றனர்.

இன்னும் பத்தாண்டுகளில் தமிழகத்திலிருந்து இந்தியாவின் பல ஆய்வு நிறுவனங்களிலும் ஆராய்ச்சிக் கூடங்களிலும் இணையும் பலர் சத்யாவின் பட்டறையிலிருந்து வந்தவராகயிருப்பர் என்று என்னால் உறுதியாகக் கூறமுடியும்

மாணவருக்கும், ஆசிரியருக்குமான இடைவெளி கரைந்து நண்பர்கள் குழுவொன்று அறிவியல் விவாதிப்பது போன்ற சூழலை வகுப்பறையில் கொண்டுவருவார். இதுவே அவரின் பலம் அல்லது அந்த வகுப்பறையின் பலம். இவரது மாணவர்கள் பெரும்பாலும், முதுகலை இயற்பியல் படிப்பவர்களே. இவ்விடுகையப் படித்து உங்கள் நண்பர்களுக்குப் பரிந்துரைக்கலாம்.

சத்யா என்று உரிமையோடும் நட்போடும் அழைத்தாலும், அவர் இப்போது ஒரு மத்திய பல்கலைக்கழத்தில் மூத்த விரிவுரையாளராகப் பணிபுரிகிறார். ஆம் மாணவர்களுடன் நெருங்கிப் பழகுவதற்காகவே கல்பாக்கத்தில் பணியை விட்டுவிட்டு பாண்டிச்சேரி மத்திய பல்கலைக்கழகத்தில் சேர்ந்தார்.

புகைப்படம்: மாணவர்களுடன் உரையாடிக் கொண்டிருக்கும் சத்யா.
(புகைப்படம் outlook அங்கில இதழில் திரு ஆனந்த் அவர்களால் வகுப்பரையிலேயே நேர்முகம் காணப்பட்டு வெளிவந்த கட்டுரையிலிருந்து எடுக்கப் பட்டது.)
அவரது வகுப்பு குறித்து டிசம்பர் 2004ல் "outlook" இதழில் வெளிவந்த கட்டுரையின் சுட்டி கீழே.

http://www.outlookindia.com/article.aspx?226027

சத்யாவைப் பற்றிப் பேச இவ்வொரு இடுகை போதாது. ஒரு ஞாயிற்றுக்கிழமைக் காலையில் உண்டுவிட்டு வெட்டிக்கதை பேசும்போதுதான் சத்யாவைப்பற்றிக் குறிப்பிட்டார் எங்களுக்கு முந்தைய ஆண்டு மாணவரான நண்பர் குருவெங்கட். அன்றிலிருந்து இன்றுவரை ஞாயிற்றுகிழமைகளில் சென்னையிலிருந்தால் சத்யாவின் பட்டறைக்குச் செல்வது என்பது எழுதப்படாத விதியாகவே இருக்கிறது. ஆனால், எல்லா வகுப்பறையிலும் கடைசிபெஞ்ச் மாணவனாகவேயிருந்ததாலோ என்னவோ இந்தப் பட்டறையிலும் கடைசிபெஞ்ச்தான்.

அவரிடம் பயின்ற மாணவரும் எனது நெருங்கிய தோழியுமான ஒருவர் சத்யாவின் தீவிர மாணவியாகி கடும் பயிற்சிக்குப் பின்னர் CSIR தேர்வில் வெற்றிபெற்றுவிட்டு பின்னர் அவரிடம் முடிவைத் தெரிவிக்கும் போது இருவருமே கண்ணீர் மல்க நின்றகாட்சி இன்றும் பசுமையாக இருக்கிறது.

இப்படியான ஒரு உணர்வுப் பூர்வமான தருணத்தை என்னால் உங்களுக்கு வழங்கமுடியாமல் போயிருக்கலாம் சத்யா, ஆனால், ஒவ்வொரு மனிதரது வாழ்க்கையும் அவரவர்க்கு ஒரு கலைக்கூடமெனில், எனது கலைக்கூடத்தின் சுவர்கள் நீங்கள் சத்யா....

ஆங்கோர் மாணவருக்கு கல்வி உதவி செய்தல்

kaiyedu@gmail.com (கையேடு) — Thu, 16 Jul 2009 07:36:00 +0000

மின்னஞ்சலில் வந்தது வலையுலக சமூக ஆர்வலர்களுக்காக இங்கே பகிர்கிறேன்.

************************************************************************************
நண்பர்கள் அனைவருக்கும் வணக்கம்,

நம்மில் பெரும்பாலானோருக்கு நம் தொப்புள் கொடி உறவுகளான ஈழத்தமிழர்களுக்கு ஏதேனும் வகையில் உதவ வேண்டுமென்ற எண்ணம் இருக்கிறது. அப்படியொரு வாய்ப்பு நமக்குக் கிடைத்துள்ளது. கும்மிடிப்பூண்டி ஏதிலிகள் முகாமிலிருக்கும் ஈழத்தமிழ் மாணவர்களுக்குக் கல்வியளிக்கும் ஒரு வாய்ப்பு. ஏறத்தாழ 150க்கும் மேற்பட்ட மாணவர்கள் பள்ளிப்படிப்பை முடித்துவிட்டு மேற்படிப்புக்காக உதவி வேண்டி நிற்கின்றனர். நம்மைப்போலவே ஈழச்சொந்தங்களுக்கு உதவும் நோக்கம் கொண்ட சிலர் (நடிகர் சூர்யா, சத்யராஜ், இயக்குனர் மணிவண்ணன் போன்றோர்) அங்குள்ள சில மாணவர்களைத் தத்தெடுத்து அவர்களுக்கான கல்வி மற்றும் அத்தியாவசியச் செலவுகளை ஏற்றுக் கொண்டுள்ளனர்.

இது நமக்கான பணியாகவும் நம் கண் முன்னே நிற்கிறது. எனவே நமது சமூகப்பணியின் தொடர்ச்சியாக நாம் இப்பணியினை ஏற்று ஒரிரு மாணவர்களைத் தேர்ந்தெடுத்து அவர்களது மேற்படிப்புக்கு உதவலாமே என்ற எண்ணம் தோன்றியது. நம் ஆர்குட் தமிழ்க் குழுமமான தமிழக அரசியல் குழுமம்( TNP) நண்பர்கள் சிலருடன் விவாதித்தபோது இதை மிகவும் வரவேற்றனர். இது தொடர்பாக த.நா.அரசியல் குழும நிறுவனர் நண்பர் கோபாலனைத் தொடர்பு கொண்டு கேட்டபொழுது அவருக்கும் இத்தகைய எண்ணம் இருப்பதாகக் கூறினர். மேலும், இதன் ஆரம்பமாக ஒரு மாணவன் மற்றும் ஒரு மாணவியைத் தேர்வு செய்து அவர்களது மேற்படிப்புக்கு உதவலாம் என்றும் யோசனை கூறியுள்ளார். அவ்வாறு நாம் உதவும் பட்சத்தில் ஒரு மாணவருக்கு வருடாந்திர கல்விக்கட்டணம், தேர்வுக்கட்டணம் மற்றும் இதர கட்டணங்கள் மற்றும் செலவுகளை நாம் ஏற்றுக்கொள்ள வேண்டுமென்பதோடு அவர்கள் தங்கள் படிப்பை முடிக்கும்வரைத் தொடர்ந்து உதவவெண்டும். சுருக்கமாகக் கூறவேண்டுமானால் நாம் தத்தெடுத்தவுடனேயே அவர்கள் “நமது பிள்ளைகள்” என்றாகிவிடுகின்றனர். எனவே, அவர்களுக்கு முழு உதவியும் செய்ய வேண்டும்.

ஈழத்திற்காக களப்பணியில் நம் தோழர்கள் சிலர் ஈடுபட்டிருக்கையில் கும்மிடிபூண்டி ஏதிலிகள் குடியிருப்பில் , இந்த ஆண்டில் மேல் நிலை பள்ளிப்படிப்பை முடித்தவர்கள் தங்களது மேற்ப்படிப்பை தொடர முடியாத நிலையில்( 150க்கும் மேற்பட்ட மாணவர்கள் ) இருப்பது தெரியவந்தது ., (கடந்த கல்வியாண்டுகளில் பள்ளிப்படிப்பை முடித்தவர்கள் நிறைய பேர் , படிப்பை தொடர முடியாத காரணத்தினால், கட்டட வேலைக்கும்,பெயிண்ட்ர் இன்னும் பலவகை கூலிவேலை பார்த்துக்கொண்டிருக்கின்றனர் ..,) அவர்களுக்கு எவ்வகையிலாவது உதவலாம் என்று பல தொண்டு நிறுவங்களை தொடர்பு கொண்டு அவர்களுக்கான உதவிகள் கோரப்பட்டுள்ளது .,

நாம் தேர்ந்தெடுத்த பிள்ளைகளின் விபரம்

புவனேசுவரி த/பெ சுப்ரமணியம் , வயது 17 , கும்மிடிபூண்டி.
BE கணினி அறிவியல்
மவுண்ட் சியோன் பொறியியல் கல்லூரி
திருமயம், புதுக்கோட்டை மாவட்டம்...

நிஜந்தன் த/பெ ரவி, வயது 18 , கும்மிடிபூண்டி
Bsc Bio tech
ஜெயா கலைக் கல்லூரி
திருநின்றவூர்
சென்னை.

இவர்களுக்கான கல்வி கட்டணம்
புவனேசுவரி
கல்லூரி ஆண்டு கட்டணம் ரூ 59,000/=
விடுதி கட்டணம் ரூ 32,000/=
மற்றும் இதர செலவுகள் அடிப்படை தேவைக்கேற்ப....

நிஜந்தன்
கல்லூரி ஆண்டு கட்டணம் ரூ 35,000/=
விடுதி கட்டணம் ரூ 32,000/=
மற்றும் இதர செலவுகள் அடிப்படை தேவைக்கேற்ப....
குறைந்தது ஆண்டுக்கு 1.5 லட்சம் தேவைப்படுகிறது. நான்கு ஆண்டுகள் என்றால் 6 லட்சம் ரூபாய். பெரியதொகைதான். ஆனால் நம்மில் பலர் ஒன்றாய் இணைந்தால் இது அவரவர் பங்குக்கு சிறு தொகையாகவே வரும். நாம் உறுதியாக நான்கு வருடமும் தொடர்ந்து செய்ய வேண்டும். இவ்வுதவியை தமிழக அரசியல் குழுமத்தின் மூலம் செய்யலாம் என்று முடிவெடுத்திருக்கிறோம்.

அதை ஒரு அரசு சாராத் தன்னார்வத் தொண்டு நிறுவனம் ஒன்றினைத் தொடங்கி அதன் மூலம் இது போன்ற உதவிகளைச் செய்யலாம் என்று எண்ணுகிறோம். அதைத் தொடங்க சில வரைமுறைகள் இருக்கின்றன. அவற்றுக்கு சிறிது கால அவகாசம் எடுக்கும்.

அதற்கு முன் கல்லூரிகள் திறக்க இன்னும் சிறிது நாட்களே இருப்பதால் தமிழக அரசியல் குழும நிர்வாகியான சக்திவேல் அவர்களின்( http://www.orkut.co.in/Main#Profile.aspx?uid=898104197585368552 ) வங்கிக் கணக்கு மூலம் முதலாவது தவணை உதவியைப் பெறலாம் என்று எண்ணுகிறோம். அவரது ஐசிஐசிஐ வங்கிக் கணக்கு விபரம் கீழே:

C Sakthivel
ICICI account no: 620401064769
Branch: Contonment Branch, Trichy

SWIFT CODE: ICICINBB

Bank code: 6204

மேலும் வரைவோலை, மற்றும் பணப்பட்டுவாடா அனுப்புபவர்கள் நண்பர் தயாளனின் விலாசத்திற்கு "C.Sakthivel" என்ற பெயரிலேயே அனுப்பலாம். அவரது விலாசம் கீழே

D. Dhayalan (தொடர்புக்கு : 9841150700)
B/GF, Kasi Arcade Annex-1
32/1, VOC Street
Kaikan Kuppam (Near Chennai Medical Center)
Valasaravakkam - Post
Chennai - 600087

தங்கள் மூலம் ஈழத்துச் சிறார்களின் கல்வி விளக்கேற்ற ஒரு உதவி அது சிறு துளியாய் இருந்தாலும், அவர்களுக்குப் பேருதவியாய் இருக்கும் என்று எதிர்பார்க்கிறோம்.

குறிப்பு:

கும்மிடிப் பூண்டி ஏதிலி முகாமில் இது போன்ற பலர் தங்கள் மேற்கல்விக் கனவுகளோடு, மண் சுமந்து கொண்டும், கலவை கலந்து கொண்டுமிருக்கிறார்கள். தங்களிடம் வைக்கும் வேண்டுகோள் இது தான். தங்களால் ஒரு மாணவனுக்கோ, அல்லது மாணவிக்கோ அவர்களது மேற்கல்விக்கான செலவை ஏற்றுக் கொள்ளும் வசதியும், பெரிய மனதும் இருந்தால் தாங்கள் கும்மிடிப்பூண்டி ஏதிலி முகாமைத் தொடர்பு கொள்ளலாம். என்னைத் தாங்கள் மின்னஞ்சலில் தொடர்பு கொண்டால் அதன் முகவரியும், தொலைபேசி எண்ணும் வாங்கித் தருகிறேன்.

"அன்னச்சத்திரம் ஆயிரம் கட்டல்
ஆலயம் பதினாயிரம் நாட்டல்
இன்ன யாவினும் புண்ணியங்கோடியாம்
ஏழை ஒருவனுக்கெழுத்தறிவித்தல்"

என்பார்கள். அதனைச் செயல் படுத்த ஒரு வாய்ப்பு நமக்குக் கிடைத்திருக்கிறது.
உதவி உயருவோம்..!!!!!

எதிர்பார்ப்பு கலந்த நன்றியுடன்

தமிழக அரசியல் குழுமம் சார்பாக

த.சுரேஷ்

பின் குறிப்பு:
இதைத் தங்கள் தோழர்களோடு பகிர்ந்து கொள்ளுங்கள்

இதைப் பற்றிய விவாதத்தினை காண http://www.orkut.com/Main#CommMsgs.aspx?cmm=7222740&tid=5357422439875434097&start=1
--
C.Sakthivel ( தொடர்புக்கு: 9843283778)
Research Scholar
School of Chemistry
Bharathidasan University
Tiruchirappalli-24, India
E-mail: skvchem@yahoo.com , skvchem@gmail.com

*************************************************************************************

ஈடுபட்டுள்ளோரின் முழு விபரமும் இங்கே உள்ளது. அவர்களைத் தொடர்பு கொண்டு பின் ஆவன செய்யலாம்.

நன்றி

எப்போதும் வாழும் எசக்கி்கள் - உரையாடல் சிறுகதைப் போட்டிக்கு

kaiyedu@gmail.com (கையேடு) — Fri, 26 Jun 2009 14:43:00 +0000

கால்களை மாற்றிப் போட்டு "தப்பு"ல தனக்கு தெரிஞ்ச தாளத்தை வாசித்துக் கொண்டிருந்தான் பத்து வயசு மாரி. அவனுக்கெதிரே கண்களில் நீர்முட்ட அமர்ந்திருந்தார் குருட்டுத் தாத்தா.

குருடு என்றால் முழுவதும் குருடுயில்ல பார்வை சற்று மங்களாகத் தெரியும் அவ்வளவுதான், அதுவும் இப்பதான் ஒரு அஞ்சாறு வருசமா. தலை லேசாக ஆடிக்கொண்டிருந்தது, கொஞ்சம் எட்டியிருந்து பார்ப்பவருக்கு அவர் தாளத்துக்கு தலையாட்டுவது போல தெரியும், ஆனால், கிட்டத்துல வந்தாதான் தலை எப்போதுமே லேசான ஆட்டத்தோடு இருப்பது தெரியும். உடலெங்கும் வாழ்வின் வரிகளாக சுருக்கங்கள், எப்படியும் தொண்ணூறு வயசிருக்கும். பார்வைதான் மங்கலே தவிர மற்றபடி நடை, உடையுடன் தான் இருப்பார்.

திடிரென மாரி, பறையை அடித்துக் கொண்டே எழுந்து லேசாக ஆட ஆரம்பித்தான். கிழவனுக்கு உடனே எசக்கியின் நியாபகம் வர கண்ணீர் முட்டிக்கொண்டு வந்தது.

"அப்படிப்போடுறா என் சிங்கக் குட்டி" என்று எசக்கி வாசிக்கும் போது அருகில் இருந்து பார்த்தது நினைவு வந்தது.

உறவுமுறையில் தாத்தா இல்லாவிட்டாலும் எதிர்க் குடிசையில் இருந்ததால, ரொம்பவும் நெருக்கமாகிவிட்டார் குருட்டுத் தாத்தா. ஊருக்குதான் அவர் குருட்டுத் தாத்தா, ஆனால் எசக்கிக்கு மட்டும் இவர் வாத்தித் தாத்தா. ஆம் பத்து வயசிருக்கும் போது குருட்டுத் தாத்தாவின் வாசிப்புக்கு ஆடத்துவங்கியவன் எசக்கி, அப்படியே அவருடைய சிஷ்யப்பிள்ளையாகிவிட்டான். அவரது முதல் அபிமான மாணவன், இரசிகன் எல்லாம் எசக்கிதான். அன்னிலிருந்து தாத்தாவோட தப்பை சூடேத்தறதுக்கு வைக்கோலை கொளுத்தறதுலேருந்து, ஊர்ல செத்துப் போன மாட்டுலேருந்து தோல் உரிக்கிறவரைக்கும் எல்லாத்துக்கும் எசக்கிதான் துணை தாத்தாவுக்கு.

குருட்டுத்தாத்தாவுக்கு பறை வாசிப்பதில் கொஞ்சம் அதிகப்படியான திறமையும் பெருமையும் உண்டு. அதுவே அவரோட தனிமைக்கும் காரணமாயிருச்சு. வெறும் மூணு தெருவுள்ள அந்த கிராமத்துல ரெண்டு தெரு தள்ளியிருந்த காலனிலதான் இருந்தார்கள் தாத்தாவும் எசக்கியும்.

வாலிப வயசுல உச்சிப் பொழுதுகூட தெக்கெயிருக்குற சுடுகாட்டுலதான் தாத்தா அதிகமா வாசிச்சுக்கிட்டேயிருப்பார். அவரு அங்க வாசிக்கிறார்னா அன்னிக்கு அவரோட மரியாதைக்கு சோதனை வந்து, தோத்துப்போன கோபத்துல இருக்கார்னு அர்த்தம். இவர் என்னதான் திணவோட காரியஞ்செஞ்சாலும், அதிக நேரம் சுடுகாட்டுலதான் செலவழிக்க வேண்டியிருந்தது. அவரோட கோபமும் தோல்வியும் காலப்போக்கில அவர தனியாளாவே விட்டிருச்சு .

எசக்கிக்குத் தன்னோட கலைய மட்டும் சொல்லிக் கொடுக்காம, அதுமேல அவருக்கிருந்த மரியாதையையும், பெருமிதத்தையும் சேத்து சொல்லிக் கொடுத்துட்டார். அவர் சொல்லி கொடுத்த மரியாதைதான் எசக்கிக்கும் வாழ்க்கையை போராட்டமாக்கிருச்சு. குருட்டுத் தாத்தா அளவுக்கு அவனால செயிச்சு வரமுடியலன்னுதான் சொல்லனும். தினம் அவனோட கலைக்கும், மரியாதைக்கும் ஏதாவது சோதனை வச்சிகிட்டே இருக்கும் அந்த கிராமம்.பொதுவா கிராமத்துக்கும் வடக்கெயிருக்கும் குடியானச் சுடுகாடும் தெக்கெயிருக்கும் காலனிகாரங்களுக்கான சுடுகாடும்தான் எசக்கி அதிகமா தன்னோட வாசிப்பைக் காட்டுற எடம்.

தாத்தா அளவுக்கு நெஞ்சுரம் இல்லாததாலோ, அல்லது குடும்பச்சுமையோ தெரியாது, எசக்கிக்கும் சந்தோசம் துக்கம்னு இந்த ரெண்டுக்குமிடையே தான் தேர்வு செய்ய முடிஞ்சிது.

என்னதான் உரிமையா எல்லா வேலையும் செஞ்சு குடுத்தாலும், எவ்ளோ பாசம் வச்சிருந்தாலும், தன்னோட ஆண்டையோட பொண்ணு கல்யாணத்துல "நீ என்னடா மொதோ பந்திக்கே வந்துட்ட" ன்ற ஒரு கேள்வி போதும், இவன் சுருங்கிப் போயி அன்னிக்கு ராத்திரி பூராவும் தெக்கேதான் கெடப்பான். வருத்தம் தீர்ற வரைக்கும் வாசிச்சுத் தீத்துடுவான்.

என்னதான் இவனோட திறமைக்காக வேலை குடுத்தாலும், வேலை முடிஞ்சவுடனே கூலிய கொறச்சு குடுக்கறுதுக்காகவே
" **** வேலையே அரை வேலதான்னு" காலங்காலமா சொல்லிகிட்டே வர்ற ஒரு வார்த்தை போதும் அன்னிக்கு இராத்திரி முழுக்க தெக்கதான் இருப்பான்.

இப்படி பெரும்பாலும், தெக்கயேதான் வாசிச்சுகிட்டிருப்பான். அப்பொவெல்லாம் மாரிதான் அடுத்த நாள் போயி எழுப்பிகிட்டு வருவான். பெரும்பாலும் தாத்தா கோவத்துல வாசிச்ச இடத்துல எசக்கியால சோகமாதான் வாசிக்க முடிஞ்சுது. தாத்தாவுக்கும் இது தெரியும், அதனால தெக்கெயிருந்து சத்தம் கேட்டாலே குடிசைல இருந்த படியே மனசு கணத்து போயி உக்காந்துருப்பார்.

ரொம்ப விவரம் தெரியாத வயசுல சின்ன சின்ன விசயத்துக்கெல்லாம் சந்தோசப்பட்டு வடக்க இருக்க குடியானச் சுடுகாட்டுக்குப் பக்கத்துல இருக்கற அரச மரத்துல உக்காந்து வாசிச்சுகிட்டிருப்பான், தாத்தாவும் அவன் சந்தோசத்துல வாசிச்சா வீட்டுலயே ஒரு புன்னகையோட உக்காந்து ரசிச்சிகிட்டிருப்பாரு. ஆனா விவரம் தெரிஞ்சதுக்கப்புறம் அவன் வடக்க வாசிச்சு வருசக்கணக்காச்சு.

ரொம்ப வருசம் கழிச்சு முந்தாநேத்து சாயங்காலம் வடக்கேருந்து எசக்கி வாசிச்ச சத்தம் கேட்டவுடனேயே தாத்தாவுக்கு இங்க குடிசைல இருப்பு கொள்ளல. எப்ப அவன் வீடு வந்து சேருவான் விவரம் கேக்கலாம்னு காத்துகிட்டிருந்தார். ஆனா அன்னிக்குன்னு அவன் சீக்கிரம் வர்ற வழியக் காணும்.

அடுத்த நாள் எசக்கியோட குடிசைல ஒரே கலேபரம், அழுகை, கூச்சல். ஒரு வழியா தட்டுத்தடுமாறி வெளியே வந்த தாத்தா ஒரு கணம் அதிர்ந்து போயிட்டாரு. குடியான தெருக் கோடில இருந்த வீட்டுப் பொண்ணும் எசக்கியும் முந்தாநேத்து ராத்திரி டவுனுக்குப் போயி புது வாழ்க்கை தொடங்கலாம்னு இருந்தாங்கலாம். அப்படி போன எசக்கிய அந்தப் பொண்ணோட சொந்தங்கள் எல்லாம் துண்டு துண்டா திருப்பி எடுத்து வந்து காலனில போட்டுட்டானுங்கன்னு விபரம் சொன்னான், பக்கத்து வீட்டுப் பையன்.

"சரி வா தாத்தா வீட்டுக்கு போகலாம்"னு மாரிசொன்னதும் கிளம்பினார் தாத்தா. மாமன் எதுக்காக செத்துப்போனான்னு கூட விபரம் புரியாமல், கைல இருந்த எசக்கியோட "தப்புல" தட்டிகிட்டே தாத்தாவோட நடந்து கொண்டிருந்தான் மாரி. எரிஞ்சிகிட்டிருந்த எசக்கியின் உடலை திரும்பி பாத்துக்கிட்டே, இனி எல்லா குடியானச் சாவுக்கும் சந்தோசமா வாசிக்கச் சொல்லிக்குடுக்கனும் மாரிக்குன்னு வெம்மிகிட்டே நடந்தார் தாத்தா.

சில நேரங்களில் சில முகங்கள்

kaiyedu@gmail.com (கையேடு) — Mon, 22 Jun 2009 16:10:00 +0000

மறத்தல், நினைத்தல், மறந்தது போல் நடித்தல், பின் மீண்டும் நினைத்தல், மறத்தல்...... என்பதாகவே நகர்ந்துகொண்டிருக்கிறது வாழ்வு.

பல சமயங்களில் இவையெல்லாம் மறந்து போனால் என்ன? என்று தோன்றுவதுண்டு. இவற்றை எனது மூளைச் செல்களின் இடுக்குகளில் துழாவி எடுத்து வெளியே எறிய முடிந்தால் எவ்வளவு நன்றாகயிருக்கும் என்று கூடத் தோன்றுவதுண்டு.

வகைதொகையில்லாமல் ஒன்று கூடி பித்து நிலைக்கு விரட்டிவிடுவதுண்டு சில முகங்கள்.

அவர்கள் இப்போது எப்படியிருப்பார்கள்? என்னவாகியிருக்கும் அவர்களுக்கு?
என திடீரென்று மின்னலாய் வெட்டிச் செல்லும் சில நினைவில் தங்கிய முகங்கள் பற்றிய ஒரு மீள்பார்வையே இவ்விடுகை.

**********************************************************************************************

மழையினை இரசிக்காத நாளும், ஆளுமுண்டா? ஆனால், அப்படியொரு மழைச்சாரலில் திடீரென தோன்றும் சில கேள்விகள் இவை "அவர்கள் இப்போது எப்படி இருப்பார்கள்? என்னவாகியிருக்கும் அவர்களுக்கு? "

சர்தார் சரோவர் அணைக்கட்டின் உயரத்தினை உயர்த்தி தனது பெருமையை உயர்த்தத் துடித்துக்கொண்டிருந்தது அரசு. அதன் விளைவாக அங்கே வாழ்ந்து கொண்டிருந்த ஆதிவாசிகள் இடம்பெயற நிர்பந்திக்கப்பட்டனர், வழமைபோல், சரியான மாற்று நிலங்கள் வழங்காமை, மற்றும் போதிய பதிலீடு செய்யாமை என அரசின் எல்லா குப்பைச் செயல்பாடுகளும் இங்கேயும் உண்டு. மேலும், அதிகமான ஊழல் நடந்துள்ளதாக உலக வங்கி பின்வாங்கிக் கொண்ட பெருமைமிகு செயல்பாடுகளும் இவ்வணைக்கட்டுத் திட்டத்திலுண்டு.

புகைப்படம்: http://www.narmada.org/images/satyagraha2003/sat8.jpg

"Narmada Bachao Andolan" மற்றும் மேதா பட்கர் உண்ணாநிலை ஆகியவை அநேகமாகப் பலருக்கும் நினைவிருக்கும். ஆனால், அதைப்பற்றி ஒன்றும் பேசப் போவதில்லை. அதுகுறித்த விரிவான கட்டுரையொன்று இங்கே (நர்மதா தரும் செய்தி - http://rozavasanth.blogspot.com/2006/06/blog-post_04.html) இருக்கிறது. இது குறித்து மேலதிகத் தகவல்கள், தற்போதைய நிலவரம் மற்றும் புகைப்படங்களுக்கு இங்கே செல்லவும்: http://www.narmada.org/

இவ்வணைப் பிரச்சனையை முன்வைத்து "Drowned out" என்ற ஆவணப்படமொன்று வெளிவந்தது. அதிலே புகாரியா மற்றும் அவரது மனைவி என்றொரு சிறு அதிவாசிக் குடும்பம் வரும். திடீரென மழை பொழியும் நாட்களில் அவர்களைப் பற்றிய நினைவு வரும். அப்போதே அவர்கள் வீட்டு வாசல்வரை தண்ணீர் வந்திருந்தது, "அவர்கள் இப்போது எப்படி இருப்பார்கள்? என்னவாகியிருக்கும் அவர்களுக்கு? " கீழே அவ்வாவணப்படத்தின் சிறு பகுதியொன்று இருக்கிறது.

அத்திரைப்படத்தில் வரும் ஆதிவாசிகள் பலரும் பயன்படுத்தும் வார்த்தைகள் "அவர்கள் " - "நாங்கள்" ... எவ்வளவு அந்நியப்பட்டிருக்கிறோம் வல்லரசு இந்தியாவின் நவீனப் பிரஜைகள், மண்ணின் மைந்தர்களிடமிருந்து.. திரைப்படத்தின் இறுதிக்காட்சிகளில் புகாரியின் மனைவி "அவர்கள் நாங்கள் சாக வேண்டுமென்று நினைக்கிறார்கள்" - என்று குறிப்பிட்டு ஒரு விநாடி நிறுத்துவார், விழிகளிலிருந்து ஒரேயொரு சொட்டுக் கண்ணிர் விழும். அவ்வொருவிநாடி மொளனமும் ஒரு சொட்டுக் கண்ணீரும் ஏற்படுத்தும் வலி ..........

*************************************************************************************************

அடுத்ததாக கீழேயுள்ள ஆவணப்படம், ஆனந்த் பட்வர்தன் அவர்களால் எடுக்கப்பட்ட மற்றொரு ஆவணப்படம் "War and Peace". தலா 50 நிமிடங்கள் ஓடக்கூடிய அளவில் இரண்டு குறுந்தகடுகளாக கிடைத்தது. இப்படத்திலும் அரசியல் தளத்தில் உரையாடப பல இருந்தாலும், அதுபற்றி பேசப்போவதில்லை. கீழே கொடுக்கப்பட்ட சிறுபகுதியில் கூட அரசியல் உரையாடல் மட்டுமே இருக்கும், வேறு பகுதிகள் இணையத்தில் கிடைக்கவில்லை தற்போதைக்கு இதுதான் கிடைத்தது.

இவ்வாவணப் படத்திலும், பீகாரின் ஜடுகுடா மலைப்பகுதிகளில் இருக்கும் அதிவாசிகள் சமூகத்தினர் பற்றிய சில பகுதிகள் உண்டு. அங்கேயே பிறந்து வளர்ந்து, பின் மருத்துவம் பயின்ற மருத்துவர் மீண்டும் தம்மக்களிடமே சென்று அங்கே அவரது மக்களுக்கு யூரேனியத் தாதுக்களினால் ஏற்படும் கதிரியக்கக் பாதிப்புகளுக்கான சிகிச்சை அளித்து வந்திருக்கிறார். இறுதியில் அவருக்கும் புற்றுநோய் தாக்க, கண்கள் மட்டும் வெளித்தெரியும் படி ஒரு முகமூடியுடன் "உயிருக்காகப் போராடிக்கொண்டிருக்கிறேன்" என்று பேட்டி அளித்திருப்பார்.

"அவர் இப்போது எப்படி இருப்பார்? என்னவாகியிருக்கும் அவருக்கு? "

அங்கேயிருக்கும் மக்களும் தங்கள் உரையாடலில் பயன்படுத்தும் சில வார்த்தைகள் "அவர்கள்"-"நாங்கள்"... ஆம் அவர்களினது வடுக்களின் மீது ஏறிநின்றுதான் நாம் தினமும் மாலையில் மின்விளக்கையேற்றுகிறோம்/ ஏற்றப்போகிறோம் வல்லரசுக் கனவுகளோடு.

***********************************************************************************

இவ்விடுகையை எழுதிக்கொண்டிருக்கும் இதே வேளையில் மேற்கு வங்கத்தின் "லால்கார்க்"கில் சில முகங்கள் தயாராகிக்கொண்டிருக்கின்றன. மேலும் விபரங்களுக்கு http://sanhati.com/front-page/1083/

தமிழில்: இந்தியாவிடமிருந்து சுதந்திரம் வாங்கிய 50 கிராமங்கள்!
இங்கேயும்: http://www.thenaali.com/thenaali.aspx?A=349
புகைப்படம் 29/06/09 அன்று பிற்சேர்க்கையாகச் சேர்க்கப்பட்டது.
************************************************************************************

இதெல்லாவற்றுக்கும் மேல் பித்து நிலைக்கு் விரட்டும் முகங்கள் சிலவுண்டு.

சில மாதங்களுக்கு முன் பி.பி.சி தனது வலைத்தளத்தில், பதுங்கு குழிகளுக்குள்ளே இருந்து மருட்சியோடு வானை நோக்கும் ஈழத்துப் பள்ளிச் சிறுவர் சிறுமியர் சிலரினது புகைப்படத்தை வெளியிட்டது. குண்டடிபட்ட இறந்த உடல்களைவிட இக்குழந்தைகளின் மருட்சி ஏற்படுத்தும் பாதிப்பு அதிகமாகவேயிருக்கிறது. மேலேயுள்ள எல்லா முகங்களும் குற்றவுணர்ச்சியில் சிறுகச் செய்தாலும், இக்குழந்தைகளின் முகங்கள் என்கைகளில் இருக்கும் உறைந்து போன இரத்தக் கறையின் வாடையோடு வந்து போகிறது. என்ன செய்து கழுவுவது....????

************************************************************************************
மனிதனாக இப்பூமியில் வாழ்ந்து முடிப்பதற்குள் இன்னும், எத்தனை முகங்களையும், எத்தனை குற்றங்களையும் சுமக்க வேண்டியிருக்குமோ ......

தாம்புக் கயிறு

kaiyedu@gmail.com (கையேடு) — Fri, 19 Jun 2009 18:56:00 +0000

காற்றில் படபடத்துக் கொண்டிருந்தது சங்கரனின் கையிலிருந்த தினசரியின் பக்கங்கள். காலை வெயிலில் மொட்டைமாடியில் கையில் தினசரியும், அருகில் ஆவிபறக்கும் காபியும் சேராவிட்டால் அன்றைய தினம் முழுமையடையாது சங்கரனுக்கு.

"இந்தாங்க காபி" என்றாள் மனைவி. "என்னங்க போட்ருக்கு பேப்பர்ல" என்றாள். "ரொம்ம்ப.. முக்கியம், டிபன் ரெடியா? இன்னிக்கு சீக்கிரம் ஆபீஸ்போகணும்" என்றான். கழுத்தில் வழிந்த வியர்வையின் எரிச்சலை தனது புடவைத் தலைப்பால் துடைத்துக் கொண்டே கீழிறங்கிச் சென்றாள்.

ஆவிபறக்கும் காபியுடன் போட்டிபோடுமா செய்திகள் என்று அப்படியே தினசரியில் மேய்ந்து கொண்டிருந்தான். சூனா பானாக்களின் உலகப் பயணம், ராசி பலன், மணப்பந்தல், சினிமா விமர்சனம் என்று போய்க்கொண்டிருந்தது. கீழே, தன்னுடைய "டை"யைப் பிடித்து தொங்கிக் கொண்டே பள்ளிக்குச் செல்ல அழுதுகொண்டிருக்கும் எதிர்வீட்டுச் சிறுவன், உந்துருளியின் உள்ளே திணிக்கப்படுவதைப் பார்த்து ஒரு புன்முறுவலுடன் தினசரியைத் தொடர்ந்தான்.

ஆர்வம் குறைந்து மேலோட்டமாக மேய்ந்து கொண்டிருந்தவனை 8ஆவது பக்கத்தில் இருந்த அச்சிறிய பெட்டிச் செய்தி் கவர்ந்தது. அமெரிக்கா, ஐரோப்பா போன்ற மேற்குலக நாடுகளில் தயாராகும் சில மருந்துப் பொருட்களுக்கான முதல்கட்ட பரிசோதனையை, இந்திய மக்களின்மேல் பரிசோதித்துக்கொள்ள இந்தியா அனுமதி வழங்கியிருப்பதாகச் சொன்னது செய்தி. செய்தியைப் பற்றி முழுவிபரம் தெரியாவிட்டாலும், இச்செய்தி ஏற்படுத்திய அதிருப்தியால் வாசிப்பைப் பாதியில்விட்டு அருகிலுள்ள தரிசு நிலத்தை வெறித்துக்கொண்டிருந்தான்.

தரிசு நிலத்தில் சில செம்மறியாடுகளும், வெள்ளாடுகளும் மேய்ந்து கொண்டிருந்தன. அவை ஏதோவொன்றுக்கு கட்டுப்பட்டதுபோல் அந்த மேய்ச்சல் நிலத்துக்குளேயே மேய்ந்து கொண்டிருந்தன. அவ்வப்போது மேய்ந்து கொண்டே அந்நிலத்தைத் தாண்ட எத்தனிக்கும் போதெல்லாம் ஒரு குரல் அவற்றைத் தடுத்தது. ஒரேயொரு ஆட்டுக்குட்டி மட்டும் குரலை கவனியாதது போல அந்நிலத்தைத் தாண்ட முயன்றது. உடனே நான்குகால் பாய்ச்சலில் அருகில் வந்தன அந்த காவல் நாய்கள் இரண்டும். குலைநடுங்கிப் போன ஆட்டுக்குட்டி மந்தையுடன் கலந்தது.

நாய்களின் பாய்ச்சலில் இருந்த வேகமும், குரலும், ஒட்டுமொத்தமாக மந்தையையே நடுங்கச் செய்துவிட்டது. அங்கொன்றும் இங்கொன்றுமாக பயம் கலந்த "ம்மே"க்கள் முனகல்களாக வந்து கொண்டிருந்தன. மீண்டும் இப்படியொரு செயலைச் செய்ய யாருக்காவது திணவிருக்கா என்ற ரீதியில் மந்தையை நோக்கி ஒரு மிடுக்குப் பார்வை பார்த்தன நாய்கள். பின்னர் கழுத்துப்பட்டையின் அரிப்பை பின்கால்களால் சுகமாக சொறிந்து விட்டுக்கொண்டு தனது சகாவுடன் சேர்ந்து வலம் வந்துகொண்டிருந்தன காவல் நாய்கள்.

இதையெல்லாம் மரத்தடியில் மேய்ந்து கொண்டிருந்த மாடு ஒன்று பார்த்துக்கொண்டிருந்தது. இவ்வளவு நேரம் ஈ விரட்டுவதற்காகச் சிலிர்த்தக் காதுகள், இப்போது ஏதோ ஒரு உணர்வு அடிப்படையில் சிலிர்ப்பது போல ஒட்டு மொத்தமாகத் தலையோடு சேர்த்து வேகமாக ஆட்டியது. கழுத்து மணிச் சிணுங்க, அந்த ஆட்டுக் கூட்டத்தை நோக்கிச் சென்றது மாடு.

ஆடுகள் இந்த புதுவரவைப் பெரிதுபடுத்தாமல் அவை தன் மேய்ச்சலைக் கவனித்தன. கழுத்தின் கீழ் ஏற்பட்ட அரிப்பை நாக்கால் சொறிந்துவிட்டுக் கொண்டு பெச ஆரம்பித்தது மாடு. "ஓ ஆட்டு மந்தைகளே ! ஏனிப்படியிருக்கிறீர்கள், எங்கு வேண்டுமானாலும் மேய்வது உங்களுக்குள்ள உரிமை, அதைத் தடுப்பதற்கும், தண்டிப்பதற்க்கும் இந்த நாய்களுக்கு ஏது அதிகாரம்" என்று செருமியது.

இந்தச் செருமலுக்கு ஒன்றிரண்டு ஆடுகள் தலை நிமிர்த்திவிட்டு, இது ஏதோ விவகாரம் என்று சொல்லி சற்றுத்தொலைவில் சென்று மேய ஆரம்பித்தன. ஓரு சில ஆடுகள் லேசாகத் தன் மேய்ச்சலை நிறுத்திவிட்டு பின் தலையைக் கூடத் தூக்காமல் மேய ஆரம்பித்தன. ஒரு சில இளம் ஆடுகள் ஏதோ புதிய ஒளியைக் கண்டது போல் அந்த மாட்டினருகில் வந்தன. ஒரு சில ஆடுகள் ஏதோ நடக்கப் போகுது நல்லா வேடிக்கை பார்க்கலாம் என்ற நினைப்பில் அருகில் வந்தன.

தனது செருமலுக்குக் கிடைத்த இந்தக் குறைந்த அளவு அங்கீகாரத்துடன் பேச ஆரம்பிடித்தது, "நண்பர்களே ! எங்கு வேண்டுமானலும் மேய்வது உங்களது உரிமை, அதைத் தடுப்பதற்கு இந்த நாய்களுக்கு உரிமையில்லை" என்று மீண்டும் கூறியது. மேலும் உங்களுக்கு எது விருப்பமோ அதை உங்கள் விருப்பப்படி உண்ண அனுமதிக்க வேண்டும், அதை விடுத்து உங்களை இந்த நிலத்திற்குள் இந்த வட்டத்திற்குள் மேயவேண்டும் என்று தடுப்பது எந்த விதத்தில் நியாயம் என்று கழுத்தின் அரிப்பை நாவால் சொறிந்தபடியே பேசி முடித்தது.

உடனே ஒருசில ஆடுகள், "சரிண்ணே... நீங்க சொல்றதெல்லாம் நல்லாத்தான் இருக்கு, ஆனா யாரு கடிபடறது, வரப்புகிட்ட போனா குலை நடுங்கறா மாதிரியில்ல குலைக்குதுங்க. அதுக்குமேலே இந்த இடத்திலேயே நின்னு மேஞ்சுட்டுப் போவமே இப்ப என்னாதான் குறைஞ்சு போச்சு" என்றன.

"நீங்கெல்லாம் விவரம் தெரியாமல் இருக்கீங்க, நான் இதுவரைப் பல ஊருக்குப் போயிப் பல "கிடை"களைப் பார்த்திருக்கேன் தெரியுமா. இப்படியெல்லாம் உங்களை அடிமைபோல் வைத்திருக்கக்கூடாது . அதுமட்டுமா உங்களுடைய அடிப்படை உரிமைகளைக் காக்க, நமது சுற்றுப்புறத்தைக் காக்க இப்படிப் பல விசயங்களுக்குக் குரல் கொடுக்கப் பல குழுக்கள் இருக்கிறார்கள் தெரியுமா. இதெல்லாம் உங்களுக்கு எங்கே தெரியப் போவுது என்னைப் போல் நாலு இடங்களுக்குப் போயி நாலு பேருடன் பழகினாதானே தெரியும்" என்று தன் நீண்ட சொற்பொழிவை முடித்துவிட்டு மீண்டும் கழுத்தில் ஏற்பட்ட அரிப்பை நாக்கால் சரி செய்தது.

"அண்ணே நீங்க நாலு எடத்துக்குப் போயிட்டு வந்தவரு அதனால வெவரமா பேசறீங்க. எங்களுக்கு இந்த வயக்காட்டவுட்டா என்னா தெரியும் அதுவும் புதுசா இந்த நாய்கள் தொல்லை வேற, நாங்க இப்ப என்னதான் செய்யணும் அதையும் வெவரமா சொல்லுங்க."

"நீங்க இத்தனைப்பேர் இருக்கீங்க அதுகரெண்டே ரெண்டு நாய்தான் அதுங்களை உங்களாலே ஒன்னா நின்னு முட்ட முடியாது ? நீங்க எல்லோரும் சேர்ந்து நின்னோஅதுங்களால ஒன்னும் செய்ய முடியாது..." என்று முடிக்கும் முன்னரே அங்கு வேடிக்கைப் பார்க்க வந்த சில ஆடுகள் இது ஏதோ விவகரம் என்பதுபோல நழுவ ஆரம்பித்தன.

சரியென்று ஒரு சுபயோகக் கனத்தில் இரண்டு வெள்ளாடுகளும் இரண்டு செம்மறியாடுகளும் சிலிர்த்துக் கொண்டு பொறுப்பேற்றன. அதன்படி அவை தங்கள் கூட்டத்திடம் சென்று பல சொற்பொழிவுகள் ஆற்றி அனைவரும் ஒன்றுகூடி வரப்பைக் கடப்போம் என்று முடிவு செய்தன. அப்படியே , வெள்ளாடுகள் ஒரு குழுவாகவும் செம்மறியாடுகள் ஒரு குழுவாகவும் வரப்பை நோக்கி முன்னேறின. ஆனால் வரப்பருகே சென்றவுடன் எழுந்த குரலில் பின்னாலிருந்த ஆடுகள் பாதி சிதறி ஓடின மீதி பீதியுடன் நடுங்கிக் கொண்டிருந்தன. நாய்கள் அருகில் வந்தவுடன் அனைத்தும் ஓட்டமாகச் சிதறி மேய்ச்சல் நிலத்திற்கு நடுவில் வந்தன.

இப்போது அந்த நான்கு ஆடுகள் மட்டும் தனியே நின்றன, தமக்குப் பின்னால் ஒரு போர்ப்படையே இருப்பது பொன்ற நினைப்பில் நின்றுருந்தவை இப்போது லேசாக நடுங்க ஆரம்பித்தன. பின்னர் மெதுவாக அச்சத்தை வெளிக்காட்டிக் கொள்ளாமல் மற்ற ஆடுகளைப் பயங்கொள்ளிகள் என்று திட்டிக்கொண்டே மந்தையோடு ஒன்று சேர்ந்தன.

இதைக் கவனித்துக்கொண்டிருந்த மாடு, அந்த ஆட்டுமந்தையை ஒரு அலட்சியப் பார்வைப் பார்த்தது. பின்னர் நீங்களெல்லாம் எங்கே முன்னேறப்போகிறீர்கள், உங்களுக்கு மேய்வதற்கான இடத்தைத் தேர்வு செய்யவும் உரிமையில்லை, அதை வாங்கும் தைரியமும் இல்லை என்பதுபோல ஒரு சிலிர்ப்பு சிலிர்த்துவிட்டு மேய ஆரம்பித்தது.

இப்போது தனக்கு மிக அருகில் அதற்கு மிகவும் பிடித்தனமான ஒரு செடியிருப்பதைப் பார்த்தது. உடனே மிகவும் ஆனந்தத்துடன் அதன் அருகே செல்ல யத்தனித்தது.

இவ்வளவு நேரம் வெறும் அரிப்பு மட்டுமேயிருந்த கழுத்தில் இப்போது ஏதோவொன்று அதைப் பின்னோக்கியிழுப்பது போல் தோன்றியது. பின்னர் அது எவ்வளவோ முயன்றும் அந்தச் செடியின் இலைகளை தனது நுனிநாக்கால் நக்க மட்டுமே முடிந்தது. பின்னர் முயற்சியைக் கைவிட்டுப் பின்புறம் நோக்கியது, அது படுத்திருந்த மரத்தடி சற்று தொலைவில் இருப்பது தெரிந்தது.

அப்படியே அந்தப்பக்கம் திரும்பியது, ஒரு ஆட்டுக்குட்டியை வரப்பிலிருந்து விரட்டிக்கொண்டிருந்தது நாய். சறிது நேரம் அந்தக் குட்டியைப்பார்த்தது, பின்னர் அந்தச் செடியையே முறைத்துப் பார்த்துவிட்டு தான் படுத்திருந்த மரத்தடியே சென்று அசைபோட ஆரம்பித்தது.

இந்த நிகழ்ச்சியைப் பார்த்து முடித்த சங்கரன் செய்தியைவிட்ட இடத்திலிருந்து தொடர்ந்தான். அந்த ஒப்பந்தத்தை எதிர்த்த, பொதுநல வாதிகள், ஒருமித்த கருத்து கொண்ட தோழர்கள், பொதுமக்கள் எனப் பலரும் சிறையில் அடைக்கப்பட்டனர் என்றது செய்தி. ஏதோ ஒரு கோபம் கலந்த வருத்தம் இருந்தது அவனது கடிகாரம் அலுவலகம் செல்லும் நேரத்தைக் காட்டும் வரை..

கழுத்தின் பின்புறம் இருந்த அரிப்பை தனது சுண்டு விரலால் லாவகமாக சொறிந்து கொண்டே "டிபன் ரெடியா.." என்று கீழேயிறங்கிச் சென்றான். அன்றைக்கு மருந்துகள் பரிந்துரைக்கச் செல்ல வேண்டிய இடங்கள் மனதில் ஒடியது.

************************************************************************************************************
உரையாடல் சிறுகதைப் போட்டிக்காகத்தான் எழுதினேன். ஆனால், நான் ஏற்கனவே எழுதிய ஒரு சிறுகதையின் தழுவலிலேயே இருப்பதாக வாசித்த நண்பர்கள் குறிப்பிட்டதால் போட்டிக்கில்லாமல் உங்கள் பார்வைக்கு மட்டும் இருக்கட்டும் என்றும் இங்கே.

இலங்கை - கற்பிதங்கள் 10

kaiyedu@gmail.com (கையேடு) — Mon, 08 Jun 2009 08:05:00 +0000

இலங்கையில் நடந்த போரும் அதன் முடிவும் பற்றி "திரு. சத்யா சாகர் " அவர்கள் எழுதிய "கற்பிதங்கள் 10" என்ற கட்டுரையொன்று கீழுள்ள சுட்டியில். ஒரு பகிர்வுக்காக இங்கே...

முழு விபரமும் இங்கே - " http://transcurrents.com/tc/2009/06/the_ten_great_myths_of_modern.html "

சில குறிப்பிட்ட பகுதிகள் மட்டும் இங்கே வெட்டி ஒட்டியிருக்கிறேன்.
**********************************************************************************

"The Ten Great Myths of Modern Sri Lanka"

- By Satya Sagar

Myth One: The Sri Lankan government is/was at war with the LTTE:
"...............................If the LTTE has used terrorist methods to further its cause there is no doubt that the Sri Lankan government has used genocidal methods to put them down................."

Myth Two: The Mahinda Rajapakse government has ‘won' the ‘civil war' and successfully prevented the division of Sri Lanka :

"......How many governments herd all citizens of a linguistic minority into concentration camps to be treated as terrorists simply because of their identity? And after doing all this what right do they have to call themselves ‘one nation'?......"

Myth Four: The Sri Lankan Tamils will gang up with Indian Tamils and create a ‘Greater Tamil' nation:

"..........................they have not really done much for them. Over the past twenty years there are thousands of Sri Lankan Tamil refugees languishing in Tamil Nadu without proper shelters, livelihood, education for their children or even safety from arbitrary arrest by local police.............."

Myth Five: Sri Lanka has a special place in world Buddhism and its territorial integrity needs to be protected by the Sinhala people:

"...............These champions of Buddhism have no doubt become its greatest destroyers............"

Myth Seven: A majority of the Sinhalese people are racists and chauvinists:

".............Today most of these Sinhala people are also being held hostage by the fascist Rajapakse regime, which has turned Sri Lankan nationalism into a family-run dictatorship guarded by guns purchased with the people's own hard earned money.................."

Myth Nine - The Indian government, once supportive of the Sri Lankan Tamils, has turned against them:

"........ the Indian government does not really care for either the Sri Lankan Tamils or the Sinhalese for that matter. Like in most countries of South Asia successive Indian regimes too have only been bothered about preserving the power of the corporate or feudal elites and care little for their ordinary citizens........"

************************************************************************************

முழு விபரமும் இங்கே - " http://transcurrents.com/tc/2009/06/the_ten_great_myths_of_modern.html "

குறிப்பு: Myth - கற்பிதம் சரியான மொழிபெயற்பா..??

இந்தியாவிலுள்ள போலி பல்கலைக்கழங்கங்களின் பட்டியல்

kaiyedu@gmail.com (கையேடு) — Fri, 05 Jun 2009 09:42:00 +0000

இந்தியாவில் செயல்பட்டு வரும் போலி பல்கலைக்கழகங்களின் பட்டியல் ஒன்றை பல்கலைக்கழக மானியக் குழு (UGC) வெளியிட்டுள்ளது. இப்பட்டியலில் தமிழகம், கேரளா, பீகார், மேற்கு வங்காளம், மகாராஷ்ட்ரா , ம.பிரதேசம் மற்றும் கர்நாடகத்தில் தலா ஒரு பல்கலைக்கழகமும், உ.பி மற்றும் டில்லியில் முறையே ஒன்பது மற்றும் ஆறு பல்கலைக்கழகங்களும் போலிகளாக அறிவிக்கப்பட்டுள்ளன.

"State-wise List of fake Universities as on 18^thJanuary, 2009"

Tamil Nadu - D.D.B. Sanskrit University, Putur, Trichi, Tamil Nadu.

முழுப்பட்டியல் இங்கே - http://www.ugc.ac.in/inside/fakealerts.html

இதோடு அமெரிக்காவில் இயங்கும் பல்கலைக்கழகம் என்று தன்னை அறிவித்துக் கொண்டு " American University of Hawaii" என்ற பெயரில் போலியாக இந்தியாவில் பட்டங்கள் வழங்கிவந்த ஒரு பல்கழைக்கழமும் பிடிபட்டிருக்கிறது.

"American University of Hawaii (AUH) operating in India is not accredited by any recognized accrediting agency and not licensed or approved by the State of Hawaii."

இதுபற்றிய முழுவிபரம் இங்கே : http://www.ugc.ac.in/inside/malprac.html

***********************************************************

இனி மற்றொரு சுவாரஸ்யமான செய்தி..

UGC ன் முகப்பு பக்கத்தில் (http://www.ugc.ac.in/index.html ) இப்போலி பல்கலைக்கழகங்களின் பட்டியல் புதியவை என மின்னிக்கொண்டிருக்கிறது.
அந்தச் சுட்டியைத் தொடர்ந்து உள்ளே சென்றால் 18 சனவரி 2009 நிலவரப்படியான பட்டியல் என்று தெரிவிக்கிறது. ஆனால் அதே பக்கத்தில் அச்சு ஊடகங்களுக்கான (press release) அறிக்கையை நோக்கினால் தேதியில் எல்லாமே 2007 என்றிருக்கிறது...

அதுமட்டுமல்ல சுட்டியில் டில்லியின் கீழ் ஆறு பல்கலைக்கழகங்களின் பெயர் கொண்ட பட்டியல் இருக்கிறது. ஆனால் "press release" ல் ஐந்தின் பெயர்கள்தான் இருக்கிறது. ஒருவேளை அது பழைய "press release" ஆக இருக்குமோ இந்த சுட்டியின் கீழ் தவறுதலாகக் கொடுத்துவிட்டார்களோ... :((

தமிழர்களின் இழப்பு எண்ணிக்கையை மூடி மறைக்கும் ஐ.நா உயர் அதிகாரிகள் - லெ மாந்த் பத்திரிக்கை குற்றச்சாட்டு

kaiyedu@gmail.com (கையேடு) — Thu, 04 Jun 2009 22:28:00 +0000

இலங்கை விவகாரத்தில், ஐ.நா செய்த திரைமறைவுக் குளருபடிகளால் தனது கடமையில் இருந்து தவறியிருக்கிறது என்ற பிரதானக் குற்றச்சாட்டுடன் , மே 28 ஆம் தேதி ப்ரெஞ்ச் பத்திரிக்கையான "லெ மாந்த்" (Le Monde), கட்டுரையொன்றை வெளியிட்டுள்ளது. "Philippe Bolopion" என்பவரால் எழுதப்பட்ட கட்டுரையின் தமிழாக்கம்.

பத்திரிக்கையின் சுட்டி : http://www.lemonde.fr/asie-pacifique/article/2009/05/28/sri-lanka-l-onu-a-cache-l-ampleur-des-massacres_1199091_3216.html

இனி அக்கட்டுரையிலிருந்து..

"L'ONU a caché l'ampleur des massacres au Sri Lanka,"

"தமிழர்களின் இழப்பு எண்ணிக்கையை மூடி மறைக்கும் ஐ.நா"

இறப்பு எண்ணிக்கை மறைக்கப்பட்டுள்ளது. குற்றச்சாட்டுகளுக்கு பதிலில்லை. இறப்பு எண்ணிக்கை குறைத்தே வெளியிடப்பட்டுள்ளது. முறைதவறியுள்ளனர்.

இலங்கை இராணுவத்தின் அடக்குமுறைகளுக்கெதிராக போதிய ஆவணங்கள் இருந்தும் ஐ.நா வின் மேல்மட்டம் அமைதிகாத்திருப்பது "லெ மாந்த்" பத்திரிக்கையின் புலனாய்வில் தெரியவந்துள்ளது.

போரின் இறுதி நிகழ்வுகளை "இரத்த வெள்ளம்" என்று குறிப்பிட்டாலும், கொழும்பின் மீதான பக்கச் சார்பினால், ஆயிரக்கணக்கான பொதுமக்களின் உயிரைப் பாதுகாக்கும் தமது கடமையிலிருந்து ஐ.நா மன்றம் தவறியிருக்கிறது.
இறந்தவர் எண்ணிக்கை பற்றிய உண்மையான அறிக்கையை வெளியிட மறுத்தது அதன் செயல்பாடுகளின் குறைகளைச் சுட்டுகிறது.

புலிகளுக்கெதிராக நடைபெற்ற இந்தப் போரில், ஐ.நாவின் கள ஊழியர்கள், அரசு சாரா உதவிக்குழுக்கள் (NGOs), மருத்துவர்கள் மற்றும் மத போதகர்கள் அளித்த உயிரழப்புக்கள் குறித்த எண்ணிக்கைகளை ஐ.நாவின் அதிகாரக்குழுக்களுள் சில, தொடர்ந்து இடையீடு செய்ததோடு, எண்களைக் குறைத்தும், திருத்தியும் இருக்கின்றனர்.

இதன் உச்சகட்டமாக சனவரி 20 ஆம் தேதியிலிருந்து மே 13 வரை ( இறுதித் தாக்குதலுக்கு ஒரு வாரம் முன்புவரை ) இறந்தவரின் எண்ணிக்கை 7,720 (678 குழ்ந்தைகள் உட்பட) எனவும், படுகாயமடைந்தோரின் எண்ணிக்கை 18,465 ( 2,384 குழந்தைகள் உட்பட) எனவும் தெரிவிக்கிறது அறிக்கை. " இவ்வறிக்கையை மறைக்க தொடர்ந்து முயற்சிகள் மேற்கொள்ளப்பட்டது" என்று குறிப்பிடுகிறார் ஐ.நா வின் ஊழியர் ஒருவர்.

இறப்பு எண்ணிக்கைகள் பத்திரிக்கைகளுக்கு பல வழிகளில் சென்றடைந்த போதும், கொழும்பிலிருந்த ஐ.நா வின் ஒருங்கிணைப்பாளரான Neil Buhne மட்டுமே இதுகுறித்து பதிலளிப்பவராக இருந்தார். ஆனால், பொதுவாக ஐ.நா வின் மூத்த அதிகாரிகள் இது குறித்து பேசுவதிலிருந்து விலகியேயிருந்தனர்.

ஐ.நா வின் பொதுச்செயலாளர் பான் கீ மூன் மற்றும் அவரின் சிறப்பு தனிச் செயளர் விஜய் நம்பியாரின் கருத்திற்கு எதிரானதாக இருந்த போதிலும், மனித உரிமைகள் செயலாளர் நவநீதம் பிள்ளை அவர்கள் நம்பிக்கைக்குறிய தகவல்களை (அப்பொழுது சாவு எண்ணிக்கை 2,800) வெளியிடவேண்டுமென விருப்பினார். ஆனால், இத்தரவுகள் கொழும்பினுடனான உறவினை சீர் கெடுக்கும் என மனித உரிமைகள் செயலகத்தின் தொடர்பாளரான ஜான் ஹோல்ம்ஸ் கூறியிருந்தார்.

இறந்தவர் எண்ணிக்கை 20,000 ஐத் (இது ஒரு உத்தேசமான மதிப்பீடு) தொடலாம் என்ற நம்பிக்கை ஐ.நா அதிகாரியான விஜய் நம்பியாரிடம் தெரிவிக்கப் பட்டிருந்த போதும், இறுதித் தாக்குதல் வாரத்தில் ஏற்பட்ட இழப்புகளைக் கவனத்தில் கொள்ளாமல், இந்த 7,700 என்ற எண் தொடர்ந்து அச்சு ஊடகத்தில் குறிப்பிடப்பட்டு வருகிறது.

துவக்கத்திலிருந்தே ஐ.நா இம்மோசமான சூழலை எதிர்பார்த்திருக்க வேண்டும்.
23 சனவரி 2009 அன்று, இரண்டு சர்வதேச உறுப்பினர் உட்பட 17 ஐ.நா ஊழியர்கள், பாதுகாப்புப் பிரதேசம் என அறிவிக்கப் பட்ட உடையார்காடு முகாமில் உணவு விநியோகத்தில் ஈடுபட்டிருந்தனர். அப்போது இலங்கை இராணுவம் அவ்விடத்தை குண்டுவீசி தாக்கியதில், பத்துக்கும் மேற்பட்டோர் பலியானர் எனக் குறிப்பிடுகின்றனர். மேலும், அருகிலிருந்த மருத்துவமனையில் பணியாற்றிய ஐ.நா வின் ஊழியர்கள், காயமடைந்த பெண்கள், உருக்குலைந்த, கருகிய மற்றும் உறுப்புகளிழந்த குழந்தைகளின் புகைப்படங்களை எடுத்துள்ளனர்.

அடுத்தடுத்த வாரங்களில், போர்ப்பகுதிகளுக்கிடையே சிக்கிக் கொண்ட ஐ.நாவின் ஊழியர்களும், அரசு சாரா உதவிக்குழுக்களின் ஊழியர்களும், தொடர்ந்து ஐ.நாவின் அதிகாரிகளுக்குப் போர்நிலவரங்களை குறுஞ்செய்திகள் "SMS" மூலமாகத் தெரிவித்திருக்கின்றனர். இலங்கை இராணுவத்தினரால் குண்டு வீசப்பட்ட மருத்துவமனைகள் குறித்தும், நூற்றுக் கணக்கான இறந்தவர் பற்றியும், ஆயிரக்கணக்கான காயமடைந்தோர் பற்றியும் தொடர்ந்து போர்நிலவரம் பற்றி குறுஞ்செய்திகள் மூலம் தெரிவித்திருக்கின்றனர் அவ்வூழியர்கள்.

9 மார்ச் 2009 அன்று வந்த குறுஞ்செய்தி - "தயவு செய்து இலங்கை இராணுவத்தின் தாக்குதலை நிறுத்தச் சொல்லுங்கள்"

14 மார்ச் 2009 - "எங்கேயிருக்கிறது பாதுகாப்பு வலையம்"

இத்தனைக் குழப்பங்களுக்குமிடையே புலிகளின் பலவந்தமான ஆள் எடுப்பு நிகழ்வும் நடைபெற்றிருக்கிறது.

12 மார்ச் 2009 - " இரண்டு முகாம்களும் வதைக்கின்றன" " நாங்கள் இறந்து கொண்டிருக்கிறோம். பத்து மீட்டருக்கருகில் இரண்டு குண்டுகள் வீழ்ந்து வெடித்திருக்கிறது."

19 மார்ச் 2009 - "இளவயதினர் போர்களத்திற்குக் கொண்டு செல்லப் படுகின்றனர். என்ன செய்யப் போகிறது சர்வதேச சமூகம்"

21 மார்ச் 2009 - "தப்பிக்க முயன்ற நூற்றுக்கணக்கான மக்களைச் சில குண்டர்கள் தடுத்துச் சிறைபிடிக்கின்றனர். அவர்கள் வயது வித்தியாசமும், பாலின வித்தியாசமும் பாராமல், அவர்களைக் கம்புகளால் கடுமையாகத் தாக்குகின்றனர்." " ஏன் சர்வதேச சமூகம் அமைதி காக்கிறது?"

இக்கட்டான இச்சூழலில் ஐ.நா தனது "UNOSAT" பிரிவின் உதவியை நாடி, மக்கள் இடம்பெயர்வு குறித்து செயற்கைக்கோள் புகைப்படங்களைக் கோரியது. செயற்கைக்கோள் படங்கள் வான் வழித்தாக்குதல் மற்றும் கனரக ஆயுதங்களின் பயன்பாட்டால் விளைந்த 12 மீட்டர் விட்டம் கொண்ட குழிகளைக் கொண்டிருந்தன.

"ஐ.நாவின் தலைமையிடம், இலங்கை அரசாங்கம் உறுதிமொழி அளித்திருந்த போதிலும், ஒரு நாள் கூட அங்கு கனரக ஆயுதங்களின் பாவிப்பு நிறுத்தப்படவில்லை," என ஒரு பிரதிநிதி தெரிவித்திருக்கிறார். ஐ.நா இவ்வாதாரங்களை தன் கைகளில் கொண்டிருந்தாலும், எவ்வித நடவடிக்கையும் எடுக்கவில்லை.

ஏப்ரல் மாதத்தின் இடைக்காலத்தில், ஐ.நா விற்கு விஜயம் செய்த விஜய நம்பியார், "ஐ.நா இப்பிரச்சனையில் அடக்கி வாசிக்க வேண்டும்" என்றும் " இலங்கை அரசாங்கத்துடன் இணக்கமான நிலைப்பாட்டை எடுக்க வேண்டும்" என்றும் குறிப்பிட்டிருக்கிறார். அதே சமயத்தில் பொதுமக்களினது இறப்புகளின் எண்ணிக்கையும் காயம்பட்டோரின் எண்ணிக்கையும் சில ஆயிரங்களைத் தொட்டுவிட்டிருந்தது குறிப்பிடத்தக்கது. இதன் பின்னர், கொழும்பு, போர்ப்பகுதிகளுக்கு மனிதநேய உதவிக்குழுக்கள் செல்வதற்கு அனுமதி வழங்கியுள்ளதாக ஐ.நா அறிவித்தது. ஆனால், அப்படி ஒரு நிகழ்வை உலகம் காணவில்லை.

நியூயார்க்கிலிருந்து கொழும்பு வரையுள்ள ஐ.நாவின் மேல்மட்ட அதிகாரிகளின் செயல்பாடுகள் பலருக்கு் அதிருப்தியளித்திருக்கிறது. "அவர்கள் ஒரு பாரிய மனிதப் படுகொலைக்குத் தயாராகிவிட்டிருந்தனர்" என்று ஒருவர் குறிப்பிட்டிருக்கிறார். "பல மாதங்களாகப் பல எச்சரிக்கைகள் விடுக்கப்பட்ட போதிலும் யாரும் அரசாங்கத்தின் கதவுகளைத் தட்டவில்லை" என்று ஒரு மக்கள் ஊழியர் குறிப்பிட்டிருக்கிறார்.
அதேநேரம், உயர்மட்டத்தில் இல்லாத எந்தவொரு ஊழியரையும், நசுக்கவும், மிரட்டவும், அச்சுறுத்தவும், வெளியேற்றவும் இலங்கை அரசாங்கம் சிறிதும் தயங்கவேயில்லை.

மே 11 ஆம் தேதி, 100க்கும் மேற்பட்ட குழந்தைகள் கொல்லப்பட்டதாக வந்த செய்தியை அடுத்து, கொழும்புவிற்கான ஐ.நா வின் பிரதிநிதியான திரு. Gordan Weiss இதனை இறுதியில் ஒரு "இரத்த வெள்ளம்" என்று குறிப்பிடுகிறார். உடனடியாக இலங்கை அரசாங்கம் இதற்கான விளக்கத்தினைக் கோருகிறது. பின்னர் அவ்வதிகாரி அக்குறிப்பினை கைவிடுகிறார். இச்செய்தி பற்றி BBCல் Amin Awad, எனும் அகதிகளுக்கான உயர் கமிஷனின் பிராந்திய அதிகாரி குறிப்பிடுகையில், இரண்டு தரப்புகளின் குற்றச்சாட்டுகளைப் பிரித்தறிவது கடினமான செயலாக இருப்பதாகக் குறிப்பிடுகிறார்.

17 மே 2009 அரசாங்கம் தனது வெற்றிச் செய்தியினை அறிவித்ததை சந்தேகிக்கும் அல்ஜசீராவைச் சேர்ந்த திரு. Awad, அதற்கு காரணமாக, போர்ப்பகுதியிலிருந்த 20,000 மக்கள் வெளியேறினர் என்று அரசாங்கம் பின்னர் வெளியிட்ட செய்தியினை சுட்டிக் காட்டுகின்றார். மேலும், "இந்த அறிவிப்பானது அரசாங்கம் அங்கு குண்டுமழை பொழிவதற்கான முன் ஏற்பாடக கருதலாம்" என ஐநா வின் ஊழியர் ஒருவர் வருத்தத்துடன் தெரிவிக்கிறார்.

போரின் முடிவு, இருக்கும் பிரச்சனைகளின் முடிவல்ல. 3,00,000 க்கும் மேலான இடம்பெயர்ந்தோர் உள்ள முகாம்களில் அரசு சாரா உதவிக் குழுக்கள் (NGO) கடுமையான இன்னல்களைச் சந்தித்துக் கொண்டிருக்கின்றனர்.
"செய்து கொண்ட சமரசங்கள் போதும்" என்று பாதிக்கப்பட்ட மக்களை சென்றடைவதற்கும், முகாம்களில் மக்களின் சுதந்திர நடமாட்டத்திற்கும், முகாம்களிலிருந்து இராணுவத்தை வெளியேற்றுவதற்கும், ஆவன செய்யாத ஐ.நா வை நோக்கி தன்னுடைய குற்றச்சாட்டினை வைக்கிறார் ஒரு NGO ஊழியர்.

மே 11 ஆம் தேதி, திரு.Neil Buhne, என்பவருக்கு 7 NGO க்கள் கூட்டாக எழுதிய கடிதத்தில், வடக்கில் Menik Farm எனும் முகாமில் ஐ.நா உதவியுடன் இலங்கை அரசாங்கம் செய்து வரும் போருக்குப் பின்னான புனரமைப்புப் பணிகளில், "ஏறத்தாழ நிரந்தரமாக மக்களை முகாம்களில் தங்க வைக்கும் திட்டமும்" முகாமைச் சுற்றி நிகழும் கட்டுமானச் செயல்களும் ஒரு நிரந்தரத் தங்குமுகாமிற்கான கட்டமைப்புகளை உள்ளடக்கியதாக இருக்கிறது என்று குறிப்பிடுகின்றனர். மேலும், "நம்முடைய செயல்கள் இடம்பெயர்ந்த மக்களின் அடிப்படைத் தேவைகளைப் பூர்த்தி செய்வதோடு மட்டுமல்லாமல், மக்களின் சுயமரியாதையும், சுதந்திரத்தையும் உறுதி செய்யும் முகமாக அமையவேண்டும்" என்றும் அக்கடிதத்தில் குறிப்பிட்டுள்ளனர்.

- Philippe Bolopion
************************************************************************************

இப்பத்திரிக்கையின் சுட்டியை இப்பதிவில் பகிர்ந்து கொண்ட திரு.நாகார்ஜுனன், மற்றும் தமிழாக்கத்தில் பங்குகொண்ட நண்பர் "பதி"க்கும் ஆங்கிலத்திற்கு மொழிமாற்றம் செய்து உதவிய அவரது நண்பர்களுக்கும் நன்றி.

ஒரு 2,50,000 கம்மியா இருக்கு

kaiyedu@gmail.com (கையேடு) — Thu, 28 May 2009 09:00:00 +0000

இலங்கையில் போர்க்குற்றங்களுக்கெதிரான விசாரணை செய்வதற்காக செய்யப்பட்ட கணக்கெடுப்பில், இரண்டரை லட்சம் தமிழர்களின் பிணங்கள் கம்மியாகயிருப்பதால் விசாரணை தேவையில்லன்னு இந்தியா, சீனா, ரஷ்யா ஆகிய வல்லரசுகள் கருதுகிறார்களாம்.

இதனையே ஐ.நா மன்றமும் கருதுவதால், இலங்கைஅரசு தம்மைத் தாமே விசாரித்துக் கொள்ளலாம், மேற்படி விசாரணை நடத்த வேண்டுமெனில் மேலும், 2.5 இலட்சம் பிணங்கள் வேண்டுமாம், அதில் ஒன்று குறைந்தால்கூட விசாரணை நடத்த முடியாது என்பதையும் ஐ.நா தெரிவித்துக் கொல்(ள்)கிறது.

**************
கடல் பகுதிக்கு நடக்கும் போட்டியைப் பார்த்தால், இன்னும் இருபது ஆண்டுகளுக்குள், ஆசியாவில் கடும் மூன்றாவது உலக யுத்தம் வந்தால் கூட ஆச்சர்யப் படுவதற்கில்லை என்றே தோன்றுகிறது.

வதந்திகள் வதந்திகளாகவே இருக்கட்டும்

kaiyedu@gmail.com (கையேடு) — Mon, 18 May 2009 12:02:00 +0000

வதந்திகள் வதந்திகளாகவே இருக்கட்டும். உண்மைகள் புதையுண்டு போகாமலும் இருக்கட்டும்.

காக்கும் கரம் நீட்டத் தவறிய நாம் அதரவுக் கரத்தையாவது நீட்டுவோம்.

இன்றைக்கு, அமைதிகாப்பதைத் தவிர வேறொன்றும் செய்ய இயலாத கையறுநிலைத் தமிழர்களுள் ஒருவனாக.

ஈழம் - ஒரு கலந்துரையாடல்

kaiyedu@gmail.com (கையேடு) — Mon, 20 Apr 2009 09:27:00 +0000

சிலர் சர்வதேசம் என்கிறார்கள், சிலர் பூகோலம் தமிழர்களுக்கெதிரி என்கிறார்கள், இன்னும் சிலர் தீவிரவாதம் என்கிறார்கள். ஆனால், பால் மனம் மாறாக் குழந்தைகள் கூடக் கொன்று குவிக்கப் படுகிறார்கள்.

மேலும் சிலர் பரந்த மனப்பான்மை வேண்டுமென்கிறார்கள் ஒருவேளை மக்களைப் பரந்துபட்ட திறந்த வெளிச் சிறையில் அடைப்பதுதான் பரந்த மனப்பான்மையோ என்றுகூடத் தோன்றியது.

இன்று வரை தனி ஈழம் மட்டுமே நிரந்தரத் தீர்வு என்று நம்பியிருந்தேன், இன்றும் அதையே நம்புகிறேன். ஆனால், எது ஈழத் தமிழருக்கான நிரந்தரத் தீர்வு என்பதை ஈழத் தமிழர்தான் ஒன்றிணைந்து முடிவு செய்யவேண்டும்.

*************************************************************************************

தீர்வு எப்படி எழுதப்பட்டாலும், எழுதப்படப் போவதாகயிருந்தாலும், ஈழத்தின் போராட்டம் பற்றியும், இலங்கைத் தீவில் ஈழத் தமிழருக்குள்ள உரிமை பற்றியும், அதனைச் சுற்றி நிகழும் நிகழ்வுகள் பற்றியும் மேலும் பலருக்கு அறியச் செய்யும் நோக்கில், ஆங்கிலத்தில் சுமார் ஒரு மணி நேர உரையும், அதனைத் தொடர்ந்து ஒரு மணிநேரத்திற்குப் பார்வையாளர்களுக்கான கேள்வி நேரமும், கலந்துரையாடலையும்(ஆங்கிலத்தில்), பெங்களூருவிலுள்ள இந்திய அறிவியல் கழகத்தைச் (Indian Institute of Science, Bangalore) சேர்ந்த, தன்னார்வம் கொண்ட மாணவர்கள் சிலர் ஏற்பாடு செய்திருக்கின்றனர்.

நிகழ்ச்சி விபரங்கள் கீழ்வருமாறு.

Speaker: Dr. P. Sahadevan,

Professor of South Asian Studies,
South Asian Studies division,
School of International Studies,
Jawaharlal Nehru University, Delhi.

http://www.jnu.ac.in/FacultyStaff/ShowProfile.asp?SendUserName=sahadevan

Date: 22nd April 2009

Time: Talk - 6:00 pm followed by question/open discussion session

Venue: Department of Physics, Lecture hall, IISc, Bangalore.

About the Speaker:

P. Sahadevan is Professor of South Asian Studies (since May 2003) and currently Book Review Editor of International Studies, an academic journal published by Sage, New Delhi. He held visiting fellowships at the University of Kent at Canterbury, U.K. (1993-94) and the Joan B. Kroc Institute for International Peace Studies, University of Notre Dame, USA (1998).

மேலதிகத் தகவல்கள், அவரது புத்தகங்கள் மற்றும் ஆய்வுக்கட்டுரைகள் பற்றிய விபரங்களுக்கு :
http://www.jnu.ac.in/Faculty/sahadevan/

*************************************************************************************
பேராசிரியர் சகாதேவன் அவர்களின் உரைச் சுறுக்கம் விரைவில் இதே இடுகையில் சேர்க்கப்படும்.

இதில் பெங்களூருவில் இருக்கும் பதிவர்கள், நண்பர்கள் எனப் பொதுமக்களும் பங்குகொள்ளலாம்.

தற்செயலாகவோ அல்லது இதில் பங்குகொள்ளவோ, சென்னை மற்றும் பிற நகரத் தமிழ்ப் பதிவர்கள், பத்திரிக்கையாள நண்பர்களுள் சிலர், பெங்களூரு செல்வார்களெனில் கீழ்கண்ட தகவல்கள் உபயோகமாகயிருக்கலாம்.

How to reach IISc?

http://www.iisc.ernet.in/content_geninfohowtoreach.html

மேலுள்ள சுட்டியில், இரயில், பேருந்து, வானூர்தி, சொந்த வாகனம் என அனைத்துக்கும் வழிகாட்டுதல் இருக்கிறது.

Route Map:

http://www.iisc.ernet.in/images/campus_route.jpg

கீழுள்ள சுட்டியில் இந்திய அறிவியல் கழக வளாகத்தின் வரைபடம் உள்ளது. இயற்பியல் துறையை எளிதில் கண்டடைய பயன்படலாம்.

http://www.iisc.ernet.in/content_geninfocampusmap.html

*************************************************************************************

இந்நிகழ்ச்சியின்போது இலங்கையின் தற்போதைய நிலைமை குறித்தும் சிறிது வரலாறும் இணைத்து மூன்று பக்கங்களில் ஆங்கிலத் துண்டறிக்கைகள் இலவசமாக விநியோகம் செய்யப்படவுள்ளன. அவை உங்கள் பார்வைக்கு.

பக்கம் 1:

பக்கம் 2:

பக்கம் 3:

இவ்வுரையையும், கலந்துரையாடலையும் ஏற்பாடு செய்த மாணவர்களுக்கு எனது வாழ்த்துக்களும் நன்றிகளும்.

போர்ச்சூழலும், போரும் சூழலும்

kaiyedu@gmail.com (கையேடு) — Wed, 21 Jan 2009 17:00:00 +0000

மற்றுமொருமுறை மும்பையைத் தீவிரவாதிகள் தாக்கியாயிற்று, அதனைத் தொடரும் பல்வகை நாடகங்களும் வழக்கம்போல் அரங்கேற்றப்பட்டுச் சிறப்பு வசூலயையும் பார்த்தாகிவிட்டது. ஆனால், இம்முறை மட்டும் கொஞ்சம் நீண்ட காலம் நீடிக்கிறது, அதுவும் வேறு பெரிய வசனங்களுடன். பொறுத்தது போதும், போர் தொடு, குண்டு போடு, அணுஆயுதம் அவனிடமும் இருக்கிறது என்பது போன்ற வசனங்களுடன் உணர்வுகள் பெருக்கப்பட்டுக் கொண்டிருக்கின்றன. (இந்த நேரத்தில் ""வாருங்கள், தேநீர் அருந்துங்கள், என்று அன்போடு அழைத்து எங்களுக்கு இந்தியாவுடன் சுமுகமான உறவு இருக்கவேண்டும், அதேபோல் இந்தியாவிலிருக்கும் சாமான்யனின் எண்ணங்கள் என்ன?"" என்று கேட்கும் பாகிஸ்தானில் தேநீர் ஆற்றுமொரு சாமான்யனின் நேர்முகக் காட்சிகள்வேறு நினைவுக்கு வந்து படுத்துகிறது. அட சாமான்யனின் விருப்பம்தானே, புறந்தள்ளிவிடலாம்.)

தீவிரவாதத் தாக்குதல்கள் நடக்கும் போதெல்லாம் ஒரு போர்ச்சூழல் உருவாகிறது. அணுஆயுதச் சோதனைக்குப் பின், உருவான போச்சூழல்களிலெல்லாம் அணு ஆயுதம் என்ற வார்த்தையைப் பயன்படுத்திப் பேசாதவர்கள் மிகக்குறைவு எனலாம். இப்போதும், போர், ஆணுஆயுதம் ஆகிய வார்த்தைகளே மிகச் சாதாரணமாகப் பயன்படுத்தப்படுகின்றன. இப்படிப்பட்ட வேளையில், தேச நலனில் அக்கறையில்லாத ஒரு கட்டுரை.

அணுஆயுதங்கள் ஒரு நாட்டின் பெருமையையும், பாதுகாப்பையும் தூக்கிப்பிடிக்கும் அளவுகோளாகக் கருதாமல், மனிதயினத்தின் நலன் என்ற நோக்கிலும் அனுகப்படவேண்டும். அணு ஆயுதங்களின் கதிர்வீச்சினால் ஏற்படும் நேரடித் தாக்கங்களும், அதனால் ஏற்படும் மனித அழிவும் ஹிரோஷிமா, நாகசாகி மூலம் அனைவரும் அறிந்ததே. ஆனால், அணு ஆயுதங்களின் பயன்பாடு, மற்றும் சோதனைகளால், சுற்றுச் சூழலில் ஏற்படும் தாக்குதல்கள் பற்றிய புதிய ஆய்வு முடிவுகளை முன்வைப்பதே இக்கட்டுரையின் நோக்கம்.

அணுஆயுதங்களும் சுற்றுச் சூழலும் :

1986 ல் அமெரிக்கா மற்றும் உருசியா ஆகிய நாடுகளிடம் முறையே ஏறத்தாழ 36,000 மற்றும் 34,000 அணுகுண்டுகள் இருந்தன என்கின்றன அதிகாரப் பூர்வத் தகவல்கள். மொத்தத்தில் இவ்விரண்டு நாடுகளிடம் மட்டுமே ஏறத்தாழ 70,000 ஆணுகுண்டுகள் இருந்திருக்கின்றன. (அதிகாரப் பூர்வத் தகவலே இவ்வளவு எனில் உண்மை யாருக்குத் தெரியும்).

1980 களில் அமெரிக்க-உருசிய பனிப்போர் உச்சத்தை அடைந்திருந்த போது, சுற்றுச்சூழல் குறித்து ஆய்வு மேற்கொள்ளும் மூன்று தனித்தனிக்குழுக்கள், அப்போதைய அமெரிக்க ஜனாதிபதி ரொனால்ட் ரீகன் மற்றும் உருசிய அதிபர் கோர்பர்சேவிற்கும் ஒரு எச்சரிக்கை விடுத்தனர். அணுஆயுதங்களிலிருந்து வெளிப்படும் கடும் வெப்பம் மற்றும் கதிரியக்கம் ஆகிய நேரடித் தாக்கங்கள் மட்டுமல்லாமல், ஒரு அணுஆயுதத்திலிருந்து வெளிப்படும் கரும்புகை மற்றும் அதனால் ஏற்படும் சூழல் மாற்றங்கள், மனிதகுலத்திற்கே அழிவை ஏற்படுத்தும் அளவிற்கு ஆபத்தானவை என வலியுறுத்தினர். இக்குழுக்களின் அறிக்கைகளில் இருக்கும் உண்மையை ஆராயும் வண்ணம் உருசியாவின் சுற்றுச் சூழல் விஞ்ஞானிகளும், அமெரிக்காவின் தேசிய அறிவியல் குழுமம், மற்றும் விஞ்ஞான ஆய்வுக்குழுக்களின் சர்வதேசக் குழுமம் ஆகிய மூன்றும் தனித்தனியே அவ்வாய்வுகளையும், அவ்வாய்வறிக்கை முன்னிறுத்திய முடிவுகளையும் சரி பார்த்தனர். பின்னர், அவ்வறிக்கையில் குறிப்பிட்டிருக்கும் ஆணு ஆயுதங்களால் ஏற்படும் சுற்றுச்சூழல் அபாயம் உண்மை என்று கண்டறியப்பட்டது. அப்படி என்ன குறிப்பிட்டிருந்தனர் அவ்வறிக்கையில்??

"அணுக்கருக் குளிர்காலம் (Nuclear winter)":

அவ்வாய்வறிக்கை அணுஆயுதங்களினால் ஏற்படும் நேரடி பாதிப்புகளால், வானிலையில் ஏற்படும் உடனடி மாற்றங்கள் குறித்த ஆபத்துக்களை முன்வைத்தது. அதாவது, திடீரென வருடம் முழுவதும் குளிர்காலமாகிவிடும் என்றும் அதனை "அணுக்கருக் குளிர்காலம்" என்றும் வழங்கினர். இதைப்பற்றி விரிவாகப் பார்க்கும் முன் அணுகுண்டுகளைப்பற்றிய ஒரு சிறிய முன்னுரை அவசியம்.

அணு ஆயுதங்கள் ஒரு பார்வை:

இரு நாடுகளுக்கிடையே நிகழும் போர்களிலும், அல்லது வழக்கமான வெடிகுண்டுகளிலும் பெரிதும் பயன்படுத்தப்படும் ஒரு வேதிப்பொருள் TNT (TriNitrotoluene). அவ்வெடிப்பொருளின் வேதிவினையினால் வெளிப்படும் வெப்பம் மற்றும் அழுத்த அதிர்வலைகள் ஆகியவை மனிதனையும், மற்ற பொருட்களையும் சிதைப்பதன் மூலம் பாதிப்பை உண்டாக்கும். இந்த TNT என்ற வேதிப்பொருளின் நிறையளவு வெடிகுண்டுகளின் செறிவை நிர்ணயிக்கும் ஒரு அளவாகப் பயன்படுத்தப்படுகிறது. உதாரணமாக ஒரு கிலோ TNT கொண்ட ஒரு குண்டு சிறிய பாதிப்பையும், 10 கிலோ எடையுள்ள TNT கொண்ட வெடிகுண்டு அதிக அளவிளான பாதிப்பையும் உருவாக்கும். இவ்வடிப்படையில் அணுகுண்டுகளில் TNT முக்கிய வெடிப்பொருளாக இல்லாமலிருந்தாலும் ஒரு அணுகுண்டின் பாதிப்பினை அளப்பதற்கும் அதற்குச் சமானமான(equivalent) TNTன் அளவே பயன்படுத்தப்படுகிறது. ஒரு அணு குண்டிலிருந்து வெளிப்படும் ஆற்றலானது, சாதாரண ஏவுகணைகளைவிட சுமார் 10^6 - 10^8 மடங்குகள் அதிகம். ஒரு அணுகுண்டின் விளைவை ஏற்படுத்த வேண்டுமெனில் அதற்குச் சமானமாக எறத்தாழ ஆயிரத்திலிருந்து - பத்தாயிரம் டன்கள் (1 டன் - 1000 கிலோ) TNT தேவைப்படும்.

இது மட்டுமல்லாமல், ஒரு அணு ஆயுதம் வெடிக்கும் போது, அதிலிருந்து, வெப்பக் கதிர்வீச்சு, கதிரியக்கக் கதிர்வீச்சு மற்றும் அழுத்த அலைகள் ஆகியவற்றுடன், பல டெராகிராம்கள் (டெராகிராம் = 10^12கிராம்) அளவிலான SOOT எனப்படும் தனிமநிலைக்கார்பன் துகள்கள் வெளிப்படும். ஒரு அணுகுண்டிலிருந்து வெளிப்படும் இக்கார்பன் அணுத்துகள்களின் அளவு மற்றும் அவை ஏற்படுத்தும் சுற்றுச் சூழல் மாசு பற்றிய ஆய்வுகள் குறித்தே மேலே குறிப்பிடப்பட்டது. (இனி கட்டுரை முழுவதும் "SOOT" எனப்படும் தனிமநிலைக் கார்பனை வெறும் கார்பன் அணுத்துகள் என்றே குறிப்பிடப்படும்)

இந்த SOOT எப்படிப்பட்ட விளைவுகளை உண்டாக்கும்?

அணுஆயுதங்களிலிருந்து வெளிப்படும் கார்பன்துகள்கள் நேரடியாக வளிமண்டலத்தில் உள்ள அடுக்குகளுள், ஓசோன் படலத்தை உள்ளடக்கிய ஒன்றான stratoshpere-ல் கலக்கின்றன. இப்படிக் கலந்த கார்பன் துகள்கள் சூரிய ஒளி மற்றும் வெப்பம் ஆகியவை பூமியை வந்தடையவிடாமல் ஒருகுடையைப் போலத் தடுத்துவிடுகிறது. இதனால், பூமிப் பரப்பில் வெப்பநிலை குறைந்து, பருவ காலச் சுழற்சி முறை இடர்படுவதோடல்லாமல், ஆண்டு முழுவதும் குளிர்காலம் போன்ற தட்பவெப்ப சூழலை உருவாக்கிவிடுகிறது. அமெரிக்கா மற்றும் உருசியா ஆகிய நாடுகள் மொத்தமாக சுமார் 4400 அணு ஆயுதங்களை வெடிக்கச் செய்தால் அவை சுமார் 180 டெராகிராம்கள் அளவிற்கான கார்பன் துகள்களை உமிழும் எனவும், இந்த அளவுக்கான கார்பன் துகள்கள் குறுகிய காலத்தில் பூமிமுழுவதும் ஒரு குளிர்காலச் சூழலை உருவாக்கும் அளவிற்குப் போதுமானது எனவும் அறிவித்திருந்தனர். மேலும் இக்குளிர்காலத்தையே "அணுக்கருக் குளிர்காலம்" என்று வழங்கினர்.

இவ்வாய்வு முடிவின் முக்கியத்துவத்தை அறிந்து அமெரிக்காவும் உருசியாவும் தங்களுக்கிடையே SORT(Strategic Offensive Reductions Treaty) உடன்படிக்கை ஏற்படுத்திக்கொண்டன. இவ்வுடன்படிக்கைப்படி இவ்விருநாடுகளும் 2012-க்குள் தங்களது அணுஆயுதங்களின் எண்ணிக்கையை 1700-2200 ஆகக் குறைத்துக் கொள்ள முன்வந்தன.

சமீபத்திய ஆய்வுகளும் முடிவுகளும்

சரி அதுதான் அவர்கள் குறைத்துக் கொள்ள முடிவு செய்துவிட்டனரே இப்போ என்னவாயிற்று. இங்குதான் கட்டுரையின் ஆரம்பப் பத்திகளுக்கான காரணமே இருக்கு. 1980ல் மேற்கொண்ட அதே ஆய்வுக்குழு, அவ்வாய்வு முழுமையானதல்ல என்றும், அவ்வாய்வின் முடிவுகள் பலவகையான நேரடி மற்றும் மறைமுக ஆபத்துக்களை உள்ளடக்கியவையல்ல என்றும் குறிப்பிடுகின்றனர். கணினிகளின் மேம்பாட்டிலும், தொழில்நுட்பத்தின் வளர்ச்சியாலும், பூமியின் பருவகால மாற்றங்களுக்கான புதிய மாதிரிகளை உருவாக்கி, மேலும் துள்ளியமாகக் கணக்கீடுசெய்திருக்கின்றனர்.

அப்படி என்ன வேறுபாடு?

1980 களில் வெளியிடப்பட்ட ஆய்வறிக்கைகளில் ஆணுஆயுதம் வெடிக்கும்போது வெளிவரும் கார்பன் துகள்கள் மட்டுமே கணக்கிடப்பட்டு பின்னர் அவை ஓசோன் படலத்தில் தங்கினால் ஏற்படும் பாதிப்பு பற்றி மட்டுமே ஆராயப்பட்டன. அதனால், 4400 அணுஆயுதங்கள் வெடித்து சுமார் 180 டெராகிராம்கள் கார்பன் உமிழப்பட்டால் இப்பாதிப்பு உண்டாகும் என்று குறிப்பிட்டனர். அவ்வாய்வறிக்கையின் எல்லைகளைச் சரிவரப் புரிந்து கொள்ளாமலேயே பல நாடுகளின் அணுஆயுதச் சோதனைகள் மற்றும் ஒருசில அணுகுண்டுகளை வீசுதல், மற்றும் வீரியம் குறைந்த சிறிய அணுகுண்டுகளைப் பயன்படுத்துதல் போன்றவை அதீத ஆபத்தானவையாகக் கருதப்படவில்லை.

இப்போது என்ன புதுக்காரணிகளை உள்ளடக்கியது அவர்கள் ஆய்வு?

போர் என்று வரும்போது, எந்தவொரு நாடும் ஆள் அரவமற்ற பாலைவனப் பிரதேசங்களில் குண்டு வீசப்போவதில்லை. அடர்வான முக்கிய நகரங்களிலேயே குண்டுவீசப்படும். அதேசமயம், ஒரு அணு குண்டு வெடித்தபின் பலநாட்கள் வரை நீடிக்கப் போகும் அனல் காற்று, மற்றும் அது வெடித்த நகரத்திலிருந்த எரிபொருட்கள், மற்றும் கட்டுமானப் பொருட்கள் என அனைத்தும் எரிந்து சாம்பலாகப் போகிறது. அதனால், கார்பன் துகள்கள் மட்டுமல்லாமல், ஒசோன் படலத்திற்கு தீங்கு விளைவிக்கும், பல்வேறு, கரிம மூலக்கூறுகள், மற்றும், முக்கிய நகரங்களில் உள்ள மக்கள் தொகை மற்றும் அங்கே பயன்படுத்தப்படும் கட்டுமானப் பொருட்கள், மற்றும் அவற்றிலிருந்து வெளிப்படும் நச்சுமூலக்கூறுகள், என அனைத்தையும் அனுமானித்து இப்புதிய ஆய்வு மேற்கொள்ளப்பட்டுள்ளது.

உதாரணமாக, அடர்வான மக்கள் பெருக்கமும் கட்டுமானமும் கொண்ட இந்திய நகரம் ஒன்றில் வீசப்படும் ஒரேயொரு அணு குண்டின் விளைவும், அதே தன்மை கொண்ட அணு குண்டுகளை வேறுவித கட்டுமானப் பொருட்கள் பயன்படுத்தப்பட்ட கட்டிங்களையும், மக்கள் தொகை மிகவும் குறைவாகவுமுள்ள ஐரோப்பிய நகரங்களில் வீசப்படும் 10 குண்டுகளின் விளைவும் ஒன்றாகயிருக்கலாம்.

அதேபோல் 1,00,000 டன்கள் (TNT) திறனுடைய குண்டுகள்தான் அதிக பாதிப்பை ஏற்படுத்தும் என்றில்லை. ஒரு அணுஆயுதத்தின் பாதிப்பு எல்லைகள் ஒன்றோடொன்று மேற்பொருந்தாமல் அருகருகே, வெறும் 15,000 டன்கள் திறனுடைய மூன்று குண்டுகள் அதற்கிணையான அல்லது அதைவிட அதிகமான பாதிப்பை உண்டுசெய்துவிட முடியும் என்றும் குறிப்பிடுகின்றனர்.

1980களில் ஆய்வறிக்கை வெளியிட்ட அதே குழுக்களுள் சிலவும் புதியகுழுக்களும் சில ஆய்வு முடிவுகளை 2007 ஆம் ஆண்டு வெளியிட்டுள்ளனர். 1980 மற்றும் 2007 ஆகிய இரண்டு ஆய்வுகளின் முடிவுகளையும் , உமிழப்படும் கார்பன் துகள்களின் அளவடிப்படையில் ஒப்பிட்டுச் சுருங்கச் சொன்னால் எளிதாகயிருக்கும்.

1980 களில் ஒரு அணுக்கருக் குளிர்காலம் என்றழைக்கப்படும் ஆண்டுமுழுமைக்குமான குளிர்கால நீட்டிப்பை உருவாக்க சுமார் 180 டெராகிராம்கள்(10^12) கார்பன் துகள்கள் உமிழப்படவேண்டும் என்றுகுறிப்பிட்டனர். ஆனால், தற்போதைய ஆய்வின்படி அதில் பாதி வெளியிடப்பட்டால் போதும், அதாவது 75 டெராகிராம்கள் இருந்தால், கடந்த 1000 ஆண்டுகளில் இல்லாத அளவிற்கு பூமியின் வெப்பநிலை குறையும் என்றும், அப்படிக் குறையுமானால், Ice Age(medieval) என்ற வழங்கக்கூடிய பனிக்காலமே உருவாகிவிடும் என்றும் குறிப்பிடுகின்றனர். இது அணுக்கருக்குளிர்காலத்தைவிட ஆபத்தானது.

மேலும், தற்போதைய ஆய்வின்படி, வெறும் 5 டெராகிராம்கள் அளவிற்கு கார்பன் துகள்கள் உமிழப்பட்டால் போதும், உலகின் பல்வேறு பகுதிகளில் பருவகாலச் சுழற்சியில் 40% சதவிகித பாதிப்பு உண்டாகும் என்றும் குறிப்பிடுகின்றனர். அணுஆயுதங்களின் நேரடி பாதிப்புகளால் சுமார், ஒரு கோடி மக்கள் இறந்தால், அது ஏற்படுத்தும் சுற்றுச்சூழல் சீர்குலைவு சுமார் 100-200 கோடி மக்களை உலகெங்கும் பலிகொண்டுவிடும் என்று குறிப்பிடுகின்றனர்.

இந்தியா 1974ஆம் ஆண்டு செய்த சோதனையில் பயன்படுத்தப்பட்ட அணு ஆயுதத்தின் வீச்சு சுமார் 15,000 டன்கள் என்பதை நினைவுபடுத்திப்பார்ப்பது நன்று. மேலும், அதிலிருந்து வரும் கார்பனின் அளவு சுமார் 3.7 டெராகிராம்கள் என்றும் குறிப்பிடுகின்றனர். இது உணர்த்தும் செய்தி இந்தியாவும், பாகிஸ்தானும், தங்களிடமுள்ள மிகக்குறைந்த திறனுடைய ஒரு அணு குண்டைப் பரிமாறிக்கொண்டால் போதும், கூட்டாகச் சுமார் 6.7 டெராகிராம்கள் அளவிற்கான கார்பனை வெளியிடும். உலக தட்பவெப்ப மாறுபாட்டை ஏற்படுத்த தற்போது வெறும் 5 டெராகிராம்கள் போதும் என்ற ஆய்வு முடிவை இங்கே மீண்டும் நினைவுபடுத்த விரும்புகிறேன். இந்தியாவிற்கும் பாகிஸ்தானிற்க்கும் இடையே ஒரு அணு ஆயுதப் போர் துவங்கினால் போதும் அது ஒட்டுமொத்தமாக ஆசியா, ஐரோப்பா மற்றும் ஆப்ரிக்கா என அனைத்து மக்களையும் ஒட்டுமொத்த அழிவிற்குத் தள்ளிவிடும்.

அரசுகளுக்கும் மக்களுக்குமான செய்தி

இனி, உலகின் ஒரு மூளையில் அணு ஆயுதப் போர் நடப்பதற்கான சாத்தியம் இருப்பின் அது ஒட்டுமொத்தமாக மனித இனத்தின் அழிவிற்கான சாத்தியம் என்பதை உணர்தல் வேண்டும். வல்லரசுகள், வளரும் நாடுகளுக்குள்ளான போர்களைத் தூண்டிவிட்டு அதில் குளிர்காய முடியாது. (இவ்வாய்வறிக்கைப் படி அவர்களுக்கு இன்னும் குளிர் அதிகமாகலாம்) மேலும், தீவிரவாதிகளின் கைகளில் "dirty bombs" என்று சொல்லப்படும் மிகச்சிறு அணுஆயுதங்கள் அகப்படாமல் இருக்கவேண்டியதன் முக்கியத்துவத்தையும் வலியுறுத்துகின்றன.

ஈராக் மற்றும் ஆஃப்கானிஸ்தானின் மலைப்பகுதிகளில் சமீபத்தில் அமெரிக்கா இப்படிப்பட்ட வீரியம் குறைந்த "dirty bombs" எனப்படும் அணுஆயுதங்களைப் பயன்படுத்தியதாகவும் சில செய்திக் குறிப்புகள் குறிப்பிடுகின்றன.[**] இத்தகவல் உண்மையாகயிருப்பின் இது உலகின் கவனத்திற்கு வராமல் போனது அனைவரும் வருந்த வேண்டிய விசயமே. இப்படியான திருட்டுத்தனமான தாக்குதல்களை வல்லரசுகள் உடனே கைவிட்டாகவேண்டும்.

இனி், உலகின் ஏதோயொரு பகுதியில் ஒரு அணுஆயுதப் போர் உருவாகும் போர்ச்சூழல் இருந்தாலும், அது ஒட்டுமொத்த மனித இனத்திற்கே அழிவாக முடியும் அபாயம் இருக்கிறது் என்று பல முடிவுகளை அரசாங்கங்களுக்கு முன்மொழிகின்றனர் இவ்வாய்வாளர்கள். மேலும், அதீத ஆபத்தானவை மற்றும் மிகப்பெரிய அளவிலே மனித அழிப்பை ஏற்படுத்துபவை என்ற அடிப்படையில், இவ்வாய்வாளர்கள் அணுஆயுதத்தையும் அதன் நேரடியான மற்றும் மறைமுகமான பாதிப்புகளுக்கும் முக்கியத்துவம் அளிக்கின்றனர் என்றும், போரில், ஏற்படும் பல்வேறு குண்டுவீச்சுக்கள், அதிலிருந்து வரும் கார்பன மற்றும் நச்சுப்பொருட்களையும் இணைத்து சிந்திக்க வேண்டும் என்றும் குறிப்பிடுகின்றனர்.

தற்போதைய காலகட்டத்தில், புவி வெப்பமடைதலால் உலகெங்கிலும் உணவு உற்பத்தியில் பாதிப்புகள் மிகவும் அதிகமாகிவிட்ட நிலையில் இவ்வாய்வறிக்கை மிக முக்கியமான மற்றும் அறிந்து கொண்டு செயலாற்ற வேண்டிய பல கடமைகளை மனிதகுலத்திற்கு வலியுறுத்தியிருக்கிறது.

மேலேயுள்ள படம் போக்ரானில் 1974ல் செய்யப்பட்ட சோதனைக்குப் பின் எடுக்கப்பட்டது. உபரியாக இங்கே இருக்கட்டும் என்று கொடுத்திருக்கிறேன்.

1998-ல் செய்யப்ப்பட்ட சோதனைக்குப்பின் போக்ரானிலிருந்து 5 கி.மீ தொலைவில் இருக்குமொரு கிராமத்துப் பெரியவரின் நேர்முகத்தைக் காண நேரிட்டது. அவர் ஒரு கேள்வியை முன்வைத்தார்.

"பூமிக்கடியில் ஒரு சூரியன் புதைக்கப்பட்டது என்று பெருமைப்படுகிறீர்கள், அப்படியானால், அப்பகுதியில், வலைகளில் வாழ்ந்த முயல்கள், கீரிகள், பாம்புகள் மற்றும் அங்கிருந்து சிறிய உயிர்களெல்லாம் எப்படி இதைத் தாங்கிக்கொள்ளும்????"

இப்பூமி மிகவும் அழகான மற்றும் இரம்யமானதொரு் அமைதிப்பூங்காவாக மாறிவிடும், மனிதன் மட்டும் இல்லாவிட்டால் - ஆல்பர்ட் ஐன்ஸ்டீன்.

இப்பூமியின் அழிவிற்கும் அதனுடாக தனது அழிவிற்கு வழிவகை செய்யும் மனிதகுலக் கண்டுபிடிப்பாக ஒன்று இருக்குமென்றால் அது தேசமும், தேசியமுமாக மட்டுமே இருக்கும்.

"National Interest" என்ற பெயரில் நடைபெரும் மனிதகுல அழிப்பிலிருந்து மீளவேண்டுமெனில், "On Human interest" என்ற பெயரில் தேசங்களையும், தேசியங்களையும் அழிக்கவேண்டியிருக்கும்.

*************************************************************************************************

தகவல் மூலங்கள்

இக்கட்டுரை "Environmental consequences of nuclear war", Physic today, page37, Dec 2008 - ல் வெளிவந்த கட்டுரையையும் அதில் குறிப்பிடப்பட்டிருக்கும் சில தரவுகளையும் அடிப்படையாகக் கொண்டு எழுதப்பட்டது.

** http://www.willthomasonline.net/willthomasonline/US_Veteran_Reveals_Atomic_Bombs.html
http://www.willthomasonline.net/willthomasonline/Sleight_Of_Nuke.html

படம் 1: http://img.dailymail.co.uk/i/pix/2007/11_02/057bomb_468x454.jpg
படம் 2: http://science.nasa.gov/newhome/essd/atmos_layers.htm
படம் 3: http://www.fas.org/nuke/guide/india/nuke/first-pix.htm

டார்வின்-200, பரிணாமக்கொள்கை-150

kaiyedu@gmail.com (கையேடு) — Fri, 09 Jan 2009 10:40:00 +0000

Image: http://fisher.berkeley.edu/cteg/images/photos/darwin.jpg

2009 - சார்லஸ் டார்வினின் 200வது பிறந்தநாள் காணும் ஆண்டாகவும், பரிணாமக் கொள்கையினை வெளியிட்டு 150ஆவது நிறைவு ஆண்டாகவும் திகழ்கிறது. 19 -ஆம் நூற்றாண்டின் சிறந்த இயற்கை விஞ்ஞானியாகவும், பரிணாமக் கொள்கையின் தந்தையாகவும் போற்றப் படுபவர் சார்லஸ் டார்வின். தமது வாழ்நாளில் பரிணாமக் கொள்கை குறித்து ஏறத்தாழ 16 புத்தகங்களும், 5000க்கும் மேற்பட்ட கட்டுரைகளும் எழுதியவர் டார்வின்.

பிறப்பு : 12 பிப்ரவரி 1809, இறப்பு: 19 ஏப்ரல் 1882,

பரிணாம விளக்கங்கள் உள்ளடக்கிய "Origin of species" வெளியீடு - 22 நவம்பர்1859

டார்வீனது 200 ஆவது பிறந்த ஆண்டு மற்றும் பரிணாமக் கொள்கையின் 150 ஆவது நிறைவு ஆண்டு ஆகிய இரண்டையும் கொண்டாடும் வண்ணம் அறிவியல் கட்டுரைகளுக்கான சர்வதேச இதழ்களுள் முதன்மையானவற்றுள் ஒன்றான "அறிவியல்(science)" வாரயிதழ் ஒரு மாத காலத்திற்கு, பரிணாமம் குறித்த சிறப்புக் கட்டுரைகள் மற்றும் உரையாடல்களையும் தொகுக்கவிருப்பதாக அறிவித்திருக்கிறது, இத்தொகுப்பு அனைவருக்கும் இலவசமாகயிருக்காது, ஆனால், "Origins" என்ற தலைப்பில் ஒருசிறப்பு வலைப்பதிவு ஒன்றைத் துவங்கியிருக்கிறது. இவ்வலைப்பதிவிலும் பரிணாமம் மற்றும் டார்வின் பற்றிய செய்திகள், ஆய்வுகள், விமர்சனங்கள் என பலவும் இடம்பெறும் என அறிவித்திருக்கிறது. ஆனால், வலைப்பதிவின் கட்டுரைகளை முழுவதும் இலவசமாக வாசிப்பதற்கு, பெயர்ப் பதியவைத்தலும் அதற்காக வழங்கப்பட்ட கடவுச்சொல்லும் தேவைப்படும்.

இவ்வலைப்பதிவின் முதல் கட்டுரை உயிர்த்தோற்றம் பற்றிய டார்வினின் பார்வை மற்றும் நவீன கண்டுபிடுப்புகள் மற்றும் கருத்துக்கள் என விரிகிறது. உயிரினங்களின் தோற்றம் குறித்து விவரித்த டார்வினின், உயிர்த்தோற்றம் பற்றிய கருத்து குறித்தும் பேசப்பட்டிருக்கிறது.

டார்வினின் பரிணாமக் கொள்கை பற்றி ரிச்சர்ட் டாக்கின்ஸ் "ஒருவேளை வேற்று கிரகம் ஒன்றில் பூமியை ஒத்த உயிரினங்களின் தோற்றம் இருந்து, மனிதனையொத்த ஒருவுயிரினமும் இருந்து அவ்வுயிரினத்தை நான் பூமியில் சந்திக்க நேர்ந்தால், அவர்களை நோக்கிய எனது முதல் கேள்வி இதுவாகத்தான் இருக்கும்; பரிணாமக் கொள்கையை கண்டுபிடித்துவிட்டீர்களா....!!!???" என்று குறிப்பிடுகிறார்.

ரிச்சர்ட் டாக்கின்ஸ் - பரிணாமம் பற்றிய ஒரு மரபணுப்பார்வை என்ற கருத்தினை முன்னிருத்தி "The selfish gene" மற்றும் "The God Delusion" ஆகிய புகழ்பெற்ற புத்தகங்களை எழுதியவர்.

டார்வின் பற்றிய தனிப்பட்ட செய்திகள், பிறப்பு, இறப்பு, குடும்பம் போன்ற தகவல்களை இங்கே காணலாம்.

இனி டார்வின் மற்றும் பரிணாமக் கொள்கை பற்றிய எனது பார்வை

எனக்கு மிகவும் பிடித்த அல்லது ஆர்வமுடன் வாசிக்கும் ஒரு விஞ்ஞானத்துறை பரிணாமம். என்னை மிகவும் கவர்ந்த விஞ்ஞானிகளுள் முக்கியமானவரும் முதன்மையானவரும் சார்லஸ் டார்வின்.

நியூட்டன், கலிலியோ, ஐன்ஸ்டீன், நீல் போர், மாக்ஸ் பிளான்க், ஹாக்கிங்ஸ், ஃபியன்மேன் எனப்பல உலப்புகழ் பெற்ற விஞ்ஞானிகள் சிறந்த கண்டுபிடிப்புகளையும், அறிவியல் சித்தாந்தங்களையும் முன்மொழிந்த சிந்தனையாளர்கள் என்பதில் எனக்கு மாற்றுக்கருத்தில்லையெனினும், அவர்கள் அனைவரும் ஏற்றுக் கொண்டுப் பயன்படுத்துமொரு நியூட்டனின் புகழ்பெற்ற வாசகம் "On the shoulders of the giants". பலரது சிந்தனைகளைப் புரிந்து கொண்டு பின்னர், புரிதலின் விளிம்புகளை மாற்றியும் திருத்தியும் அமைத்தனர் என்பதற்கான ஒரு தன்னிலை விளக்க வாசகமாக இதனை நோக்கலாம்.

ஆனால், இயற்கை பற்றிய ஒரு ஆழமான மற்றும் அகன்ற பார்வையையும், சில தாவர மற்றும் உயிரியல் ஆய்வுகளையும் அடிப்படையாகக் கொண்டு ஒரு புதிய சிந்தனையைத் தோற்றுவித்து அச்சிந்தனை முறையையே டார்வினிஸம் என்று அழைக்குமளவிற்கு ஒரு புதியசெய்தியை உலகுக்கு அறிவித்தவர் டார்வின்.

மேலும், பூமியில் தோன்றி ஊன்றிய பல்வேறு கலாச்சாரங்கள், மற்றும் அக்கலாச்சாரக் குழுக்களின் நம்பிக்கைகள் எனப் பலவகைப்பட்ட மனித சமூகக் குழுக்களுள் இருந்த ஒற்றுமைகளுள் ஒன்று படைப்புத்தத்துவம். நேரடியாகவோ அல்லது மறைமுகமாகவோ படைப்புத்தத்துவம் மனிதச் சமூகத்தின் அடிப்படை நம்பிக்கைகளுள் ஒன்றாகயிருந்தது. அப்படியானதொரு சூழலில், மொத்த உலகத்தின் பார்வையிலிருந்து தனித்து ஒரு சிந்தனை மற்றும் அதன்பயன் எழுந்த மாற்றுப்பார்வையை முன்வைப்பது என்பது எளிதல்ல.

டார்வினின் 200வது பிறந்த ஆண்டாக கொண்டாடும் வேளையில் இவ்வாண்டின் முதல் இடுகை டார்வின் குறித்து எழுதநேர்ந்ததில் மகிழ்ச்சி.

மனிதன் குரங்கிலிருந்து தோன்றவில்லை - பரிணாம விளக்கமும், விளக்கப் பரிணாமமும்

kaiyedu@gmail.com (கையேடு) — Thu, 13 Nov 2008 17:42:00 +0000

மனிதன் குரங்கிலிருந்து தோன்றவில்லை - பரிணாமக் கொள்கை குறித்த தவறான புரிதலுக்கான விளக்கமும், பின்னூட்டத்தின் விளக்கப் பரிணாமமும்

1. பரிணாமம் என்றால் என்ன?

பரிணாமம் என்பது இயற்கை மாற்றத்தினால் ஒரு உயிர் எப்படிப் பலவகை உயிரிகளாக மாறுகிறது/மாறியது என்பதை விளக்கும் ஒரு உயிரியல் கொள்கை. பரிணாமம் உயிரின் தோற்றத்தை விளக்கும் ஒரு கொள்கையல்ல, மாறாக உலகிலுள்ள அனைத்து "உயித்தொகுப்புகளும்" (species) காலச்சக்கரத்தில் பின்னோக்கி நகர்ந்தால் ஒரே மூதாதையரைக் கொண்டிருப்பவை எனபதை விளக்கும் ஒரு கொள்கை. சுருக்கமாகச் சொன்னால் "எல்லோரும் ஒரு மரத்துப் பறவைகளே" என்பதுதான் பரிணாமக் கொள்கையின் அடிப்படைச் சாரம்.

2. பரிணாமத்தை எப்படிப் புரிந்து கொள்வது?

இவ்வுலகில் தோன்றிய முதல் உயிர் தனது சூழலுக்கு ஏற்ப தன்னை தகவமைத்துக் கொண்டு தனது இருத்தலுக்காக உள்ளான மாற்றமே பரிணாமம். மிக முக்கியமானதொன்றைக் குறிப்பிட விரும்புகிறேன், இம்மாற்றத்தை அவ்வுயிர் தேர்ந்தெடுக்கவில்லை மாறாக இயற்கை நிகழ்வாக சுயமாக நிகழ்கிறது. இம்முதல் உயிரிலிருந்து பிரிந்து விரிந்த ஒரு மரமாக இன்றைய அனைத்து உயிர்களையும் நோக்கலாம். இச்சூழல் மாற்றத்தினடிப்படையில் தகவமைத்துக் கொள்ளும் பண்பையே சார்லஸ் டார்வின் "natural selection" என்று தனது பரிணாமக் கொள்கையில் குறிப்பிடுகிறார்.

3. அது என்ன பரிணாம மரம்?

படம் 1. http://www.peabody.yale.edu/exhibits/treeoflife/convergent.html

பரிணாமத்தை ஒரு மரமாக பாவித்து விளக்குகின்ற முறையை "phylogeny" என்றழைக்கின்றனர். இதற்கான விளக்கப்படத்தை (படம் 1.)காணலாம். ஒரு உயிர் முதலில் தோன்றி அதன் பின்னர் வெவ்வேறு காலத்தில் சூழல் மாற்றங்களுக்கேற்றவாறு வெவ்வேறு வகையான உயிர்த்தொகுப்புகளாக மாறியதைப் பற்றிய ஒரு விளக்கத்தையே இப்பரிணாம மரம் விளக்குகிறது. இம்மரத்தின் ஆதி புள்ளியிலிருந்து நகர்ந்தால் முதலில் கிளைக்கும் புள்ளி வெவ்வேறு வகை உயிரிகளாகப் பிரிந்த தருணத்தைக் குறிக்கிறது. ஒரு கிளையின் நுணியில் இருந்து பின்னோக்கி நகர்ந்தால் சந்திக்கும் முதல் கிளைத்தல்-புள்ளி மிகச் சமீபத்தில் அவ்வுயிரினம் மாற்றம் அடைந்த தருணத்தைக் குறிக்கிறது. சூழலுக்கேற்றவாறு தன்னை மாற்றிக் கொள்ளும் போது மாற்றங்கள் சீரானவையாகவும் இருக்கலாம் சீரற்ற தாவல்களாகவும் இருக்கலாம்.

அதில் மனிதனும் குரங்கும் ஏதோவொரு சூழல் மாற்றத்தினால் ஒரு புள்ளியில் துவங்கிய இரண்டு உயிரிகள். ஒரே துவக்கப்புள்ளியைக் கொண்ட இரண்டு சிறு கிளைகள் மிகவும் நெருங்கிய உடல்கூறுகள், மற்றும் வாழ்வுமுறைகளைக் கொண்டதாகவும்,(நமது குடும்பத்தில் இருக்கும் நெருங்கிய உறவினரைப் போல) ஒரு பெருங்கிளையினைத் துவக்கப் புள்ளியாகக் கொண்டப் பலவகை உயிரிகளுக்கு அடிப்படையான பொது உயிரமைப்பும் கொண்டிருக்கும் (நமது தூரத்து உறவினர் போல). ஆனால், சிறுகிளைகள் வெகுதூரத்தில் இணைந்தாலும் அவற்றுக்கிடையே அடிப்படையானதொரு பெரும் ஒப்புமை இருக்கலாம். இதனாலேயே மருந்துகளுக்கான சோதனைகள் முதலில் எலிகளில் பெரும்பாலும் செய்யப்படுகின்றன. அதாவது மனிதன் உள்ளிட்ட பல்வேறு உயிர்த்தொகுப்புகள் துவங்கும் ஒரு பெரும்கிளையின் துவக்கப்புள்ளியில் இருப்பவை எலிகள்.
அப்பெருங்கிளையில் இருக்கும் அனைத்து உயிரிகளுக்கும் அடிப்படையானதொரு ஒப்புமை இருக்கும்.

4. குரங்கிலிருந்து மனிதன் தோன்றினானா?

கண்டிப்பாக இல்லை. மனிதன் குரங்கிலிருந்து தோன்றவில்லை. இப்படியான கருதுகோல், பரிணாமத்தைப் பற்றிய தவறானபுரிதல்களில் முதன்மையானது. ஒருவேளை, இப்படியான கருதுகோலை உருவாக்கிப் பரப்பியதில் சமூகத்தில் விரவியிருந்த நம்பிக்கைகள் மற்றும் ஊடகங்களின் பங்கு முதன்மையானதாக இருக்கலாம். அல்லது ஏற்கனவே தனக்கென்று சிறப்பான குணாதீசியங்கள் உண்டு என்றும், தான் மற்ற விளங்குகளிடமிருந்து தனித்த ஒரு சிறப்பான உயிரி என்ற எண்ணத்தில் இருக்கும் போது "நீயும் குரங்கும் நெருங்கிய உறவினர்கள்" என்பதை ஏற்றுக் கொள்ள முடியாத அகம்பாவமாகயிருக்கலாம்.

5. அப்படியானால் குரங்கிற்கும் மனிதனுக்கும் உள்ள ஒப்புமையை எப்படிப் புரிந்து கொள்வது?

படம் 2. http://evolution.berkeley.edu/evolibrary/article/0_0_0/evo_05

மனிதனும் குரங்கும் பரிணாம மரத்தில் பின்னோக்கிச் சென்றால் சமீபத்திய புள்ளியில் துவங்கிய இரு உயிரிகள் (நெருங்கிய உறவினர்கள்). தமக்குள்ளே உடல் கூறுகள் மற்றும் பண்புகள் எனப் பலவற்றில் பெரும் ஒற்றுமையைப் பகிர்ந்து கொள்ளும் இரு உயிரிகள்.

6. இப்போ கடைசியா என்னதான் சொல்ல வர்றாங்க இந்த பரிணாம உயிரியலாளர்கள் (evolutionary biologists)?

படம் 3. ( http://evolution.berkeley.edu/evosite/misconceps/IBladder.shtml)

பரிணாமம் என்பது ஒரு மரத்தைப் போன்றது, ஏணியைப் போன்றதல்ல. ஒற்றைச் செல் உயிரிகள் துவங்கி இன்றைய மனிதன் வரை சுழல் மாற்றத்திற்கிணங்க தன்னை மாற்றியமைத்துக் கொண்ட ஒற்றை உயிர் மூலக்கூறின் வெவ்வேறு வடிவங்களே இப்படியாகப் பரிணமித்திருக்கும் அனைத்து உயிரினங்களும். அதனால், அனைத்து உயிரிகளும் ஒன்றோடொன்று சக காலத்தில் உயிரோடிருக்க முடியும் (மிகவும் அபரிவிதமான திடீர் சூழல் மாற்றங்கள் நிகழாதவரை). எல்லோரும் ஒரு மரத்துப் பறவைகளே என்பதுதான் பரிணாமக் கொள்கையின் அடிப்படைச் சாரம்.

7. சரி அப்போ அந்த முதல் உயிர் எங்கிருந்து வந்தது?

முதலில் இக்கேள்விக்குப் பரிணாமக் கொள்கை பதிலளிக்கத் தேவையில்லை. ஏனெனில், ஏற்கனவே குறிப்பிட்டது போல் அது "உயிரின்" மூலத்தை விளக்கும் ஒரு கொள்கையல்ல, மாறாக "உயிர்த்தொகுப்புகளின்" மூலத்தை விளக்கும் ஒன்று. (It does not explain "origin of life", it (tries to) explains "origin of species").

இப்போ ஒற்றை உயிர் பற்றிய கேள்விக்கு வருவோம் அது பூமியின் கருப்பொருட்கள் மற்றும் சூழல் மாற்றங்களை முன்னிறுத்தி அனுமானிக்கப்பட்டது. அனுமானம் என்றாலும் ஆய்வங்களில் அப்படியான சூழலைச் செயற்கையாக உருவாக்கி உயிர் மூலக்கூறுகளின் அடிப்படைக் கட்டமைப்புகளை உருவாக்கியதன் மூலம் இவ்வனுமானம் தற்போது ஏற்புடையதாகயிருக்கிறது. முன்னரே, இங்கே( இறப்பு - உரையாடல் - II - உயிர்த் தோற்றம், செல்-அற...) சிறிது விளக்கியிருக்கிறேன்.

8. பரிணாமம் முழுமையடைந்துவிட்டதா? மேலும் பரிணாமம் நிகழுமா?

பரிணாமம் ஒரு தொடர் நிகழ்வு, அது நிகழ்ந்து கொண்டேயிருக்கும். உதாரணமாகச் சரியாகப் பள்ளி உணவு இடைவேளகளில் குழந்தைகள் மரத்தடிகளில் உணவு உட்கொள்வதால் சிதறுபவற்றை உண்பதற்காக அங்கே வந்தமரும் பறவைகள். (இது பரிணாம மாற்றமல்ல, தாங்கள் வாழ்ந்து கொண்டிருக்கும் சூழலுக்கேற்றவாறு உணவு வேட்டையை மாற்றிக் கொள்ளும் அப்பறவைகளின் செயல்பாடுகளுக்கான ஒரு மிக எளிமைப்படுத்தப்பட்ட ஒரு எடுத்துக்காட்டு மட்டுமே. இது போல பல எடுத்துக் காட்டுகளை நாம் எல்லோராலும் நினைவுக்கு கொண்டுவர முடியும்.) சரி இப்போது எதற்கு இவ்வெடுத்துக்காட்டு. பரிணாம மரத்தில் மனிதன் தவிர அனைத்து உயிரினங்களும் இன்றும் தங்கள் வாழ்வியல் ஆதாரத்திற்குத் தனது சூழல் மற்றும் இயற்கையுடன் நேரடியிணைப்பில் இருக்கின்றன. அதனால், பரிணாமம் முற்றுப்பெறாத தொடர் நிகழ்வு (மிகவும் அபரிவிதமான திடீர் சூழல் மாற்றங்கள் நிகழாதவரை).

9. மற்ற உயிரினங்கள் இயற்கைச் சூழலோடு இணைந்து வாழும் போது, இன்றும் பல உயிரினங்கள் அழிந்து கொண்டிருக்கின்றன என்று கூப்பாடு போடுவதேன்?

பரிணாமம் ஒரு தொடர் நிகழ்வாகயிருந்தாலும், பரிணாம மாற்றங்கள் நிகழும் கால அளவு பல்வேறு உயிரிகளின் ஆயுட்காலத்தோடு ஒப்பிடுகையில் பன்மடங்கு அதிகம். மனிதன் எனும் உயிரி தனது வாழ்வியல் சூழலை மாற்றிக் கொண்டதன் மூலம் இவ்வுலகில் ஏற்படுத்திய சூழல் மாற்றங்கள் மிகவும் ஆபத்தானது, மற்றும் அதிவிரைவானது.மிகக்குறுகிய காலத்திலேயே உலகின் இயற்கைச் சூழலை பெரிதும் நாசமாக்கிவிட்டது மனிதன் எனும் உயிரி (ஏறத்தாழ 2000 ஆண்டுகளுக்குள்). பரிணாம மாற்றங்கள் நிகழும் கால அளவோடு ஒப்பிட்டால் ஏறத்தாழ 4 அடுக்குகள்(மடங்கு அல்ல) சிறிய கால அளவு. இவ்விரைவான சூழல் மாற்றத்தினைத் தாக்குப் பிடிக்கமுடியாத பல்வேறு உயிரிகள் சத்தமில்லாமல் அழிந்து கொண்டிருக்கின்றன. "சில" உயிரினங்களைப் பொருத்தவரை 1000 ஆண்டுகளில் மாற்றம் என்பது அதிவிரைவான சூழல் மாற்றமே.

10. அப்படியானால் மனித உயிரி பரிணமிக்குமா?

இன்றைய சூழலைக் கருத்தில் கொண்டால் மனிதன் இனி பரிணமிப்பதற்கான சாத்தியக்கூறுகள் இல்லையென்று கருதுகின்றனர். இது தொடர்பாகச் சிலர் கருத்துக்களை கூறும் போது "மனிதன்" எனும் உயிரியிலிருந்து மற்றொரு பரிணாமம் நடை பெற்றால் மனிதன் அவ்வுயிரியின் முதல் உயிரை விட்டுவைக்க மாட்டான்" என்பது. இக்கூற்றைப் பகடிக்காக மட்டுமே பயன்படுத்துவோருண்டு. இதனை ஒரு கருதுகோலாக நோக்கினால் உடனடியாக இது சரியானதல்ல என்பது விளங்கிவிடும். பரிணாமம் என்பது ஒரு தொடர் நிகழ்வு, மேலும் அது நிகழும் கால அளவு மனிதனின் ஆயுட்காலத்தோடு ஒப்பிட்டால் மிக அதிகம். அதனால், மனிதன் எனும் உயிரி பரிணமித்துக் கொண்டிருக்கிறதா என்பதை உணர்ந்துகொள்வதே கடினம். இது மேலேயுள்ள கருதுகோளுக்கான எதிர் கருத்து மட்டுமே.

ஆனால், மனிதன் எனும் உயிரியின் சிறு கிளை மேலும் கிளைப்பதற்கான சாத்தியக்கூறுகள் இல்லை என்பதற்கு வேறு பல அறிவியல் சான்றுகளை முன்வைக்கின்றனர். அப்படியென்ன சான்று? மனிதன் இயற்கையிலிருந்து தன்னைப் பிரித்துக் கொண்டதாகக் கருதுகின்றனர். பெண்களுக்கு அதிகமாக உருவாகும் சொத்தைப் பல்லை இதற்கான சான்றுகளுள் ஒன்றாக நோக்கலாம். அதைப்பற்றிய விரிவான இடுகைக்கு முன் இப்படியொரு இடுகையின் அவசியம் இருப்பதை உணர முடிந்தது. அதனால் இப்பதிவு.

குறிப்பு:
பரிணாம உயிரியலை நான் ஆய்ந்து அறிந்தவனல்ல, வெறும் வாசிப்பும் மொழிபெயர்ப்பும் மட்டுமே. எனது புரிதலில் தவறிருந்தால் சு(கு)ட்டலாம்.
சுட்டிகளில் நேரடியாகவும் வாசித்துச் சரிபார்த்துப் புரிந்துகொள்ளலாம்.

பின்வரும், பகுதி அறிவியல் (என்ற) மதம் ! என்ற பதிவில் நிகழ்ந்த பின்னூட்ட உரையாடலினால் எழுதப்பட்டது.

புராண அவதாரங்கள் பரிணாமத்தைத்தான் குறிக்கின்றனவா?
கண்டிப்பாக சார்லஸ் டார்வினின் தொகுப்பிற்கிணையாக எந்த புராண, இதிகாச, புனித நூல்களிலும் விளக்கங்களோ ஆதாரங்களோ இல்லை என்பதை உறுதியாகச் சொல்ல முடியும்.

அதே சமயம், பரிணாமக் கொள்கையின் ஆழ்ந்த புரிதல்களுக்கிணையாக இல்லாவிடினும், உயிர்களுக்கிடையேயான ஒருவகை ஒப்புமையை மனிதன் எனும் உயிரி உணர்ந்ததன் விளைவாக அப்படியான கதைகளையும் வகைப்படுத்தல்களையும் தங்கள் இலக்கியங்களில் புகுத்தியிருக்கலாம். புராணத்தை எழுதியவனும் சிந்தனைத்திறனுடைய ஒரு மனிதனாகத்தானே இருக்க வேண்டும். மேலும், மனிதனின் சூழல் குறித்த பார்வைதானே இலக்கியங்களில் பதியவைக்கப் படுகின்றன. அவை நம்பிக்கைகளாக மாறுகின்றனவா அல்லது இதிகாசமாக மாறுகின்றனவா அல்லது புனித நூலாக மாறுகின்றனவா என்பது மனிதச்சமூகத்தின் சூழல் சார்ந்தது.

ஆனால், பரிணாமக்கொள்கையைத் தான் புராண இதிகாசங்கள் விளக்குகின்றன என்ற கூற்று மிகைப்படுத்தலேயன்றி வேறல்ல.

ஆனால், அனைத்து மதங்களையும் சார்ந்த இவ்விதிகாச புராணங்கள் புழங்கும் சமூகச் சூழல்களைப் பார்க்கும் போது ஒன்றைச் சொல்லத் தோன்றுகிறது.

"It is more difficult to unlearn, than learning" என்று ஒரு சொல்வழக்குண்டு. தற்போதைய சமூகச் சூழலில் இருக்கும் குழப்பங்களுள் முதன்மையானவற்றுள் ஒன்றாக இதைக் காண முடிகிறது "எதை, unlearn செய்வது..??..!!".

எந்தெந்தச் சூழலில் மனித சமூகம் எதை "learn" செய்கிறது எதை "unlearn" செய்கிறது என்பது சமூகவியல், உளவியல், ஊடகவியல் என பண்முகத் தன்மைகொண்டு பயணிக்குமொரு நீண்ட உரையாடலுக்கான கருப்பொருளாகயிருக்கலாம்.

இறுதியாக, உண்மை புராணத்தில் இருந்தால் என்ன, அறிவியலில் இருந்தாலென்ன, இயற்கை மற்றும் இயற்கை நிகழ்வுகள் முன் நாம் சிறுத்துப் போவதுதாம் உண்மை.

தகவல் மூலங்கள்:
http://www.peabody.yale.edu/exhibits/treeoflife/learn.html
http://evolution.berkeley.edu/evolibrary/article/0_0_0/evo_toc_01

பரிணாமத்தை விளக்கும் ஒரு குறும்படம்
http://www.peabody.yale.edu/exhibits/treeoflife/film_discovering.html

"Phylogeny" குறித்த விரிவான விளக்கங்களுக்கு
http://evolution.berkeley.edu/evolibrary/article/phylogenetics_02

படங்களுக்கருகேயுள்ள சுட்டிகளிலும் சில விளக்கங்கள் உள்ளன.

பின்னூட்டத்தில் ஒரு அனானி குறிப்பிட்டதற்கிணங்க species என்பதற்கான பயன்பாடு உயிரித்தொகுப்பு என பின்னர் திருத்தி வெளியிடப்பட்டுள்ளது.

சினிமா - தொடர் பதிவு

kaiyedu@gmail.com (கையேடு) — Tue, 04 Nov 2008 19:22:00 +0000

சினிமா பற்றிய கேள்விகளுக்கான தொடர் பதிவில், நண்பர் Sen's senses..- செந்திலின் அழைப்பை ஏற்று ஒரு சினிமா பதிவு.

1. எந்த வயதில் சினிமா பார்க்க ஆரம்பித்தீர்கள்? நினைவுதெரிந்து கண்ட முதல் சினிமா? என்ன உணர்ந்தீர்கள்?

எந்த வயது என்பது சரியாக நினைவிலில்லை. ஆனால், சிறு வயதில் அதிகம் விரும்பியது சண்டைக்காட்சிகள் நிறைந்த திரைப்படங்களையே. எனது ஆரம்பப் பள்ளி பருவங்களில் திரையுலகில் முக்கியப் பங்கு வகித்தவை டி.இராஜேந்தரின் திரைப்படங்களே. மேலும், அப்போதைய அவரது தி.மு.க ஆதரவினால் கொட்டகைக்குமுன் அவரது திரைப்படங்களுக்கென்று பிரத்யேகமாக கட்சிக்கொடி அலங்காரங்கள் இருக்கும். அதனால், அத்திரைப்படங்களே நான் ஆரம்ப காலங்களில் பார்த்தவையாகத் தற்போது நினைவில் இருப்பவை. மேலும், அப்போது எனக்கு தோன்றிய சந்தேகங்கள் இப்போதும் பசுமரத்தானிபோல் இருக்கின்றன. ஒரு திரைப்படத்தின் இறுதியில் டி.இராஜேந்தர் இறப்பதுபோன்ற காட்சி வரும். பின்னர் அவரது அடுத்த படம் வந்தவுடன் அவர்தான் போன படத்திலேயே இறந்துவிட்டாரே மீண்டும் எப்படி மற்றுமொரு படம் என்று அனைவரையும் (அவர்கள் என்னையும்)புரட்டியெடுக்கும் கேள்விகள் கேட்பதுண்டு?

எனது இக்கேள்வியைப்பற்றி எழுதும்போது எங்கேயோ வாசித்தது நினைவில் வருகிறது. கிராமத்தில் எம்.ஜி.ஆரின் திரப்படத்தைப் பற்றி இரு பெரியவர்கள் பேசிக்கொள்ளும்போது "எப்படி அந்த ஊர் கொட்டகையிலும் அவரது படம் ஓடுது, நம்மூர் கொட்டகையிலும் அவரது வேறொரு படம் ஓடுது?" என்று கேட்டாராம். அதற்கு அருகில் இருந்த பெரியவர் கூறினாராம் "இரண்டு கொட்டகைக்கும் அடியில் சுரங்கம் இருக்கிறது, அவர் அச்சுரங்கம் வழியே இரண்டு கொட்டகைக்கும் இடையே ஓடி ஓடி நடிப்பார் என்று. இடையில் சுரங்கத்திலேயே உடை மாற்றமும் செய்துகொள்வார்" என்று கூறினாராம். இதை ஏதோவொரு புத்தகத்தில்தான் வாசித்தேன், எழுதியவர் யார்? என்ன புத்தகம் என்பது தற்போது நினைவிலில்லை.

சரி விசயத்துக்கு வருவோம், எனக்கு நினைவிலிருப்பவை டி.ஆரின் ஆரம்பகாலத் திரைப்படங்களே, ஏனெனில், படம் பார்த்தபின் ஒரு வாரத்திற்கு எங்கள் விளையாட்டுகளில் எல்லாம் அவரது வசனங்களே தெரிக்கும். இது தவிர திரைப்படம் பார்க்காத தன் நண்பர்களுக்கு என் அக்கா கதை சொல்ல அதைக் கேட்டுக்கொண்டே பள்ளிக்கு நடந்து் செல்வது போன்ற நிகழ்வுகளே அவற்றை நினைவில் நிறுத்துபவை. ஆறாம் வகுப்பின் துவக்கத்திலிருந்து எனது பொழுதுபோக்கு சிந்தனை என அனைத்தையும் ஆக்கிரமித்தது கால்பந்தாட்டம் (எல்லாம் சேர்ந்த பள்ளி அப்படி). அதனால் அதன்பிறகு சினிமாவில் சொல்லிக்கொள்ளும்படி ஆர்வமேயிருந்ததில்லை. அதற்காக நான் பெரிய கால்பந்தாட்டவீரனென்றெல்லாம் நினைக்காதீர்கள், கடைசிவரை ஒரேயொரு ஆண்டு மட்டும் மாற்று ஆட்டக்காரனாயிருந்தேன், அதுவும் ஒரேயொரு ஆட்டத்தில் அவ்வளவுதான். மற்றபடி தெருவில் விளையாடுவதோடு சரி.

2. கடைசியாக அரங்கில் அமர்ந்து பார்த்த தமிழ் சினிமா?

கடைசியாக அரங்கில் பார்த்த சினிமா வேட்டையாடு விளையாடு என்று நினைக்கிறேன்.

3. கடைசியாக அரங்கிலன்றிப் பார்த்த தமிழ் சினிமா எது, எங்கே, என்ன உணர்ந்தீர்கள்?

கடைசியாக அரங்கிலன்றி, இணையத்தில் பார்த்த தமிழ் சினிமா "ஈ". என்ன உணர்ந்தேன் என்பதை அடுத்த கேள்வியில் சேர்த்து பதிலளித்துவிடுகிறேன்.

4. மிகவும் தாக்கிய தமிழ்ச்சினிமா?

மிகவும் தாக்கிய தமிழ்சினிமா என்பதைவிட சில சினிமாக்கள் இருக்கின்றன.
அவற்றில், உதிரிப்பூக்கள், மகாநதி, அன்பேசிவம், மொழி மற்றும் கடைசியாகப் பார்த்த "ஈ".
மேலே குறிப்பிட்ட பல திரைப்படங்கள் குறித்து பலரும் எழுதிவிட்டதால் "ஈ" குறித்த எனது பார்வையை மட்டும் குறிப்பிடுகிறேன்.

சினிமா குறித்த எனது பார்வை மிகவும் குறுகியது, மேலும், பல திரைப்படங்களை நான் பார்த்ததுகிடையாது, என்றாலும் திரு.சீவநாதன் இயக்கத்தில் வந்த "ஈ" திரைப்படம் என்னைப் பொறுத்த வரை நிச்சயமாக ஒரு மாறுபட்ட திரைப்படம். அதிலும் பல குறைகள் உண்டு ஆனால் அதைப் பற்றி இறுதியாகப் பார்க்கலாம். எனக்குத்தெரிந்த வரை மிகவும் குவிமையப்படுத்தி ஒரு முக்கியமான சமூகப் பிரச்சனையை பகிரங்கமாக வேறெந்த படமும் பேசியதில்லையென்றே கருதுகிறேன். இத்திரைப்படத்தினைப் பல வகைகளில் அனுகலாம். நூறு ரூபாய்க்காகத் திருட்டுத்தனமாக செய்ல்படும் பிணவறைத் தொழிலாளியோ, அல்லது அப்பேட்டை தாதாவோ அல்லது அவனது கையாளோ ஏதோயொரு வல்லரசின் பின்புலத்தில் நடக்குமொரு மிகப்பெரிய ஆபத்திற்குத் துணைபோகலாம் அவருக்குத் தெரியாமலேயே, அல்லது அப்படியான மலினப்பட்ட இலஞ்ச இலாவன்யமும் அறியாமையில் இருக்கும் மக்கள்தான் அவ்வலரசுகளுக்கு தேவையாகவும் இருக்கலாம். உலகமயமாக்கலினால் உருவாகக்கூடிய மோசமான விளைவுகளுள் ஒன்றை இத்திரைப்படம் நிச்சயம் தோலுரித்திருக்கிறது. இதே போல சமூகச் சிக்கல்களை நேரடியாகத் தாக்கிய வேறு சில திரைப்படங்கள் இருந்தாலும், ஏதோயொரு வகையில் ஒரு அரசியல் அடையாளத்தையே அவை முன்னிறுத்தின என்பது எனது பார்வை.
ஆனால், "ஈ" திரைப்படத்தில் வணிக ரீதியான சிலவற்றை சேர்த்திருந்தாலும் இரண்டு விடயங்களைக் குறையாகக் காண்கிறேன்.

ஒரு முக்கியமான சமூகப் பிரச்சனையை முன்னிறுத்தியது பாராட்டப்படவேண்டியதே, ஆனால், அனைத்து மருத்துவர் மற்றும் அனைத்து மருத்துவச் சோதனைகள் குறித்தும் ஒரு நிரந்தர பீதியையும், அச்சத்தையும் உருவாக்கி அதனை அப்படியே விட்டுவிட்டதை ஒரு குறையாகவே காண்கிறேன்.
அதைவிட முக்கியமாக அதே திரைப்படத்தில் வழக்கமான இதிகாச, புராண கதைகளின் அடிப்படையான வாய்ப்பட்டைப் பயன்படுத்தும் வழக்கமான தமிழ்சினிமா பாணியிலேயே முடித்திருப்பது. மக்களுக்கு ஏதோவொரு சமூகப் பிரச்சனையென்றால், உடனே அநாதரட்சகனாகவும், அவதாரமாகவும் யாராவது தோன்றி தீமையை அழித்துவிட்டு மக்களைக் காப்பாற்றுவது. மக்கள் தங்கள் சமூகப் பிரச்சனைகளுக்காக சிந்தித்து அதற்காக உழைக்கவோ போராடவோ வேண்டாம், கைகளை மேல்தூக்கி ஒரு தவத்தையோ, முறையீடையோ வைத்தால் போதும், அங்கே நாயகன் தோன்றுவார் என்ற புண்ணாக்குத் தனத்தை எப்போதுதான் விடுவார்களோ தெரியவில்லை. (சரி, இன்றும் நமது குழந்தைகளுக்கு ஒரு யானை, மக்களை ஆட்சி செய்யப் போகும் அரசரைத் தேர்ந்தெடுத்தது என்ற அம்புலிமாமாக் கதைகளைத்தானே சொல்லிகொண்டிருக்கிறோம், அதனால் அதன் நீட்சி இப்படித்தான் இருக்கும்.) இந்த அடிப்படையிலேயே "ஈ" திரைப்படத்திலும் நெல்லைமணி என்ற ஒரு போராளி/தீவிரவாதி இப்படிப்பட்ட மருத்துவர்களைக் கொல்வார், பின்னர் முடிவில் அதனையே நாயகனும் தொடர்வார். மிகவும் முக்கியமான சமூகப் பிரச்சனையைக் கதையில் கையாண்டுவிட்டு, கடைசியில் அதற்கான முடிவாக தீவிரவாதத்தை முன்வைப்பதைப் போன்ற தோற்றத்தை ஏற்படுத்தியது என்றுதான் சொல்லவேண்டும். இவை இரண்டும் எனது பார்வையில் "ஈ" திரைப்படத்தின் குறைபாடுகளாகக் காண்கிறேன்.

5.அ உங்களை மிகவும் தாக்கிய தமிழ்ச்சினிமா-அரசியல் சம்பவம்?

ஒன்றுமில்லை.

5-ஆ. உங்களை மிகவும் தாக்கிய தமிழ்ச்சினிமா-தொழில்நுட்ப சம்பவம்?

எனக்கு சினிமா குறித்த தொழில் நுட்ப அறிவு சுத்தமாகக் கிடையாது. ஆனால், (அக்காலத்தைய) புதிய தொழில்நுட்பம் ஒன்று மிகவும் அனுபவித்தது, வியந்தது இன்றும் நினைவிலிருக்கும் ஒன்று என்றால் அது முப்பரிமாண விளைவுகளோடு வந்த "மைடியர் குட்டிச் சாத்தான்" திரைப்படம். பல இடங்களில் ஏமாந்த அனுபவம் இன்றும் நினைவில் இருக்கிறது.

6. தமிழ்ச்சினிமா பற்றி வாசிப்பதுண்டா?

தீவிரமாக வாசிப்பதில்லை, அவ்வப்போது உண்டு.

7.தமிழ்ச்சினிமா இசை?

தமிழ்த்திரைப்படப் பாடல்கள் மட்டுமே எனது இசை குறித்த அறிவு. திரைப்பாடல்களில் எல்லா சூழ்நிலைகளுக்கும், காலத்திற்கும் ஏற்ற இசையும் பாடல் வரிகளும் உண்டு என்றே கருதுகிறேன்.

8. தமிழ் தவிர வேறு இந்திய, உலக மொழி சினிமா பார்ப்பதுண்டா? அதிகம் தாக்கிய படங்கள்?

"உலக மொழி சினிமா? " இக்கேள்வி ஆங்கிலத்தைக் குறிக்கிறது என்று நினைக்கிறேன். எனது பார்வையில் எல்லா மொழிகளும் உலக மொழியே.. :)

தாய்மொழியல்லாத வேற்றுமொழிப் படங்கள் என்றால் கடந்த 5 ஆண்டுகளாக அதிகம் பார்த்ததுண்டு.
ஹிந்தி, சுத்தமாகப் புரியாது, அதையும் மீறி ஹிந்தியில் பார்த்த ஒரு படம் "லகான்" மட்டுமே.

அநேகமாக அனைத்து புரூஸ்லீயின் திரைப்படங்களும் பார்த்ததுண்டு. எல்லாமே தாக்கும் படங்கள்தான்..:) ஒரு ஆர்வக்கோளாரில் ஓராண்டு காலம் குங்ஃபூ வகுப்புக்குச் செல்லும் அளவிற்குத் தாக்கியவை.

பல ஆங்கிலப் படங்கள் பார்த்ததுண்டு மனதளவில் பெரிய தாக்கத்தை ஏற்படுத்தியவை மூன்று ஆங்கிலத் திரைப்படங்கள்.
The Pianist, Life is Beautiful.

மூன்றாவது் திரைப்படம் "Wait until dark" - இது ஒரு கருப்பு-வெள்ளைத் திரைப்படம். படம் முழுவதும் ஒரு பூட்டிய வீட்டுக்குள் ஒரு கண்தெரியாத பெண் மற்றும் அவளது கணவன் இல்லாத நேரத்தில் அவளுக்குத் தெரியாமல் அவ்வீட்டில் பதுங்கும் இரண்டு கொலைகாரர்கள் என நீளும். அந்நடிகையின் பெயரோ அல்லது அத்திரைப்படம் குறித்த வேறெந்த குறிப்புமோ நினைவிலில்லை, யாருக்காவது தெரிந்தால் தெரியப்படுத்துங்கள். அந்நடிகையின் இறுதிக்காட்சி நடிப்பு நிச்சயம் பிரமிக்க வைக்கும்.

ஆங்கிலம் அல்லாத மொழியில் என்றால் பிரெஞ்ச் மற்றும் ஈரானியத் திரைப்படம் ஒன்று "subtitles" உதவியுடன் பார்த்தது முறையே "Amelie" மற்றும் "children of heaven".

9. தமிழ்ச்சினிமா உலகுடன் நேரடித்தொடர்பு உண்டா? என்ன செய்தீர்கள்? பிடித்ததா? அதை மீண்டும் செய்வீர்களா? தமிழ்ச்சினிமா மேம்பட அது உதவுமா?

இல்லை எவ்வித நேரடித்தொடர்புமில்லை.

10. தமிழ்ச்சினிமாவின் எதிர்காலம் பற்றி என்ன நினைக்கிறீர்கள்?

எதிர்காலம் பற்றிக் கூறும் அளவிற்கு கடந்த காலத்தையும் நிகழ்காலத்தையும் உற்றுநோக்கியதில்லை.

11. அடுத்த ஓராண்டு தமிழில் சினிமா கிடையாது, மற்றும் சினிமா பற்றிய சமாச்சாரங்கள், செய்திகள் எதுவுமே பத்திரிகைகள், தொலைக்காட்சி, இணையம் உள்ளிட்ட ஊடகங்களில் கிடையாது என்று வைத்துக்கொள்வோம்? உங்களுக்கு எப்படியிருக்கும்? தமிழர்களுக்கு என்ன ஆகும் என்று நினைக்கிறீர்கள்?

பழகிவிடும் அல்லது வேறுயேதோவொன்று அவ்விடத்தை நிரப்பிவிடும். ஒரு வேளை மெகா சீரியல்களின் எண்ணிக்கைகள் அதிகரிக்கலாம்.

வேறு சிலரை அழைக்க வேண்டும் என்பது விளையாட்டின் விதி. அநேகமாகப் பலரும் எழுதியிருப்பார்கள் அதனால் பொதுவான அழைப்பாக வைத்து விடுகிறேன். விருப்பமிருப்பவர்கள் எழுதுங்கள்.

ஒரேயொரு வரை மட்டும் கண்டிப்பாக எழுத அழைக்கிறேன். பலகாலமாக வெறும் புகைப்படங்கள் மட்டும் பதிவிலேற்றும் எங்கள் அன்பு அண்ணன்

உடுக்கை அடிக்கும் உடுக்கை முனியாண்டி அவர்களை அழைக்கிறேன்.

ஆன்மீகம் - கிரகிப்பு - IV - உணர்வு - கலாச்சாரம்

kaiyedu@gmail.com (கையேடு) — Sat, 01 Nov 2008 03:00:00 +0000

ஆன்மீகம் - பற்றிய முந்தய ஆன்மீகம் - கிரகிப்பு - I, ஆன்மீகம் - கிரகிப்பு - II - இயற்கை & ஆன்மீகம் - கிரகிப்பு - III - அறிவியல் ஆகிய மூன்று பதிவுகளின் தொடர்ச்சியாக ஆன்மீக உணர்வு, நம்பிக்கை மற்றும் அதனடிப்படையில் விளையும் சமூகக் கலாச்சாரம் மற்றும் அதன் எதிர்வினைகள் என இக்கட்டுரை நீள்கிறது.

ஆன்மீகம், மனிதனின் வளர்சூழல் சார்ந்த பார்வையினடிப்படையில் எழும் உணர்வு ரீதியான தேடல் என்பதில் மாற்றுக்கருத்திருக்க முடியாது. ஆனால், ஆன்மீக உணர்வுகள் வளர்சூழல் சார்ந்த கிரகிப்புகளினடிப்படையில் பழக்கப்படுத்திக்கொள்பவை என்ற கண்ணோட்டத்தில் அது இயற்கையிலேயே பிறக்கும்போது தோன்றுமோர் உணர்வல்ல. வளர்சூழலில் தோன்றியதாயிருந்தாலும் ஆன்மீகமும் மனிதனின் சிந்தனைத்திறத்தால் உருவாகும் ஓர் உணர்வே.

இவ்வுணர்வு ரீதியினாலான தேடலும், கடுமையான பயிற்சியின் மூலமே சாத்தியப்படுத்தப் படமுடியும் என்பதாக நம்பப்படுகிறது. மேலும், இப்பிரபஞ்ச இரகசியத்தை நோக்கிய ஒரு உண்ணதத் தேடல் என்றும், அத்தேடலின் விளைவால் அறிந்த உண்மைகளின் உதவியோடு சமூக வாழ்விலிருந்து மனிதனை உய்விப்பதையே தனது தலையாயக் கடமையாக வரிந்துக்கொள்கிறது ஆன்மீகம். மேலும், மனதை சுத்தப்படுத்துதல், அழிவில்லாத ஆன்மா, பிரபஞ்ச இரகசியத்தை உணர்தல் என்பன போன்ற கதையாடலாக சமூகத்தினுள் நுழைந்து தனது இருத்தலுக்கான அவசியத்தையும், நியாயத்தையும் கற்பிக்கிறது. இதனடிப்படையிலேயே ஆன்மீகத் தேடல் ஒருவனது வாழ்வினை முழுமைப்படுத்துவதாகவும், மனிதனின் பிறப்பே இத்தேடலுக்காக, போன்ற கருத்துக்கள் நம்பிக்கைகளாகின்றன. இவ்வகையான தத்துவ அடிப்படைகள் மெல்ல உடலைத் தாழ்த்தி, ஆன்மாவை முதன்மைப் படுத்து முனைகின்றன. இவ்வகையான தத்துவ அடிப்படைகளைக் கொண்ட இனக்குழுக்களின் உளவியல் எப்படியிருக்கிறது, அல்லது அதன் விளைவாகச் சமூகச் சூழல் எப்படி உருமாறியிருக்கிறது என்பது கருத்தில் கொள்ளப்படவேண்டிய ஒன்று.

ஆன்மாவையும், மனதையும் முதன்மைபடுத்தி உடலை வருத்திக்கொள்ளும் அல்லது தாழ்த்திக்கொள்ளும் இனக்குழுக்களிடம் இருக்கும் பொதுவான பண்புகளில் சில:

1. குழந்தைகளுக்கு தண்டனையாக உடலில் வலியை ஏற்படுத்துதல்.

2. சமூகத் தண்டனைகளாக உடல் வன்முறைகளை அதிகமாகப் பயன்படுத்துதல்.

3. பெண்களை, ஒரு பொருளாகக் கருதுதல். மேலும், உடல்குறித்தான கட்டுப்பாடுகளை முன்னிறுத்தி பெண்களை ஒடுக்குதல். இதன் மூலம் திருமணங்களை ஒரு வியாபாரம் போல பாவித்து, பொருள் கொடுத்துப் பெண்ணின் உடலைக் கொள்ளுதல். (இது நமது சமூகத்தில் இன்னும் மோசமாகயுள்ளது, பெண்ணை ஒரு பயனுள்ள பொருளாகக் கூடக் கருதாமல், பெண்ணையும் பொருளையும் சேர்த்துக் கொடுத்தல்.)

4. இவ்வகைச் சமூகத்தின் இளைய தலைமுறையினருக்கு உடல் ரீதியான கட்டுப்பாடுகள் அதிகமாக இருப்பதால், மது, போதை ஆகியப் பழக்கங்களில் ஆர்வம் காட்டுதல்.

5. மணவாழ்க்கைக்கு வெளியே (குறிப்பாகப் பெண்கள்) உடலுறவு வைத்துக் கொள்ளுதல், உயிரை எடுக்கும் அளாவிற்கான குற்றமாகக் கருதுதல்.

6. ஆயுதம் தாங்கியக் கடவுளரை வழிபடுதல்.

இவை பல்வேறு தென்னாப்பிரிக்க மற்றும் தென்னமெரிக்கப் பழங்குடியினரையும், ஒப்பீடு செய்தும், வட அமெரிக்காவின் சில மாகாணங்களில் பெருகிவரும் வன்முறைக்கும், இளைஞர்களின் போதைகளுக்குமான காரணங்களாகவும் கண்டறியப்பட்டவை. இப்பண்புகளோடு நமது தற்ப்போதைய சமூகப் பண்புகளின் ஒப்புமையை வாசகரிடமே விட்டுவிடுகிறேன்.

மேலும், முன்னர் விடுத்த இரண்டு புள்ளிகளையும் நினைவு கூர்தல் நன்று. முற்றிலும் துறத்தல் என்பதில் துவங்கிய தத்துவங்கள் பின்னர் தங்களது இறை வடிவத்தில் கூட நிர்வாணத்தை ஏற்றுக் கொள்ளாதது, இயற்கை குறித்தான கருத்துக்களில் மனித விலங்கின் சமூக வாழ்விலிருந்து விலகி, பேரண்டம், பிரபஞ்சத்தின் தோற்றம், உண்மை அல்லது தோன்றவைத்து இயக்கிக் கொண்டிருக்கும் ஆற்றல்/சக்தி குறித்த கதையாடல்களுக்குள் நுழைந்தது, என தொடர்ச்சியாக உயிரும் பொருண்மையும் சிறுமைப்படுத்தப்பட்டதை உணர்தல் அவசியம்.

வளர்சூழலின் கிரகிப்பினடிப்படையில் தோன்றிய ஓர் உணர்வாகயிருந்தாலும், இப்படியானதொரு உணர்வை மறுப்பதற்கில்லை. சிந்தனைத் திறனால் ஏற்படும் அறிதல் வேட்கைக்கான ஒரு வடிகாலாகவே இவ்வகையுணர்வு செயல்படுகிறது. இவ்வுணர்வும், ஒருவகை போதைக்கிணையான ஒன்றாகவே நோக்கலாம். இவ்வகைச் செயல்பாடுகளின் போது மூளை எனப்படும் உயிர்வேதிக்கலனில் நடக்கும் வேதியியல் மாற்றங்களால் சுரக்கும் ஒரு வகைத் திரவம் அளிக்கும் சுகானுபவமே இவ்வுணர்வும். ஆன்மீகம் இவ்வகையானச் செயல்பாடே என்பதைச் செயற்கையாகத் தியானத்தின் உணர்வை ஒருவரின் மூளையின் சில பகுதிகளை மின் தூண்டியதன் மூலம் அறிவியல் நிரூபித்திருக்கிறது.[1,2] உணர்வுகளின் ஒன்றான வலியை முதன்முதலாக அருதியிட்டு எண்மதிப்பில் அளப்பதற்கான படிநிலையை அடைந்திருக்கின்றன ஆய்வுகள்[3]. வரும் காலங்களில் உணர்வுகள் உணரப்படவேண்டியவை போன்ற சொற்றொடர்கள் வழக்கொழிந்து போகலாம்.

ஆன்மீகம் எனும் உணர்வு குறித்த மதிப்பீடுகள் தனிமனித உரிமை சார்ந்தது. ஆனால், அது மனிதனின் பிறப்பின் போது இயற்கையாகத் தோன்றும் ஒரு உணர்வல்ல. அதுவே, சித்தாந்தமாக மாறி பின்னர் நம்பிக்கைகளாகச் சமூகக் கலாச்சாரத்தினுள் நுழைந்து இயற்கையான மற்றவுணர்வுகளைச் சிறுமைப்படுத்தும் ஏற்றத்தாழ்வு அரசியல் மற்றும் அதன்வழிப் பெருகும் உளவியல் வன்முறைகள் ஆகியவை கேள்விக்குட்படுத்தி அவற்றை மீள்பரிசோதனைக்குட்படுத்தப்பட வேண்டியது அவசியம்.

பிறக்கும் போது பாலூட்டிவிலங்குகளுக்குப் பொதுவானதாகத் தோன்றும் பலவகையுணர்வுகள் தவிர அனைத்தும் வளர்சூழல், மற்றும் கிரகிப்புத் தன்மை சார்ந்தவை. மனிதனின் சுற்றுச் சூழலும், அறிவியல் அறிவும் வளர்ந்து வரும் சூழலில், இவ்வகையுணர்வுகளும் அதனடிப்படையில் முளையில் உருவகிக்கப்படும் பிம்பங்களும் மாற்றமடைந்து வருவன. உதாரணமாகப் பிரபஞ்சம் குறித்த அரைகோள பிம்பம் துவங்கி பால்வழி அண்டத்தின் அமைப்பு வரை.

இப்பூமியில் உயிர் தோன்றியிருந்தாலும் அல்லது தோன்றாவிட்டாலும் பொருண்மை மற்றும் ஆற்றல் உறவினடிப்படையில் பிரபஞ்சங்கள் தோன்றிக் கொண்டும் அழிந்துகொண்டுமிருக்கும். இப்பிரபஞ்சம் ஏதோவொரு நோக்கத்தினடிப்படையில் இயங்கிக் கொண்டிருக்கிறது, அல்லது இப்படியியக்கிக் கொண்டிருக்கும் ஆற்றல் குறித்த புரிதலில் ஒருவேளை ஆன்மீகத்தில் விடைகிடைத்தாலும் சூரியன் தன் அழிவை நிறுத்திவைத்துக் கொள்ளப் போவதில்லை. மேலும், இப்பிரபஞ்ச நிகழ்வுகள் அனைத்தும் ஒரு நோக்கத்துடன் நிகழ்கின்றன என்ற உணர்வே மனிதனின் சுயார்வத்தினால் விளைந்த கேள்விக்கான தேடுதல் வேட்கையைத் தணிப்பதற்கான அனுமானமேயன்றி, பூமிக்குச் சூரியனைச் சுற்றுவதற்கோ அல்லது தனது பரப்பில் உயிரைத் தோற்றுவித்திக் கொள்ளவேண்டுமென்ற நோக்கமோ எண்ணமோ கிடையாது.

உயிரின் இரகசியம்- ஆன்மீகத்தின் வாழ்வும் சாவும், இவையணைத்தும் இங்கே புதைந்திருக்கிறது பொருண்மை (உணவு).
இப்படியாக எழுதத் தூண்டிய சாத்தானின் உறக்கத்தினால், எனது இருள்நீங்கி துவங்குகிறது உங்களிருள், தற்காலிக முடிவுகளோடு தற்காலிகமாக முடிகிறது கட்டுரைத் தொடர். :)

1. இனி அறிவியல் மூலமாக யோகநிலை அடையலாம் - சதுக்கபூதம்
2. http://www.nytimes.com/2007/08/23/science/23cnd-body.html?_r=2&hp&oref=slogin&oref=slogin
3. "எல்லாம் தனக்கு வந்தால் தெரியும்" - பொய்க்கப் போகும் சொல் வழக்குகள் - கையேடு

இதையும் வாசிக்கலாம்
காம அரசியல், காமத்தின் அரசியல், காமமே அரசியல் - பைத்தியக்காரன்.

புகைப்படம்: பிரெஞ்சு ஓவியம்.